《香港革命戰》(上): [23-背後陰謀] PART 2
「你地黎左喇?」阿風把聲突然喺面前出現!
『點解你會喺道架?唔係...點解我黎左呢道架?』望一望四周，原來喺不知不覺間，跟住阿月行到黎阿風既實驗室...
「我有事搵你地嘛~咪叫阿月帶埋你過黎囉~阿月無同你講咩?」阿風打量左我幾眼...
我望一望住阿月...
「Sorry~唔記得左話你知添~」阿月伸一伸脷...
呢個時候，妳扮乜鬼可愛丫又...
『咁搵我地黎又有咩事呢?』我隨便搵個地方挨一挨…總係覺得...有D攰...
「大件事...」阿風一面嚴肅...
阿風好少呵會咁嚴肅...睇黎呢件事真係一D都唔簡單喎...
「尋晚，喺新西共鐵路站發生左恐怖襲擊。整個鐵路站被夷平...仲造成多人死傷...」阿風開出一個顯示器...
顯示器所顯示...係一個大窿?!
『雖然破壞力就真係好驚人~但係中共得罪咁多人，受恐襲又有乜咁出奇?』暴政總會面對呢D問題架啦~
人民長久受暴政壓迫，生不如死...唔暴動先係奇聞~
不過講真一句，呢種破壞力真係唔惹小!
一大個大窿...所有野都被徹底夷平...
就連一D碎片...瓦礫...塵埃都無...
係經過清理後既影像嘛?
講開又講，呢個大窿...有D熟口熟面...
「唔係咁…唔係咁…叫你地黎睇既，就緊係無咁簡單啦...」阿風擰一擰頭…
無咁簡單?
「你仲記唔記得，我之前有俾你睇過既...EVE同LILITH混合而成既炸彈丫?」阿風隻手指喺空氣中打左幾個圈。
EVE同LILITH混合而成既炸彈...
『哦!你係話你之前閃到我眼到盲咁制既模擬實驗!』我記得喇!
而家眼前呢幾張圖片，同嗰次既實驗出黎既效果，可以話係相當近似!
幾乎可以話係一模一樣...
咁講法則係...
「呢次既恐怖襲擊，正正就係用上EVE同LILITH混合而成既炸彈...」阿風點一點頭。
單睇圖片，確實係相當近似!
之但係...
『無可能...你唔係話過以而家既科技，仲未有辦法搵野同時載住呢兩種物質架咩?』我擰一擰頭。
雖然話我係一個科學白痴，但我都總算係有D記性。
「係…我係有咁講過...但科技係會不斷進步...而且係我地諗唔到辦法姐，唔難保有人比我地更快諗出方法呢?更何況，根據地獄既行者收集返黎既消息，爆炸之後既出事地點，的確出現大LILITH粒子瓦解電能...」阿風開出幾個顯示器...
顯示器裏面又有好多數據同圖形...
全部我都睇唔明...
不過久久都無出過一聲既阿月就好認真咁去睇...
『真係LILITH?』我問一問仲處於高度集既阿月...
「嗯...」阿月點一點頭，「仲有EVE粒子存在過既跡象...雖然好短時間...」
連阿月都咁講既話...
『係咩人做?可以同時擁有EVE同LILITH既人...元朗領域已經俾我地接收左...會唔會係天水圍領域?』除左我地，就只有天水圍領域最有機會...
「唔會...」阿風擰一擰頭，「雖然我唔知佢地既科技發展去到一個乜野既水平，但數據顯示，嗰邊既折疊之門已經有好長時間無打開過。」
『唔係天水圍領域既話，仲可以係邊個?除左我地SIPRIT之外，世上就再無人擁有EVE同LILITH架喇喎...』除左我地，無人仲會有...
「唔一定...」阿風再擰一擰頭，「EVE同LILITH既然會出現喺呢個世界，就有辦法再製造出第二個EVE，第二個LILITH...」
『下?』我唔係幾明阿風既意思...
「有一個太陽，就會有另一個太陽...唔只…仲會有千千萬萬個...世上既萬物都可以複製出黎...只要你知道個關鍵...」阿風點一點頭...
所有野都可以複製出黎?
「而再深入D黎講，EVE同LILITH都係可以被製造出黎。則係話呢個世界上，可能已經有人計算出製造EVE同LILITH既方程式都唔出奇。」阿風再點一點頭...
『真係有咁既可能咩?我地咁接近EVE同LILITH，用左咁多年時間都係研究唔到佢地既關鍵...世上仲有人可以研究到咩?』我有D唔係好信...
「好難講...」阿風擰一擰頭，「我地一直都覺得，EVE同LILITH仲有ADAM係神賜俾我地既未來科技。但假如真係未來科技既話，而家就到左未來...」
阿風既意思係話，而家已經到達左未來...
而家已經有人掌握到EVE同LILITH仲有ADAM既技術?
