是咁的，我嘅職業係動物傳心師: 28.養過

好多人覺得要改變世界需要做好多嘢，但有時候只係一句道謝，已經可以改變另一個人嘅世界。

「如果所有客人都好似你咁諗，個世界會靚好多。」

「如果多啲動物傳心師好似你咁，個世界都會靚好多。」

我同阿麗相視而笑，大B喺我哋身旁兜圈。

我順住毛髮摸佢個頭，一瞬間有種摸緊餐肉嘅感覺。





「係呢，你有無養寵物㗎？」

「養過啦。」

「貓定狗？」

「貓嚟。」

「你個樣都似鍾意貓。」





大B貼緊我嘅小腿，抬頭望住我。

聽講，動物嘅直覺比人類強。

「我無事喎。」我的笑容如泡沫，一觸即破。

阿麗唔係好明，但佢見我同大B講，所以都無追問，只係將剩低嘅費用交畀我，就拖住大B離開。

我習慣客人過咗訂先，完成服務之後再收尾數。





我唔會呃訂金，而真心為寵物嘅客人都無試過走數唔畀錢。

當然久唔久都會有人講下價，但我向來明碼實價，又唔係路邊攤，講明價錢一買一賣就咪見面時忽然問我有無得平啦好嘛？