是咁的，我嘅職業係動物傳心師: 80.麻煩嘅貓

我曾經睇過一篇報道，內容係講一隻被人棄養過兩次，仲要係被人遺棄喺荒島缺水缺糧嘅貓同人之間嘅故事。

第二任主人接咗隻貓返去之後，佢日叫夜叫，主人無辦法之下唯有棄養，再度被遺棄令隻貓更加憂鬱，食量減少，直到現任主人出現。一開始，新主人只係摸下貓貓個頭，已經被佢咬到要打三支破傷風針，但新主人不但無放棄，甚至無困佢入籠，而係由得佢喺屋企周圍走。

至於隻貓日叫夜叫嘅問題，主人一直唔知要點處理，淨係知佢叫到好似人格分裂咁，有唔同嘅聲音，有時仲好似有幾隻貓嗌交咁。有一次佢坐喺隻貓旁邊，默默陪咗貓貓幾個鐘，每次貓叫佢都作出適當嘅回應安撫佢，自此隻貓日叫夜叫嘅情況就喺往後嘅幾個月之間逐漸減少。

兩年過去，隻貓依家除咗每朝七點準時大叫嘈到主人起身至停之外，仲有一個問題就係成日喺主人張床度屙尿，主人用過所有獸醫同訓練員講嘅方法都係無用。

日叫夜叫、朝早整醒你、亂屙尿……有幾多個人可以忍受得住？仲要係兩年。如此一來，大概都會明白點解隻貓會被人棄養兩次，但係今次嘅主人無咁做到。





佢係一個心理學家，喺一次研討會將應對自閉症兒童嘅方法技巧分享嘅時候，諗起自己隻貓。