一場公司飯局，我們的命運從此改寫: 第一章：離奇消失
(第一章：離奇消失)
「好嘢喎，比你搞店左個大客！」我大讚樂仔。
樂仔係我哋sales team既新力軍，大學畢業後加入公司，做左短短一年，成績已經好標青。
我叫Karson，今晚係我哋團隊既Happy Friday飯局，出席既有郭Sir、Felix、我、Michelle、TT同埋樂仔，重有一位組員Jason，因為有啲唔舒服，所以今晚無黎。
我哋飯聚既地方，係旺角瓊華中心牛昇燒肉專門店。
「各位大佬過獎啦，」聽到我讚佢，樂仔臉帶微笑，謙虛道。「都係全靠近一年來跟到各位阿哥阿姐學嘢啫。」
我今年廿八歲，入左行六年，好耐都無見過好似樂仔咁有前途既新人，笑容友善，醒目但又唔會囂張。
上一次我覺得好有前途既新人，係兩年半前加入既Michelle。
「果然好嘢，今時今日好少後生仔好似你咁謙虛，抵d客冧你既！」Felix都加把口一齊讚樂仔。
Felix既職級同我一樣，都係Assistant Sales Manager，當年我哋差唔多時間加入公司，可謂同撈同煲，有單開既日子一齊舉杯慶祝，無單開既日子一齊借酒消愁。
「全靠你教識我待客之道啫Felix哥，小弟重有好多嘢要向Felix哥同埋咁多位好好學習。」樂仔說。
「好啦好啦，坐低左咁耐，叫左嘢食先啦，」郭Sir說。「Michelle，拎個menu過黎吖。」
郭Sir係我哋團隊既阿head，年紀約莫四十出頭，在行內擁有良好的人脈和豐富的經驗。
Michelle在檯邊拎左兩份餐牌同埋一部用黎落order既iPad出黎，分別遞給郭Sir、Felix和我。
「大家都係食肉獸，都係狂叫肉食架啦，」我一邊翻著餐牌一邊說。「叫兩個拼盤，再加d嘢大家share食……牛舌一碟有五塊，咁叫兩碟囉，反正TT食一塊都唔夠喉架啦。」
「唔係呀大佬……哈哈，我食一塊夠晒架啦。」坐在我斜對面的TT不尷不尬地說。
TT係一名高大肥仔，身高約六尺一吋，經驗同我差唔多，不過佢sell客既時候臨到close deal會好緊張，因此往往連放到埋口既肥豬肉都食唔到，所以成績一向麻麻。
「咁叫兩碟牛舌……兩碟安格斯牛，」Felix接口道。「Michelle，你有無咩想食？」
「我無所謂呀，你哋中意食咩就叫咩啦。」Michelle說。
「咁吖，」Felix考慮著。「我記得你好似對海鮮敏感，咁不如叫羊肩啦。」
「唔洗就我啦，」Michelle說。「不如叫個海鮮湯比郭Sir同大家飲啦。」
「唔緊要，樣樣叫d啦。」郭Sir笑說。
然後我哋決定左食啲咩，Felix就用iPad落單。
隔左一陣，有個女侍應行過黎，係一位長頭髮做左金色highlight、雙眸戴左一副大眼仔con既妙齡少女。
此刻我並唔知道佢叫咩名，日後我會知道，佢個名叫Yumi。
「大家好，歡迎光臨牛昇，不如趁用餐之前，我同大家介紹一下唔同既醬油同餐具係點用吖。」
接著Yumi純熟地為我們逐一解釋，例如邊款醬油配咩食物、夾生肉同熟肉又分別應該用咩工具。
「各位，我哋而家做緊promo，只需要比二百蚊就可以做會員，請問各位有無興趣呢？」
Felix同我已經係會員，所以都無出聲。一陣短暫的沉默後，我意識到其他人都無興趣。
始終大家都係sales，我就好聲好氣咁同Yumi講：我同依位靚仔（瞟一眼Felix）都已經係會員，而其他人都無需要喇，唔該晒～
Yumi行開左之後，我哋就繼續傾喝，比如傾下TT上個月去日本旅行既嘢，又傾下Michelle安排緊同男朋友結婚既嘢。
席間有講有笑，忽然一陣手機鈴聲響起，樂仔拿出電話，望著螢幕。
那一刻，大概看到不想看的來電者名字，樂仔皺一皺眉，表情十分為難。
「唔好意思，我要出去聽個電話……」跟住樂仔就行左出去。
我同樂仔只係同事，雖然十分欣賞佢，但彼此之間並無真正交流，所以佢到底有咩煩惱，我一概不知。
「咦，做咩今次d嘢食好似咁耐都未黎嘅？」隔左一陣，Felix忽然說。
比佢咁樣講一講，我都覺得好似係，咁啱瞄到遠處有位經理喺度，於是我揮一揮手，叫左佢過黎。
「唔該，我哋落左order好耐啦，點解d嘢食重未到嘅？」
「哦，我幫你跟一跟吖。」
經理用手拉一拉衣領，側頭向繫在衣領的對講機低聲說：
廚房‧廿七號檯‧出貨未。
隔左一陣，聽到對講機既另一端話：
出左啦喎。
「放心啦，應該到架啦。」經理好有信心咁講，果然一講就到，兩位侍應已經將食物送左黎。
「哈哈，每次都係一催佢就黎架喎。」
「因為已經等左好耐先會催架嘛，所以催佢嗰陣已經差唔多架啦。」
「嘩，點解佢一係唔黎，一黎就好似黎晒咁嘅。」
「唔知喎……咦，樂仔咁耐重未返嘅？」
「可能個電話好重要掛。」
「洗唔洗傾咁耐呀，又釣到大客呀？」
「可能係私事呢。」
「哦……咁我哋食住等啦。」
咁‧我‧哋‧食‧住‧等‧啦——
當晚，樂仔再無出現過，打電話無人聽，Whatsapp顯示為離線，無人知佢去左邊度，閉路電視亦都影唔到佢離開瓊華中心。
樂仔消失左。
(第一章完)