是咁的，我嘅職業係動物傳心師: 134.相簿

深呼吸，搭𨋢，行到屋企門口。

「唉，死就死。」

打開門，老豆阿媽都坐咗喺梳化，一個用手機睇緊片，應該係荷李活商業電影，大量槍聲同爆炸聲響起，如果無咗依啲聲，間屋應該好靜；另一個就揭緊手上嘅簿，眼又腫鼻又紅咁，我睇真啲先知原來阿媽睇緊相簿。

閂門，除鞋，入屋。

「返嚟喇？飲湯啦。」平時依句嘢係阿媽講，今日變咗老豆講。





佢用下巴向食飯枱點一下，我亦行過去，打開蓋，橙紅色，係番茄薯仔湯，溫度暖暖地啱啱好。

我飲完湯、洗好碗，見佢兩個都唔似有嘢同我講，就去咗沖涼先。沖完涼出嚟，兩老仍然無咩反應，反而令到我更擔心。

「你兩個⋯⋯無嘢同我講？」                  

老豆微微低頭，視線穿過老花鏡片望向我，搖搖頭；阿媽就拍拍佢旁邊嘅位，叫我坐埋去。佢拎住相簿，一頁一頁咁揭，指住一張又一張開始泛黃嘅相，話依張係有咗我三個月嘅時候影嘅，嗰張係我出世時候嘅相⋯⋯隨住大大本嘅相簿每揭一頁，我嘅濃縮版人生就呈現喺眼前。

幼稚園嘅生日會、郊遊日、親子日、畢業禮嘅表演、小一入學、萬聖節開放日、遊戲日、運動會、秋季大旅行、聖誕聯歡會、新年假期、復活節假期、暑假去旅行⋯⋯嗰陣時嘅我仲有自閉症，影親相都唔會笑，我仲記得當時我直情係討厭人多同埋所有集體活動。





「我本來想話你，嗰日一早叫你去照多次，但諗諗下，早照遲照，其實結果都係一樣，無得改變。」

阿媽揭到最後一張相，係我哋對上一次去旅行影嘅全家福，再將相簿揭返去第一頁，指尖放喺啱啱出世嘅我面上。