偷戀: 第三十章
到底係唔係所有女仔，都咁鍾意吊人癮嘅呢？
定抑或係只有吸引人嘅女仔會咁做？做是係會咁做嘅女仔先吸引人呢？
我想唔通。
阿欣講完嗰句之後，繼續聚精會神咁畫佢嗰幅畫。
我無可奈何之下，唯有按捺住自己嘅好奇心，完成埋眼前嘅畫作先。
我細心思考阿欣嗰句說話嘅含意。
如果以前我嘅畫係帶有枯燥嘅感覺，咁依家呢？
「依家多咗一種澎湃嘅感覺。」阿欣無神神彈呢句出嚟，嚇到我心離一離。
你又知我諗緊咩？
「你諗緊，點解我知你諗緊咩哩？」阿欣真係語不驚人勢不休。
「呃……係呀……」
「哈，估到你啦，平時你畫畫，一畫就唔會停，嗰種磅礡嘅氣勢，其實都幾震撼，啱先你落完一筆又諗諗，落完一筆又諗諗，我咪諗你係唔係諗緊我講嗰樣嘢囉！」
「哦……」
「我從來都唔知，原來你係一個感情咁豐富嘅人。」阿欣企起身，行嚟仔細端詳我幅畫。
佢靠得有啲近，我聞到佢身上好香嘅氣味。
係唔係乳汁分泌時候嘅味道呢？我唔知，但我扯咗。
「咁……咁你覺得我係一個點樣嘅人？」
「正話咪講咗囉！枯燥呀！一潭死水呀！」睇嚟我當初隱藏自己對佢嘅情感隱藏得好好，如果唔係佢一定唔會咁樣形容我。
「咁點解你依家會覺得我感情豐富？」
「你幅畫……好壓抑，好糾結……」
「點睇得出？」
「你用紅玫瑰做主題，但係只有花蕊係紅，周邊花瓣散落嘅部份就用冷色系嘅藍同紫……你用嘅紅仲要溝到鮮血嘅顏色咁，而背景就用米白同黃嚟形造天堂嘅感覺……但偏偏一啲散落嘅花瓣會幻化成惡魔，其他就會枯化，你遇到咩事呀？」
「你讀心理學架？」
「唔係呀……不過，我就係知道你嘅想法。」
佢講到咁曖昧，我真係不禁諗起阿樂成日講嘅說話：「真係好想瘋狂中出阿欣呀！！！！一路渣佢對大奶奶，一路瘋狂抽插佢，玩完傳教士玩龍舟掛鼓！！！射晒喺佢入面，搞大佢個肚再等佢老公幫我養便宜仔！！！」
SORRY，呢段阿樂嘅暇想與本故事無關。
「不如你講俾我聽，同我分享吓？」阿欣提議。
我就話咗……唔想撞到中學同學……
仲要係阿欣……
我被佢殺我一個措手不及，完全無婉拒嘅空間，就同阿欣一齊搭船出返市區。
同KATHY嘅故事，緊係要由大排檔講起。
所以，我帶咗佢去食平時同KATHY去開嘅嗰間大排檔。
喺大排檔，我再講多次我同KATHY嘅事俾阿欣聽。
不過，阿欣嘅反應同阿樂唔同。
「難怪啦。」阿欣講。
「難怪啲咩？」我問。
「難怪你幅畫畫成咁啦……不過我唔多唔少都估到架喇！」
「你又估到？」
「係呀，咪講咗囉，我就係知道你嘅嘢！」阿欣講。
咁你又知唔知我鍾意過你呀……
「點解你會知？」我問。
「識咗你咁多年！」佢好似答得有啲敷衍。
「講大話。」我進一步試探。
「車！唔好講呢啲喇，講返你同你個KATHY啦！」
我同我個KATHY？雖然KATHY唔係我嘅，但我唔想糾正阿欣嘅呢種說法。
「仲有咩好講，佢都避我避到咁……」
「你俾少少自信自己啦！」阿欣鼓勵我。
自信？如果我係有自信，我中學嗰陣一早同你表咗白啦。
「無架喇……」
「乜你咁架，咁樣唔得架！眼白白睇住心愛嘅嘢消失，都唔嘗試捉實佢，你會後悔架！」
「咁我可以點者……佢唔只有男朋友呀，佢仲唔理我呀！」
「你有冇諗過，係因為佢發覺有少少鍾意咗你，為免泥足深陷，所以先迴避你咩？」阿欣提出咗一個新嘅觀點。
我真係無諗過，因為覺得連千兆份之一嘅機率都無。
「你覺得有可能咩？」
「覺！」
「點解？」
「女人嘅直覺囉！」
「無根無據……」我質疑。
「咁如果我話……」
「咩？」
