《香港革命戰》(上): [21-爭分奪秒] PART 1
惡魔倒在殘破既大廈之上，大地上既奴隸都歡天喜地。
聖光由天上照到惡魔身上，出奇既係惡魔無被聖光所傷，反而得到治癒。
一位天使沿住聖光降臨到受重傷既惡魔身邊，憐憫咁摸一摸惡魔身上破損既傷口。
傷口被聖療之下得以癒合...
撐起惡魔翼既惡魔慢慢變成灰色...碎裂...粉碎...飛散...
當我再次睜開雙眼之後...
『又十二點幾?』眼前顯示出今日既日子同時間。
尋日同阿風由黃金海岸返左入黎之後，突然好攰，好眼瞓，連飯都無食就瞓著左。
一瞓又瞓左十幾個鐘，而家仲要一D肚餓既感覺都無。
唔好話唔驚...
精神液既副作用我唔係唔知，仲要好清楚。
我無肚餓既感覺係因為腦部神經受精神液影響...應該話受損...
再加上我既面色已經俾之前更加蒼白...
雙眼越黎越紅...
望住塊鏡裏面既自己都有D驚...
就算唔接受清洗，我唔可以再注射精神液...
好啦~我已經無得揀喇~
係喇，阿月呢?
又連接唔到...應該仲喺INTRUDER裏面...
我一定要搵搵佢先...
沖個涼，隨便食幾塊麵包，著返件衫，係時候走去INTRUDER搵阿月。
點解我無時無刻都會諗起阿月?
無錯，其實我好在意阿月。
我對佢可以話係一D信心都無。
總係覺得唔喺佢身邊睇住佢，管住佢，佢係會搞破壞。
所以最好都係無時無刻都喺佢身邊，等佢想亂黎都唔得。
“吱...依...”穿過黑色大閘門之後，好快就黎到INTRUDER裏面。
望住赤裸裸既阿月淹浸泡喺LCL裏面，究竟佢喺道做梗D乜呢?
阿月好似留意唔到我入左黎...唔係...
佢無可能唔知我入左黎，只係唔在意。
阿月唔在意我既存在，專心梗佢要做既事。
究竟有D乜野令到阿月無視一切?
究竟有D乜野令到阿月咁上心?
我諗答案就只有一個...李飛揚...
女人真係一種感性主導既生物呢~
所以我就話阿月係好危險就係咁解。
你永遠都唔會知佢幾時會因為感情煩惱，忍唔住要一下子就毀滅世界。
我都唔係吹水，我諗到左而家，都無人敢質疑阿月既能力。
接近神一樣既能力...
如果阿月係神，李飛揚係惡魔，咁佢地兩個生出黎嗰個...又會係D乜呢?
真係諗一諗都覺得可怕...
不過，而家諗又言之過早~
佢地仲有無機會喺埋一齊都係未知之數~
企左埋道牆好一陣子，阿月都仲係無乜意欲想行返出黎。
都唔係問題，只要佢唔喺試圖用意識直接連去MINDER就無問題。
MINDER…
究竟MINDER既成長速度有幾高?
而成長到去邊個地步，亦都係一個重要既問題。
以阿月提及過既說話分析，MINDER既成長速度比預期既快。
我相信，MINDER既自我意識已經接近人類。
如果係咁就真係危險...
我地交MINDER既設計俾地獄嗰邊既時候，係計算喺佢未成長到接近人類之前進行審判。
即係大約喺兩年前就已經完成審判程序。
嗰陣時既我地既技術無咁成熟，對AI既認識都唔係咁深，所以設計出黎既AI存在住好多缺陷。
呢D缺陷唔係會導致佢唔識得運作，相反係過份運作。
MINDER係有機會推算出控制人類先係保護人類既最好方法。
我地初初預計就算到左審判之日來臨，MINDER都未有足夠時間成長到超越人類既地步。
但因為三年前俾解放軍同國安局發現到阿月既真正身份...
所有既原來計劃都被打亂!
而家MINDER已經多左兩年時間成長。
以AI既幾何級數成長既速度，恐怕...
MINDER係整個審判程序既工具，萬一…
“吱”當我仲喺道盤算梗之時，壓縮空氣管裏既LCL開始由氣孔排出，變成無數藍色粒子，飄到圓形既空間之中。
阿月喺管內睜開雙眼望一望我。
要我等妳咁耐，終於肯望我一眼喇咩?
我向住壓縮空氣通道行過去...
雙眼望住壓縮空氣管裏面，雙眼注視住仲浸泡喺液體裏面既阿月...
當LCL完全由壓縮空氣管排出後，“颼”...壓縮空氣管亦都解除。
阿月赤裸裸咁行到壓縮空氣通道上面，面帶笑容咁用雙手輕輕撥弄一下秀髮...
『睇妳笑得咁甜，妳嗰個李飛揚一定無事喇~』我將一件黑色長袍穿到阿月身上。
「嗯~佢尋晚已經醒返~咦~睇黎哥哥入過INTRUDER之後，都有讀心能力喇喎~」阿月整理一下黑色長袍後，仲要恥笑一下我。
『邊係呢，係我太了解妳。』唔講都唔記得左阿月有讀心呢種邪惡既能力...
