是咁的，我嘅職業係動物傳心師: 30.流浪貓

「不過依幾年興絕育，依帶啲貓都紮晒，應該唔會再有下一代㗎喇。」

動物絕育，典型嘅效益主義產物。

效益主義簡單講，就係將一個社會嘅整體利益同成本放喺天秤上量度，選擇可以令最大多數人幸福嘅決策。

絕育嘅邏輯係，太多流浪動物，而社會上太少人有愛心同資源去照顧佢哋，佢哋無人照顧又會受苦，於是要減少數目。直接殺死有違人道，所以選擇由源頭入手，透過絕育去令流浪動物唔會再增加。

當然，為大多數嘅幸福而犧牲少數嘅權利到底係啱定錯，就由每個人各自去判斷，無絕對答案，反正對我嚟講，社會太大，我只能夠做好自己，愛身邊嘅人。





發叔指一指匿喺石凳下面，合埋眼嘅一隻三色貓。佢彎低身慢慢行近，三色貓可能已經感覺到有人靠近，突然擘大眼。

「喵⋯⋯⋯⋯⋯⋯」充滿敵意嘅叫聲，攻擊前嘅張牙舞爪。

三色貓面目猙獰，但消瘦又虛弱嘅佢好快無力繼續叫。

「哇，你對佢做過咩嚟？」

「阿叔我都想知我做乜得罪佢。」





我踎低望三色貓，年齡大約係一歲左右，但睇嚟好多日無食過嘢，身體有啲瘦弱。

「咪住先，等我確認下，你唔係依隻貓嘅主人呀可？」

「唔係呀，佢只係流浪貓嚟㗎咋。」

「少有喎，通常啲人都係搵動物傳心幫自己隻寵物，好少會為流浪貓咁做。」

發叔拉一拉我，叫我唔好行咁近。