是咁的，我嘅職業係動物傳心師: 27.令世界快樂少少

「其實你放低咗啦。」綠燈聽到我咁講有啲愕然。

「因為已經let him go咗，所以回憶無咁易浮翻上水面，而就算你返到屋企記返起⋯⋯你有無喊吖？聽你語氣都唔似有吖。」

「又真係無，純粹就係原來我以前同佢嚟過～咁樣咯。」

放下，自然記起也不怕；未放下，不必自欺欺人。

若我放不下，就任由牠留在我心房，至死方休。





「多謝你呀。」阿麗嘅道謝將我嘅意識拉返嚟現實。

「唔使啦，收咗你錢㗎嘛。」

「汪！」我已經斷絕咗動物傳心嘅能力，所以聽唔明大B吠叫嘅意思。

阿麗問：「你去餐廳食嘢，會唔會老奉要侍應服侍你？」

「咁又唔會。」





「佢哋有糧出㗎喎，你係客喎。」

「都無理由老奉㗎嘛。」

阿麗微笑：「咁咪係，所以就算你收咗我錢，我都想多謝你。」

講句多謝、唔該，並唔係咩難事，但就可以令世界快樂少少。

而我聽到客人對自己衷心嘅感激，心情都好啲。