咁頭先我所諗既野，阿月咪知道晒?
死喇...我頭先諗左D乜係唔可以俾阿月知架呢?
「扮晒野丫你~我尋晚已經話左飛揚架喇~我諗佢以後都唔會亂黎。」阿月甜絲絲咁笑咪咪...
一講到嗰個李飛揚，阿月就係咁既樣...
『係就最好。唔係次次都咁好彩救得到佢。』有咁好彩都未必會救佢。
今次佢真係好大命，唔係阿月話你有危險，加上無啦啦俾我睇到你既影像...
係喎…
『阿月，點解妳會知道嗰個李飛揚會有危險既?』我都唔記得左問。
「我?應該點講呢...」阿月向住門口方向行。
『照直老實回答。』我跟住阿月身邊行。
「乜我平時好唔老實咩?原來哥哥係咁睇我既~」阿月谷起塊面...
『我唔係咁既意思...』我係信唔過妳囉...
「咁我唔答你~」阿月繼續向前行。
行出主腦室後，“吱...依...”身後黑色大閘門再次關閉。
『喂~唔好借D易喎~』唔好以為我唔知妳籠野丫~妳又想隱瞞一D重要既情報咋嘛!
「好喇好喇~是咁的，當我地尋日行返去控制中心既路途中，行行下我個突然劇痛起黎!我好似聽到好多吱吱聲...眼面又有好多EVE粒子飛過...就算我點樣合埋眼都仲係好光...」阿月一直喺黑色既通道裏面向前行，一邊碌大對眼望住我。
一樣...阿月既情況同我遇到既係一模一樣...
「當我個頭痛到就黎爆既時候，眼前突然強光一閃!我見到眼前既影像係喺架車入面...我第一眼望落去就可以好肯定，我喺飛揚架瑪莎拉蒂入面!我可以好肯定...」阿月將佢對大眼仔再碌大D。
阿月亦都係同我一樣，接左入李飛揚個腦入面?!
「而且我仲見到佢正追梗我地用作擄劫行動既白色輕型貨車!」阿月再撐大佢對大眼仔。
一模一樣...我同阿月所見到既野係完全一模一樣!
「我嘗試過郁動一下身體，但無論係手手腳腳乜都好，都係郁唔到...」阿月擰一擰頭。
『我都係喎!』我都係想郁都郁唔到!
「哥哥都接左入去飛揚個腦裏面?!」阿月又碌大對眼望住我。
弊!唔小心透露左口風添!
唉...算啦...反正阿月要知，總有佢既方法...
『我都同妳一樣見到妳頭先所講既一切...但阿風話呢種無可能係連接...』我連阿風講過乜都講埋出黎添...
行到入升降機入面...
「阿風話無可能姐，但我就話有可能喇...」阿月好認真咁諗左一諗...
『但係...』我都仲未講完...
「喺我未試過有咁既經歷之前，我相信我都會好似阿風咁講話無可能。但當我親身體驗過之後...我好肯定我喺入左飛揚既意識當中...」阿月眉頭一皺...
『妳有咩證據去支持妳既觀點?』我亦都眉頭一皺望住阿月。
「憑我直覺。」阿月皺住眉頭...
直覺?!
呢個時候竟然同我講女人既直覺?
有無搞錯丫?
如果妳對住阿風講話妳直覺覺得有可能同李飛揚意識連接，佢會點講?
以阿風呢D乜鬼都要數據支持既瘋狂科學家性格，實大大力反對!
『咁則係無證據去支持喇?』我冷眼望一望阿月。
「由我把口講出黎既野就係證據。」阿月冷眼望一望我。
好似好有道理喎...
阿月講既野本身就係權威黎架啦~
阿月講既野有邊次係唔岩先得架~
阿月係最接近神一樣既人丫嘛~
阿月...阿月...阿月...阿月...阿月...阿月...阿月...阿月...阿月...阿月...
有時我真係覺得阿月自大得可怕...
升降機一直向上升，升到上...G樓?!
『我地而家要去邊丫?』一直跟住阿月，都唔記得問要去邊。
「去食野囉~」阿月咪咪嘴笑左一笑…
『食野?又食?』點解同親阿月一齊，好似成日都係食架呢?
「好肚餓啦~哥哥唔肚餓係因為你個腦就快俾精神液吞噬姐~但正常人如我係會肚餓架嘛~」阿月谷起塊面...
咁講法則係話我唔正常姐...
「我已經約好左阿風架喇~嗱~阿風都到喇~喂~我地喺呢邊丫~」阿月向我身後揮揮手。
「喂~阿月~阿日~今日又帶我去食乜好野丫?」阿風離遠迎面跑過黎。
點解一個二個喺亂世之下，喺危難之時，喺險境之中都可以咁輕鬆架?
同阿月、阿風走出控制中心，走向人民區域方向。
阿月話要帶我地去食意大利粉，點解呢個阿月可以仲咁有心情掛住食?
