《香港革命戰》(上): [23-背後陰謀] PART 1
面前係一大片藍色既景象...
好藍...好藍...
所有野所有野都好藍...
唔係…
面前乜野都無...就只有藍色...
呢D係...液體?
喺藍色既液體入面，我感覺到好凍...
好凍好凍…全身都好凍...
呢D藍色既液體係...LILITH?
我全身無一忽地方唔係俾LILITH包圍住...
點解我會浸喺LILITH裏面?
我完全無印象我點解會浸喺LILITH裏面...
我嘗試喺LILITH游下游下...
但喺LILITH入面，我根本就分唔到天南地北...
喺LILITH入就好似失重一樣...分唔到位置...分唔到方向...
點解...點解會...
“吱”咩聲?
“吱...吱...”呢D聲...
“吱...吱...吱...”又係呢D聲...
“吱...吱...吱...吱...”我個頭...
“吱...吱...吱...吱...吱...”我個頭好痛呀!
“吱...吱...吱...吱...吱...吱...”好似有好多針...好多好多針插入...我個腦...
『嗚呀...嗚呀!』好辛苦呀!
唔單止個腦...仲有手手腳腳…全身都好似俾針插咁呀!
『救命呀...救命呀!』我感覺到LILITH好似變左一支支針咁，插入我體裏...
點解...我身體...唔受控制...
好痛呀...但...又郁唔到...
『呀!!!!!!!!!!!!!』我不停發出慘叫...但成個空間，好似無人聽到我講野咁...
救命呀!救命呀...救...命...呀...
我已經唔得喇...實在太...太痛喇...
「哥哥~」呢把聲...
「哥哥~」呢把聲好似係...
「喂~哥哥快D醒丫~」係阿月...
「快D醒丫~我有事要搵你丫~」係阿月把聲!
眼前藍色一片既空間，慢慢化為灰色...分裂...飛散...
「哥哥唔可以咁懶架!快D起身黎搵我!唔好要我等咁耐呀~」當我再次清醒既時候，阿月既思緒岩岩就要離開我...
『喂…喂…』唉...呢個細妹...就係咁架喇~
係都要全世界就晒佢~聽晒佢話~跟佢嗰套先得既~
我都係岩岩醒咋嘛~俾多少少時間我去整理一下...梳洗一下都得掛?
岩岩醒…係喎…我頭先…發夢?
發夢既話...會唔會太過真實?
頭先嗰種痛既感覺...真係好似真既一樣...
點會咁架呢?
唔係話發夢唔會覺得痛架咩?
唔係…應該都係會有痛既感覺，但就唔會痛得咁厲害先係...
唔通...係精神液既影響?
定係因為尋日同前日都有同過EVE同步過既關係?
如果話係因為同EVE同步過既關係都好D...
起碼都唔會俾阿風煩住晒...
但如果係因為精神液...咁就麻煩得多喇...
俾阿風知道，分分鐘搵個大鎖返黎鎖住我都似!
唔得唔得，呢D咁麻煩既野，唔可以俾阿風知...
點都要瞞住佢...
唔駛幾耐架姐...我諗...
我諗唔駛過多幾耐，就可以踏入最後階段...
講就係咁講姐~而家係咩情況都未知啦~
所有野都係未知之數...前景仲要相當唔明朗...
我就真係放心唔落...
唉~都係唔好諗咁多~而家幾點?
眼前立即出現“下午1時47分”...
嘩!我又瞓左幾耐丫?
我記得尋晚喺醫院陪住阿月...
都係唔好諗住...快快手手梳洗一下，換件衫就去搵阿月~
唔係既話，一陣又要俾佢鬧...
沖個靚涼，簡單咁梳洗一下，換套衫，我就跟住綠色既導引線行。
尋晚我係幾點返到黎架呢?
又係幾點瞓架呢?
我只係記得，尋晚出完去買完個雲吞麵返黎俾阿月...我有陪佢食埋先既...
之後呢?
之後既事，我好似無乜印象...
當中既片段...記唔起...
我忘記左D乜野呢?
我地永遠都無辦法記得忘記左D乜...
仲有既係…我一直都無肚餓既感覺...
我好似...唔需要進食咁...
點解會咁...
睇黎精神液已經影響得我好深...
我既腦部神經...
我一直跟住條導引線行，行過幾條通道，行到入升降機入面。
“颼”一聲後，壓縮空氣閘門關上，升降機急速向下落。
向下落?睇黎阿月唔係病房裏面...
唔通...阿月又入左去INTRUDER?
呢個阿月，真係話極都唔聽!
升降機急速向下落，好快就落到去INTRUDER層。
“颼”一聲後，壓縮空氣閘門打開，面前就已經企左個熟悉既身影...
「咁遲架?想等到我變化石呀?」阿月翹住對手，谷起塊面豬登，嬲爆爆咁既樣望住我...
『我已經好快架喇...』大姐...你搵得我咁急，都要俾D時間我整理一下個人架...
「我已經俾左好多時間你架喇!」阿月推一推我，行左入升降機。
又邊個激親我地呢位大小姐呀...
“颼”一聲後，壓縮空氣閘門關上，升降機向上升。
「激死人啦...激死人啦...激死人啦...激死人啦...激死人啦...」阿月一企左入黎之後，口中就念念有詞咁唔知喺道噏乜...
我就緊係一於好少理，由得佢自己喺道發下皮四~
「激死人啦...激死人啦...激死人啦...喂!做乜唔問我有咩咁激死人呀?」阿月谷起塊面豬登，怒視住我...
『因為我唔想知囉。』我都知妳係想我問妳架喇...
「你而家想知!快D問我有咩咁激死人!」阿月搖左一搖我隻手臂...
