是咁的，我嘅職業係動物傳心師: 5.傳心

由我十歲開始到依家，我從未有一日唔係同餐肉一齊過，但過多幾分鐘，餐肉就會永遠喺我生命之中消失。

我用手一下一下掃佢背脊，呢個係佢最鍾意嘅摸法，由餐肉細細粒嘅時候開始，每次我咁樣掃，佢就好快瞓著。

「瞓啦⋯⋯瞓咗就舒服啲⋯⋯」

餐肉虛無嘅雙眼之中，閃過一絲不捨，但我諗佢未必係唔捨得我，只係我自作多情。

佢轉過頭，合埋眼。





「喵。」烏蠅拍翼都比餐肉嘅叫聲更加響亮。

「金仔。」嗰一刻，我腦入面出現咗一把從來無聽過，但好熟悉嘅聲音。

「餐肉⋯⋯係咪你呀？」我問，獸醫即刻皺眉望住我。