「係唔係真係咁好食架?」阿風好有興趣咁追問阿月。
『梗係好食啦~我介紹得既會有唔好食架咩?』阿月繼續得得戚戚。
點解連阿風都係咁...
呢種算唔算係七罪宗中既貪食?
由幾時開始，就連我地屯門領域都變得腐敗架?
又由邊道開始感染架呢?
我唔知!
但我可以肯定源頭一定係黎自阿月!
阿月個心靈根本就唔純淨。
喺佢修行既時候，我應該早就知道。
阿月一遇上任何問題、困難、考驗都係用上佢既小聰明解決。
甚至係邪道...
阿月之所以能夠修成先行者，唔係因為佢有純淨既心靈，係全靠佢既機靈...
咁講法...睇黎行者階梯並唔完美，當中存在住極嚴重缺陷...
睇黎有機會既話，真係要研究下可以點樣修補...
「哥哥~出得呢就放鬆D啦~唔好成日都諗野好唔好?」阿月冷眼望一望我...
『係係…』死，又唔記得喺結界範圍內，思考係唔安全…
唔可以俾阿月知道我諗乜...
唔可以俾阿月先下手為強...
「登登登登~就係呢道喇~」阿月帶我地黎到一間以彷木製建築既意大利餐廳。
復古風格?
估唔到原來人民區域會有呢種設計...
「哥哥~唔好企喺道驚訝啦~快D入黎啦~」阿月同阿風都已經推門入去。
入到去餐廳，裏面既設計都係用上彷木及米白色為主。
與我地平時身處既控制中心真係好唔同。
安坐喺彷木古典凳上，摸一摸米白色既檯布...
「哥~個感覺係唔係好特別呢?」阿月對我莞爾一笑。
的確係好特別，呢種色調配搭加上彷木質感，總會令人有一種溫暖感覺。
同我地本身黑黑綠綠既冰冷感覺形成強烈對比。
阿風摸一摸張木凳:「呢種設計真係唔錯，不過要製造出彷木材質就要花上較大量既LILITH...唔多化算呢~」
阿月谷起塊面:「唔好下下都用數字去量度價格好唔好?有時感覺都好重要架~」
阿風接住答:「係~的確感覺係唔可以用數字去量度~但妳都唔係唔知我地LILITH真係少到去到一個危險既水平...」
阿月又接住講:「我當然知~但放心喎~而家都算叫做進展順利丫~」
『咁都叫進展順利丫?尋日先遇到意外咋喎...』我忍唔住要質疑下阿月。
阿月鬆一鬆膊頭:「無問題~無問題~完美修正~」
咩野叫完美修正?
犧牲左三個行者、一個偽EVE聚合反應堆、仲有一支沒藥救返個差D無命既李飛揚都叫完美修正?
阿月用食指掂下掂下自己個嘴仔:「好彩我同飛揚心有靈犀姐~」
係喎!都唔記得左呢件事...
『阿風~阿月話佢都接通左嗰個李飛揚既思緒!你點睇?』我拍一拍阿風。
「阿月都係咁?」阿風打量一下阿風。
「係丫~我肯肯定嗰陣時我係同飛揚接通左思緒...唔止...比接通思緒更深層次~」阿月點一點頭。
阿風仔細打量阿月:「連阿月都咁講...」
我又打量下阿風:『喂!你唔係話呢種事係無可能發生架嘛?』
阿風諗左一諗:「係…我係有咁講過...之但係如果阿月咁講既話...」
點解阿月講就係架呢?
我真係好唔明，點解阿風咁聽阿月支笛...
阿風由細到大都同佢老豆致力研究SPIRIT既科技，論科學知識，阿風應該高過阿月多多聲...
但點解阿月對EVE既了解，好似俾阿風仲要多?
究竟阿月同EVE有乜關係?
「一個卡邦尼意粉~一個波菜煙三文魚意粉~一個墨魚汁魷魚意粉~請三位慢用~」一名侍應懷著愉快親切既心情，放低三碟意粉。
「唔該晒~」阿月雙眼發光咁望住D食物。
D食物當然就係阿月自把自為為我地下既決定啦~
不過又好似已經習慣左咁...
反正我又真係幾想食波菜煙三文魚意粉~
「阿月真係好~知我鍾意墨魚汁魷魚意粉~太滾動啦~」阿風眼有淚光咁望住碟墨魚汁魷魚意粉...
駛唔駛咁誇張丫...
阿月揮一揮手:「你唔好愛上我丫~我心有飛揚~」
阿風送左個冷眼俾阿月:「妳自大好喇~唔好自戀丫~鍾意妳嗰個真係有自殺傾向...」
『哈哈哈哈~阿風對阿月既評論，最岩都係呢句~』終於都似返正常既阿風~
阿月冷眼望一望我地兩個:「食野喇咁多野講~早知唔幫你地揀...做好人無好報...」
同阿月、阿風出黎人民區食Lunch，感覺上變得好輕鬆。
好似，所有野都唔再重要。
只要好好享用面前既美食就足夠。
呢種算得上係一種逃避嘛?
我唔敢承認...
因為如果我真係認為算得上逃避，我地就只會一直逃避落去...