是咁的，我嘅職業係動物傳心師: 129.不要懼怕死亡

「唔好再講依個話題喇，今日你生日我哋要開開心心咁過。」我嘗試將話題拉離我個病，但完全無人理我。

綠燈見到巴膠嘅反應，難以置信咁自言自語：「唔會㗎⋯⋯唔會咁樣㗎⋯⋯」

本來應該開開心心嘅慶生聚會，依家搞到個個死老豆咁款，總感覺我好掃大家興，果然我一開始直接走人先係明智選擇。

「我無事喎，好就好在個腫瘤生喺唔會影響身體機能嘅腦區，所以我又無頭暈作嘔乜乜乜，唔係好辛苦。」

毫無先兆，綠燈同Dada一齊撲過嚟摟實我，好實好實，一時之間我都亂咗陣腳，唔知畀咩反應好。





「點解咁大件事⋯⋯唔一早同我哋講？」

「因為我唔想搞到依家咁愁，唔想影響你哋心情嘛。而且就算講都無用，只係令你哋白白擔心，所以咪諗住唔講。」

佢兩個睥向巴膠。

「唔好望我，醫生有責任保護病人私隱。」

「個重點唔係我哋知咗對你病情有無幫助呀。」綠燈將塊面埋喺我膊頭度，口齒不清咁講：「而係等你知道，你唔係自己一個。」





雖然講到尾，死亡依個終點，我哋每個人都要孤獨面對，人人都一樣，無例外、無倖免。但起碼，終點前嗰段路，有人一齊行。

重要嘅唔係踏過終點嗰一剎那，而係喺行向終點嗰段路上，身邊有咩人、沿路有咩風景。

喺死亡面前，一切都變成過去式；所以，你有無幸福過？有無笑過？

若感動過，便不枉過。

不要懼怕死亡，只怕從未真正活過。