是咁的，我嘅職業係動物傳心師: 159.多謝晒你

「咁就好喇。終於都告一段落喇⋯⋯」當然我出院之後仲要去搞埋啲手尾。

依個時候Dada入嚟：「哇我一嚟探病你就醒，仲話唔係暗戀我？」

原來我又昏迷咗一個禮拜，我屋企人、巴膠、綠燈同Dada都輪流嚟過睇我。

「咁好嚟探我，仲唔係你暗戀我？」

「真是荒謬。點呀？你哋講緊咩？」





「講返本天貓café單嘢啫，我哋大獲全勝！」Miki向Dada向我做出勝利手勢：「V！」

Dada走過嚟，摟住Miki膊頭：「我都話我朋友幫到你㗎啦。」

「得喇得喇，係Miki幫我喳，你除咗介紹我哋識之外仲做過乜呀？甩揈呀！」

「你病到咁仲聲大夾惡嘅？」

咔。大門打開，我哋幾個人望向門口，著住醫生袍嘅巴膠拎住公文袋，用眼神示意Dada出去先。





「等你基友挫你一鑊就啱㗎喇。Miki，我哋出去先喇。」

「Dada！」

「唔？」

「多謝晒你。」

「噓！講依啲。」





「你代我請Miki食餐飯吖。」

Dada停低咗，無回頭，用手臂係面前一擦：「從來都係人哋請我㗎啦，我點會請人㗎。但見係你，就破例一次啦。」

講完，佢就拉住Miki急步離開。