「如果我話我鍾意過你呢？」
卟！
冷不防地，阿欣打開咗我腦海入面回憶嘅嗰道門。
往事極速喺腦入面翻頁，幫我尋找阿欣鍾意過我嘅證據。
但係搵唔到，連丁點都搵唔到！
「你鳩嗡咋？」我問。
阿欣臉上泛住紅咁搖搖頭，我唔知道係酒精嘅原故定係乜嘢。
但佢呢個舉動，令佢嘅說話更有說服力……
「我唔信！」我講。
「你咪唔好信～我婚都結咗啦，呃你做咩者。」
「……咁點解你唔話我知？」
「我女仔嚟架喎！假假地都班花級丫，唔係要我畫公仔畫出腸掛？」
「咁你少少SIGNAL都無……」
「無SIGNAL？你白痴架？你知唔知我會考ART最後拎咩？」阿欣問我。
「唔知呀……」
「A呀！係A呀！你以為我真係日日都做唔晒啲嘢要放學做？我突登拖到放學做架白痴！」
「特登拖到放學做……嚟陪我？」
「講到明就晒氣啦……」
「咁你嗰陣成班八婆FD……以為你地鍾意聯群結隊一齊放學喺間房到邊做邊HEA嘛……」
「係，同嗰班友一齊畫嘢砌嘢係開心，但你無留意到我成日偷望你畫畫嘅咩？」
「我咁專心畫畫……」
「仲有學校旅行BBQ嗰次呢！我燒嘢俾你食喎！你咁都GET唔到？」
「以為你母愛氾濫……個個都有……」
其實我想講隻雞翼未熟……
「仲有好多囉！！！！你咁都GET唔到，我以為你同阿樂搞GAY呀！」
「哈……好多人都咁講……但仲有啲咩？」
「有一次考MOCK，數學科，你坐我隔離嗰行後一個位，嗰次份卷難嘅好難，易嘅好易，做晒易嗰啲之後仲有九個字剩，你唔見我係咁望住部計數機嘅咩？」
我諗一諗，佢應該講緊中五上學期嘅模擬考試，嗰次份卷簡直係戇鳩，易嘅部份連我都輕鬆做啱，難嘅部份真係無咩人識答，我做晒易嗰啲都剩返半個鐘，果斷放棄難嘅部份，用剩低嘅時間望住阿欣嘅後側面。
佢咁講一講，嗰陣佢又真係瘋狂望住部計數機，我仲以為佢係因為唔識做而諗住同機神祈求靈感降臨……
「哦……係呀，我記得呀……」
「我嗰陣咪就係用塊太陽能板嚟望你囉！」
仆街！呢一吓我如遭電殛！
如果話，佢係用計數機上面嘅太陽能板望住我，咁咪知道我成程都瘋狂望住佢囉！？
我呆咗咁望住佢，成個空間彌漫住怪異嘅氣氛。
「咁你咪見到……」我講。
「係呀！我咪見到你都發晒呆咁望住我囉！」
「咁你會覺得……？」
「我咪覺得你可能都鍾意我囉！」
「咁點解……你死都唔肯同我講？」我問。
「咁點解你又死都唔肯同我講先？我真係以為你同阿樂搞GAY呀！」
「呃……」我語塞。
「再講，就算我真係覺得你鍾意我，都無理由我講出口架嘛！俾咗咁多SIGNAL你你都唔識做！」
「呃……」
「我足足等等等等等等到中七放榜呀！白痴！」
「對……對唔住……」
「又唔洗講SORRY嘅，係我同自己鬥氣者。」
「咁點解當初……你會鍾意我？」我問。
「因為我鍾意聽周杰倫囉！」
原來如此……
「講笑咋！我係俾你畫畫時候嘅專注吸引住。同埋你嘅畫，都好有吸引力。」阿欣講。
「又話枯燥？」我問。
「就係枯燥先有吸引力！因為我實在唔知點解，一個十零歲、同我同齡嘅人會畫到啲咁枯燥嘅出嚟……嗰陣覺得你好特別。」
「哦……原來缺點都係一種優點。」
「係架！所以俾少少自信自己啦，周杰倫都幾靚仔丫！」
我嗰刻有少少想鼓勵嗰位USER NAME叫柒過周杰倫嘅巴打，柒過周杰倫，都唔係太柒者……
「嗯……嗯……」我將剩低嘅半杯單酒灌落肚，用嚟填補呢段青春嘅遺憾。
或者，有遺憾嘅青春，先至完滿。
呢晚，阿欣幫我嘅青春油返原本無存在過嘅顏色，令我呢段回憶更加甘甜。
原來，有人鍾意過我。