從前有個校長，佢禁錮左全校學生【更新至第二十一章】: 第十二章

21:13
頭先喺五點左右我地幾個返左黎之後食左少少羅雨帶返黎嘅食物同互相交換左少少情報同經歷，得知胡基言同陳晞瑤死左，邱淳都無返過黎，對此我反而無咩感受，係因為我同佢地唔熟？感覺上就好似少左一兩個人無返咁，咁諗好似有D冷血定係正常？

而家黑板上面留低之前kitty 仲有tony，咸魚一齊討論嘅結果，充滿住唔同顏色粉筆遊走過嘅痕跡，以下為我地所討論嘅結果：
1.校門被莫名奇妙咁鎖左，但明明就無任何鎖頭
2.學校無法逃生，有人試過揼本書出窗外，但係本書一離開學校範圍就自燃並化為灰燼
3.怪物全部都係學校嘅生物化成，原因不明
4·學校可以上網，但係無辦法連絡學校外
5.成件一定同老師校長有關
6.呢度無皇管，話知你殺人放火





但其實我覺得佢地漏左一點，就係呢件極有可能同今朝個颱風有關，因為自從颱風黎到之後，所以野就變到好奇怪，但係又諗唔到有咩關係。同埋依單野應該同老師無關，因為喺上sci lab之前我喺班房門口執到張紙，張紙係平時用黎通知學生去見老師，上面有寫原因同後果。但係張紙唔係通知學生，而係通知老師。

梁老師：
請你於第六節完結後立即到校長室
原因：緊急
後果：必須辭職

紙條上無寫上下款，亦無清楚列明原因，不過都可以肯定係同校長有關，而老師為左保住份工而去左校長室。睇黎件事就十不離八九，可惜知呢D野對逃走係0幫助，所以，我都無同佢地講。





雖然班中有文書（蔡沛）負責抄低黑板嘅野，但係手痕嘅我都拎左本乜都寫曬喺入面嘅筆記本，慢慢將每一點抄下，以前睇小說，通常mark低嘢嘅人係會生存得最耐，仲會知道得更多事。

21:15
躺響冰冷嘅木枱上面，努力忍住唔望出走廊（如果出面有怪物，應該會嚇死），唯有望住班房各個難以入睡但又默不作聲嘅身影喺只有淡淡夜光襯托嘅黑夜翻來覆去。唯一嘅聲音就冷氣嘅嘈音，明明應該係夏天，但係除左係因為冷氣嘅關係，我諗應該係處於呢個空間就係會帶俾人一種寒意，畢竟今日已經有兩個人死咗，一諗起下一個可能係自己，就好難會安心咁瞓著。

一直以黎我都以為我係一個平凡嘅女學生，每日返學等放學，放學飲可樂，但而家諗返，我所擁有同失去嘅嘢都唔係別人想像中咁簡單，我曾經有一本自編自導自演嘅漫畫，曾經擁有一個我自以為美滿嘅家庭，但點解係“曾經”？點解我喺小學就係一個全級都知嘅漫畫家，但黎到中學就只係一個平淡嘅學生？我相信呢一切一切都有一個原因，我亦都相信如果呢一場災難只係一場唔會嗌cut嘅電影，我可能比任何人更有可能成為主角。

唔係因為我有高人一等嘅智慧，超人般嘅實力，甚至所有事嘅幕後主腦，而係因為我有一種與眾不同嘅睇法。

遇上怪物，最唔可行嘅就係同佢地硬碰硬，我意思係同佢地打只會係一種以卵擊石，螳臂擋車嘅行為，就算全班傾巢而出咁去攻打，亦有機會全軍覆沒。除非可以全校幾百人一齊打，咁樣打足幾個星期就應該可以殺曬佢地。





但基於人類同生命力頑強嘅昆蟲本身就無任何可比性，其實有好多人都會俾一隻細小嘅嘅曱甴嚇到尖叫，更何況係一隻大成年人兩倍嘅曱甴？要對付唔正常嘅事，就要用唔正常嘅方法。感化，世界上任何生物都有情感，只係人類唔明佢地嘅語言，唔知佢地嘅感受，利用感情感覺去感化怪物，去解開心結，打破人類和生物嘅界限，證明人類唔只係生理上嘅進步。

而我深信過咗今晚，將會係一個重大嘅轉機。