是咁的，我嘅職業係動物傳心師: 17.無條件

「咁都情有可原。」

問題係，喺大B嘅角度，個口罩唔係保護緊佢。

她說，我在保護牠；牠說，她在虐待我。

「你幫我同佢講，叫佢唔好再亂咬嘢吖，好無？」

「叫佢唔好亂咬嘢有幾難吖，佢聽先得㗎。」我喺大B面前踎低，嘗試伸出手，大B即刻退開。





「大B，你主人叫你咪亂咬嘢呀。」

「佢根本咩都唔明白。」

「喂，我就話可以同你溝通啫，你主人係普通人嚟㗎咋，佢唔明白你有幾咁閒呀？」

喺阿麗嘅角度睇，我係對住隻狗自言自語。

「我同你講到嘢，你又唔話我知係咩事，然後成日話人唔明白你，大佬，你講都未講，點知我明唔明先？」





大B可能係覺得我有道理，所以頭轉返向我。

「嗱，我知個死人口罩笠住你好辛苦嘅，我幫你除咗先，好無？」

「條件呢？」

「咩條件？」我呆一呆。

「即係畀點心我，條件就係hand hand，嗰啲條件呀。」





我伸出手。

阿麗有啲驚，想叫停我，但我向佢點頭令佢安心。

我解開大B個口罩，交畀阿麗。

「無條件，淨係想你舒服啲。」

大B同阿麗，用難以置信嘅目光望住我。