「阿月，妳嗰邊有無D乜發現丫?」阿風問一問仲好專心睇梗D數據既阿月...
「無…」阿月擰一擰頭，「INTRUDER裏面完全無呢方面既資料。」
阿風諗左一諗:「係丫?乜MINDER真係將呢次恐襲既資料，收得咁密實咩?」
阿月擰一擰頭:「唔係...可能係因為MINDER已經發現左INTRUDER一直Mount住佢，所以...睇黎INTRUDER已經無用喇...」
「咁大件事?咁則係話...妳都應該入侵唔到MINDER?」阿風一面驚訝。
「嗯...大約就得返一次機會...」阿月點一點頭。
「一次...」阿風靜左一靜…
大家亦都靜左一靜…
毫無疑問，阿月唔可以再入侵MINDER得到地獄既最真實消息，絕對係嚴重過呢次不明來歷既恐怖襲擊...
阿月係唯一最了解，亦係最接近MINDER既人。
假如就連阿月都唔可以再入侵MINDER既話，我地就再無其他方法得知MINDER既動向...
而打後既行動，就更加難實行...
「唔怕既~而家只係差一步~就係...」阿月仲未將要講既說話講完...
「等等先...」阿風將阿月既說話打斷...「李飛揚既名冊...啟動左...」
『咩話?』我有D唔係咁相信自己對耳。
「李飛揚既名冊岩岩已經啟動左!」阿風立即開左一個新既顯示器。
顯示器上面有心電圖...有血壓計...有座標...仲有...“李飛揚”三字大字!
係李飛揚手腕上既名冊，傳送過黎既資料...
「已經啟動喇...已經接通喇!我地可以見到李飛揚既資料喇!」阿風好興奮。
『估唔到，喺道都可以接收到名冊既資料...』我仲以為只有喺結界範圍內先可以接收得到...
「嗯~自從可以收到出面傳入黎既訊息之後，名冊亦都可以透過阿霖佢地既設備，將個人既資料同步傳送過黎!」阿風對眼發晒光咁望住李飛揚D數據...
而阿月亦都係一樣，眼定定咁望住D數據...
原來有D咁既事...
如果係咁，就方便得多!
李飛揚既行蹤....甚至乎情況都可以一目了然!
而家李飛揚既位置係喺...
望一望個地圖...我望一望個座標...
『新西共既西霸?』我望住李飛揚個座標...
阿風亦都望住個座標:「係喎...的確係去左新西共既西霸...而且...而家...而家佢開始離開...我地可以好清楚咁睇到佢既動向。但點解會喺嗰邊架呢?」
係咯…點解會喺嗰道啟動到名冊架呢?
要啟動名冊，就必定要有足夠既EVE能量...
咁講法...
『西霸有EVE能量存在?』我對呢點可以話係相當好奇!
先別論西霸距離呢道都有一段好遠既距離...
EVE一離開結界範圍，能量會立即耗盡...
根本就無可能將EVE能量由呢道帶到去西霸...
咁點可以解釋到，李飛揚既名冊會喺嗰邊啟動架呢?
除非...
「嗰道有原生既EVE能量。」阿風講出左我心裏既推測。
但係...
『除左我地呢道...仲有其他地方會有EVE既原核存在?』我困惑咁望一望阿風...
「有咁既可能都唔出奇...」阿月都點一點頭...
『唔係丫嘛…咁...會唔會都同我地既EVE一樣，係一個AI系統?』呢點值得留意...
因為如果有另一個EVE系統存在，我地會好麻煩...
接觸過EVE系統之後，我可以肯定佢係一個極不穩定既系統...
萬一另一個系統對我地唔友善，我地就大件事...
「係都唔出奇…之不過...先唔好諗得咁複雜...」阿風擰一擰頭。
唔好諗得咁複雜?
平時諗得複雜既係你地，但而家到我諗得複雜D，就叫我諗得唔好咁複雜...
「有可能係古時殘留落黎既EVE能量，被李飛揚腕中既名冊內既LILITH所吸引而誘發...」阿風諗左一諗...
『古時殘留落黎?』咩古時?
「你唔好唔記得，傳說係話嗰次既殲滅，唔係由解放軍引起...係一個中心閃住綠色五芒星既黑球...將所有野吞噬...」阿風注視住我...
『傳說係咁傳，之但係...』我仲未將我要講既野講完...
「所指既黑球，極有可能就係ADAM既原身。而閃住綠色光芒既五芒星，極有可能就係EVE既原身。」阿風將我既說話打斷...
『係…的確係有咁既可能...但係...我地都係聽返黎。真正係點，無人見過。更加無人可以解釋到由當年既西貢同當時既屯門、元朗、天水圍之間，中間有乜野關連。』歷史無記載過呢點...