『有咩咁激死人丫...』唉...算喇算喇...當順下D病人意喇...
「嗰個李飛揚呀!佢俾綽姿錫到面紅呀!」阿月谷到晒面都紅晒...
『係?李飛揚對綽姿有興趣丫?咁咪好囉~睇黎進展又順利左好多!」呢個算係關鍵既一步!
只有李飛揚對綽姿有興趣，咁就可以帶住李飛揚...仲有李軍...走去我地既計劃之中!
「好鬼呀好?我而家就唔慌唔慶喇!枉我仲為左救佢，差D連命都無丫!佢而家就識得同其他女仔風流快活!哼!綽姿又係既...駛唔駛走去錫飛揚丫...」阿月塊面又紅又黑咁...
所以話女仔既醋意係幾咁大...
『算啦算啦~綽姿都係做野姐...等等先...唔係喎...綽姿佢而家既身分應該係王嘉雯...記憶都係王嘉雯既記憶...』照計佢唔會對李飛揚咁主動架...
「綽姿有返自己既記憶啦~」阿月輕輕帶過...
『綽姿有返自己既記憶?幾時既事呀?點解我唔知既?』點會咁突然架?
「尋日既事咋嘛~我頭先先岩岩Check到~」阿月唔多在意...
『尋日既事?做咩唔早D話我知呀?』咁緊要既事，緊係要第一時間通知我喇!
“颼”一聲後，壓縮空氣閘門打開。阿月就行出升降機...
我跟住阿月身後...
「都話我頭先先岩岩Check到咋嘛~咪已經第一時間通知你囉~」阿月仲係唔多在意咁...
『咁名冊呢?李飛揚既名冊啟動左未丫?』如果啟動到既話，我地就成功左一半架喇!
「未喎!唔好再提嗰個李飛揚!」阿月怒氣沖沖咁行快多幾步...
未既話...則係隔離目標仲差一大折啦...
唉...都話左境外個講台唔夠力啟動晒兩樣野架啦...
而家啟動唔到名冊喇...就連阿月既容器都無埋喇...
咁而家點算呢?
可以點做呢?
仲有乜方法可以啟動到名冊呢?
等等...咪住先...
『你又入侵MINDER丫?我咪話左咁危險既野，唔好再做囉!妳都仲未好返架!要休息多D架!點可以又再去冒險架?』呢個陳月，就係唔聽人講既!
「我都無事啦~哥哥就唔好擔心咁多喇OK?」阿月轉一轉身，向我打左個眼色...「況且...睇黎都無幾多次機會...可以入侵到MINDER...」
『下?』一下子俾阿月突如其來既舉動嚇到俾唔到反應...
「經過前日之後...MINDER已經掌握到我既資料...只要我一連入MINDER，MINDER就會擦覺到我既存在...MINDER好有可能正計劃梗點樣可以一擊破壞我既腦部神經...而照我估計，只要再連接多兩次...兩次之內，MINDER就會計劃完成...所以...我就只有最後一次...以u.00.w既身分同飛揚溝通...」阿月面色一沉，點一點頭。
雖然唔係好明阿月講梗乜...
但阿月話只有最後一次...
最後一次機會以u.00.w既身分同李飛揚溝通...
咁則係唔可以再主動向李飛揚提供我地既資料...
咁講法...我地仲點引到佢過黎呢...
但又話分兩頭…
“引”好似已經唔係太過適合...
我地已經提供左好多唔同既資料，去提起李飛揚對我地既入口－黃金海岸既興趣。
我亦相信，已經有足夠既證據令李飛揚深信黃金海岸喺進入SPIRIT既唯一途徑。
所以打後要做既...應該係...
『直接話俾李飛揚聽，想入黎SPIRIT，就去黃金海岸!』而家要做既，就係要直接話俾李飛揚聽，去黃金海岸!
「下?」一直好似先知一樣既阿月，終於表露出無知既面容。
『最後一次以u.00.w身分與李飛揚聯絡既話，就直接話佢知...去黃金海岸!喺計劃開始之時，我地就話就算直接話俾李飛揚聽，黃金海岸就係通往SPIRIT既入口，佢唔會信。所以我地先要故弄玄虛，搞咁多花招令李飛揚對黃金海岸產生興趣。但搞左咁多野之後，我而家可以肯定，我地已經有足夠既情報令李飛揚相信黃金海岸就係通往SPIRIT既入口!所以...係時候...』係時候確確實實咁話俾李飛揚知!
「哦~原來係咁~飛揚既名冊已經啟動喇咩?」阿月冷眼望一望我...
ER…
『未...』唔記得左呢個重要既一點添!
「咁就算話俾飛揚聽，而佢又相信既話，仲帶埋李軍去黃金海岸喇~咁又點打開折疊之門既機關呢?」阿月繼續冷眼望住我...
ER…
又俾阿月將我一軍添!
點解咁重要既野，我都可以唔記得架...
「咁你塊面又唔駛咁難睇既~你都錯唔晒~最後一次，一定係要同飛揚講黃金海岸就係通往SPIRIT既入口!不過幾時講...就要睇時機喇~」阿月擺下擺下個身，繼續行...
時機?
究竟幾時先係岩既時機呢?
仲要等多幾耐呢?
我只希望，唔好太耐...
我唔等得幾耐...
唔好話阿月唔可以再入侵MINDER...連接MINDER...
我自己都唔可以再注射咁多精神液...
我既身體...我個腦...
身體可以同李飛揚交換~但個腦...
精神液最大影響既，始終都係個腦...
個腦受損，就無辦法修補...
所以一定要喺個腦被精神液侵蝕之前，完成審判程序!