是咁的，我嘅職業係動物傳心師: 78.弔詭

佢死咗一年喇⋯⋯我哋分咗手三年喇⋯⋯我個病已經十年喇⋯⋯我哋覺得一切都太耐，其實只係因為我哋生活得太快。

上網開個post、放張相、同異地朋友視像電話、玩交友app識個人，通通都係幾秒鐘內發生嘅事，當幾秒變成常態，幾個月就變得太長。

以前嘅人拍拖以年為單位，現今嘅人拍拖以日為單位。

以前失戀要重新出去認識一個新對象起碼要幾日，現今download個app唔使一分鐘就可以識到幾十人。

以前一切都需要花時間，要見異地親人需要飛過去、要溝通需要書信。





喺時間未被壓縮成秒嘅年代，一年並唔長，但就算時間被科技壓縮咗，仍然有啲事物永遠需要花時間先可以完成：人同人嘅溝通、人同動物嘅理解、走出失去最愛嘅痛苦、根治情緒病⋯⋯通通都係只能用時間心機去慢慢做嘅事；偏偏，人類永遠覺得自己唔夠快。

最弔詭嘅係，當時間多咗，反而愈少人願意花時間做要花時間嘅事。