是咁的，我嘅職業係動物傳心師: 132.男朋友

「你好，我是Dada的朋友阿金，恕我冒昧，有一事相求。」

對方好快回覆：「hi～我係Miki，依位兄台客氣客氣，有咩要幫手？」

我將情況同自己嘅疑慮一一交代清楚畀Miki知。

「你懷疑間café有景轟？想我借記者身份表面上做訪問，實際上就係乘機搵下有無蛛絲馬跡？」

「沒錯。最重要探下走廊上的奇怪房間，我在那裡聽到過貓叫。」





「但具體嚟講，你覺得間嘢有可能有咩問題呢？」

「最簡單想到的是虐待，但店內的貓還算健康⋯⋯」我仲未打完，就突然諗起洗完手返入café嗰陣聽到嘅事。

一隻貓撩另一隻貓交配。

靈機一觸，我終於知道嗰啲怪味到底係咩。

類似係荷爾蒙嘅味道，好似大量貓嘅精液同體液混雜咗之後，殘留到發霉嘅味道。





「還可能是強逼貓隻不停交配配種之類。」

「哦！非法做動物繁殖再賣出去賺錢！放心交喺本小姐身上，我會用媒體嘅力量幫你搵真相㗎！」

「謝謝你。」

「傻啦！報道真相係記者應該做嘅嘢嚟㗎嘛！好好呀你，願意為動物做依啲嘢。」

「沒辦法，動物沒能力自己拯救自己，也只有人類能幫牠們了。」





「畀個讚你👍你連icon都係同貓貓影，實係好鍾意動物。」

經Miki一講，我先為意到我同餐肉影依張相嘅角度同位置，竟然同佢同男朋友影嗰張相差唔多，真係好巧合。

「對，牠是餐肉，我最愛的寵物。可惜已經不在了。」

隔咗一陣，我見到Miki個名下面出現「輸入中……」跟住又消失，隔咗一陣，又再「輸入中……」

「咁啱嘅。我icon係我男朋友，我最愛嘅人，不過可惜都已經唔喺度喇。」

睇佢男朋友個樣比我更加後生，唔知係因為咩事咁早就唔喺度呢？