「當年有好多人由西貢逃到去我地呢道。」阿風堅定既眼神盯住我。
『係~如果真係由西貢出現，咁佢地點樣帶EVE、ADAM同LILITH過黎?呢三樣野原本又係點既樣?無人知...而我地所知既，暫時最可以肯定既係，呢三樣野喺由我地呢道既地底出現。』雖然我係科學白痴，但我既記性真係幾好。
阿風合埋雙眼點點頭:「OKOK~我地都係唔好拉到咁遠~反正而家要面對既問題唔係喺原核既由來~而家係李飛揚既名冊已經啟動!下一步應該點做?」
老實講句，我對呢個傳說係極度反感!
因為呢個傳說既由來，係黎自陳星把口!
「我發現EVE、ADAM同LILITH既由來，好有可能係黎自新西共。」老豆帶左我上誡律之牆上，望向有陽光既世界。
『新西共?點可能丫?新西共黎我地呢道好遠好遠...一個東...一個西...點會接得上關係呢?』我望住有陽光既世界，睇起上黎好溫暖。
「遠近唔係一個問題。重點係2034年西貢暴動。」老豆望向遠方，更遠更遠既方向。
『2034年既西貢暴動?都成七十年前既事，有乜野關連呢?』我望一望個海，海面上好平靜。
「我懷疑嗰一次既暴動，最後唔係由解放軍炸平西貢...」老豆一面嚴肅...就好似平時既佢一樣...
『唔係解放軍?咁係邊個?』根據有限既歷史文獻記載，嗰次最後係由解放軍發動空襲，將西貢夷平架喎...
「係邊個就真係無辦法估計...但應該唔係由炸藥造成...係吞噬...」老豆指一指上空...
我抬頭一望...頭上係...係黑色...深淵一樣黑既ADAM...
『你係話係一種好似ADAM咁既物質吞噬左整個當年既西貢?無可能...咁大件事，無可能無人知...無人記載...』我擰一擰頭。
我係唔會相信無事實證明既推測!
「無野係無可能...喺呢一個年頭...所有事都會有可能發生...就正如一百年前，無人估到會有三合既出現...」老豆嚴厲既眼神，一直注視住我...
無野係無可能...一百年前無人會估到會有我地既出現...
無野係無可能...無野...
「阿日...喂…阿日!」阿風搖一搖我，將我由回憶帶返黎現實世界...
『下下?嗯?』頭先講梗乜野?
「我係問李飛揚既名冊已經啟動!我地下一步應該點做呀?專心D得唔得架...」阿風冷眼望一望我...
下一步…
『下一步…下一步應該係...同飛揚講黃金海岸就係通往SPIRIT既入口!而家就係時機。』我望一望阿月...
阿月既視線由顯示器中，轉到我眼裏:「嗯。」
機會黎喇...最後一次既機會...帶領李飛揚走入陷阱既機會...
“噹”一聲清脆既響聲，響遍成間實驗室。
面前隨即彈出幾個顯示器...
有幾個顯示器裏正顯示出一幅又一幅實時地圖...
又有幾個顯示器裏顯示出一D數據...一D圖形...
咩事?
「點會咁架?」阿風望住D顯示器，面容明顯緊張起黎...
『咩事?』我有種預感，唔會係好事囉...
「新西共有大量既LILITH粒子出現...仲有...EVE能量!係混合炸彈!」阿風大為緊張!
我望住個實時地圖，一個又一個藍色既圓圈出現...出現喺實時地圖上面...
『咩話?係尋晚恐襲嗰種混合炸彈?』我指一指住D圓圈...
「無錯!就係尋晚恐襲嗰種!不過...等等先...不過D成份好似有D...有D出入...今次既成份無尋晚嗰D咁誇張!」阿風望住幾個數據圖...
究竟係邊個...
究竟係咩人做架呢?
有咩人可以做到我地都做唔到既事呢?
『可唔可以Check下現場附近有無我地D人喺道?』我指一指住個實時地圖。
如果我地可以連接到李飛揚手中既名冊，照計就可以接晒所有喺地獄裏面執行任務既行者...只要手上帶住名冊...包括天水圍領域既!
「得得...你等等...LILITH粒子越黎越多，我地對外既連接就越黎越強...好快好快...全個地獄範圍既行者都接通晒...佢地既位置...所有既位置都一目瞭然!」阿風喺幾個顯示器上面掃下撳下拖下拉下...
究竟係咩人做架呢?
係邊個做既好事?
「接通晒喇!」阿風指一指個實時地圖...
顯示全個中國香港既實時地圖上，出現左一個又一個，好多好多個紅點...
紅點散佈喺唔同既地方...
呢D紅點就係我地既人...我地SPIRIT派出去地獄執行任務既行者...
「新西共有兩個紅點!」阿風指一指住顯示梗新西共既實時地圖...
『係邊兩個?』我亦將注意力放到喺新西共既地圖裏面。
「係…係…」阿風點選地圖上兩個紅點...「一個係李飛揚...另一個係...係...陳星!」
係…係老豆?!