是咁的，我嘅職業係動物傳心師: 130.依賴

「我知喇！勒死我喇你哋，無氣喇無氣喇。」我拍下佢哋背脊，盡量將氣氛帶返去輕鬆啲嘅方向。

佢兩個終於放開我。之後嘅話題就變咗交代病情，但我始終無同佢兩個講我擁有傳心能力。

「咁世伯伯母知道未？」

「未呀。」「知。」我同巴膠同時出聲。

我瞪大眼望向巴膠，大大力呑咗啖口水。





「你唔係下話？又話保護病人私隱嘅？」

「病人家屬有權知道。」

「上次照腦嗰陣你話唔講㗎喎⋯⋯」

「照之前唔知你幾嚴重。我覺得去到依個地步，你屋企人都需要知情，有個心理準備。如果唔係你時間一到，對佢哋打擊太大。」

「你幾時同佢哋講？」





「新鮮滾熱辣，今日講嘅。」

我一掌拍落自己額頭：「無喇無喇⋯⋯」今晚返到去兩老實當我犯咁審。

「咁你唔好咁夜返去喇，我諗佢哋都等緊你。」綠燈講完就揮手叫店員埋單。

就咁，Dada嘅小小生日聚會結束，我哋亦離開貓café，但臨走前，我諗試下巴膠嘅提議都無壞。

嘗試下當自己只係普通人，以普通人嘅方法去處理。





佢講得啱，自從有咗傳心能力之後，我已經習慣咗用超能力去解決問題，接客人係咁，查毒貓案又係咁。

可能因為我心入面覺得，自己有能力就有責任，諗到所有問題只有我可以解決。正如當你成為超人，自然會將打怪獸嘅任務攬上身，而唔會考慮依靠地球防衛軍一樣。
 
依賴下我哋依啲普通人都無咩問題啫？