是咁的，我嘅職業係動物傳心師: 158.其實係我做

Miki話佢好快就整理好由前員工爆料嘅內幕，本來諗住加埋放蛇攞到嘅料一齊放上網，但係佢啲同事發現間café無開。

就喺我被送嚟醫院嘅同日，本天貓café嘅店長亦有事入咗院，於是Miki決定就咁將內幕放上網，再度刺激輿論，同時亦多咗好多人關注依個議題。「不過，長遠嚟講我都擔心佢哋會捲土重來，仲諗緊點可以徹底解決依個問題嘅時候，就到個天幫手喇！」

Miki愈講愈興奮：「我收到風，唔知個店主做咩事，出院之後返到café諗住開舖，然後話聽到好多貓喺佢腦入面講嘢，之後又嘔白泡又發羊吊咁。」

睇嚟我成功將傳心能力植入咗喺佢腦入面。

「如是者過咗一個禮拜都無好轉，精神仲瀕臨崩潰邊緣。之後聽講佢上咗律師樓搞轉讓手續，等緊個神秘買家簽約之後就將成間舖過畀人。」順帶一提個神秘人就係我。「不過聽講佢仲係不停聽到唔同動物講嘢，所以好困擾，依家接受緊治療，但醫生都唔知佢咩事，以為佢幻聽，介紹咗佢睇心理醫生。佢到依家都未好，不過出街都會盡量避開有動物嘅地方，睇個勢佢應該唔會再開到同類型嘅寵物café㗎喇。」





Miki伸出手，示意我畀個五佢。我用手掌輕輕同佢對拍。

「無啦啦有個咁嘅怪病，真係連個天都幫埋我哋呀。計我話，佢實係做得陰質嘢多，依家遭天譴啦。仲有就係啲貓仔都好好彩，最後有個神秘人肯收養晒佢哋。」
其實係我做嘅，但當然唔講得啦。