小毒魔法狂想曲: 012 地下工廠
「門口個兩條友真係唔洗等我出去收佢皮？你唔驚佢地會搵到黎咩？」說話的是一個穿著深藍色斗篷單膝跪地的男子，而在他面前的是位坐在一個寶座上的白衣女子。「雷，呢啲咁少既事都要煩我？你自己搞掂佢！又話個咩陰山迷陣好勁既？」「好啦，我會處理架，你唔好嬲啦。咁岩奇虜都去咗睇下個進度，我叫埋佢去。」說完男子便轉身走了。
秘道入口，只有二人闊度的通道正有一對男女肩並肩前進著。「噗通！噗通！」我感覺到我的心狂跳著，自回復單身以來也未試過和女生如此親近過，彷彿還能聞到艾蜜莉身上的香水味。但同時過往的一些和雲妮的回憶卻湧上心頭，可謂百感交集。我不斷在心內提醒自己：「冷靜啲，呢個時候更加要打醒十二分精神！」沿路走來地道也是一直筆直的朝城堡走，估計現在應該位處城堡底下的中央。突然我好像聽到一些聲音，「叮！叮叮！」是鐵器的敲打聲。我示意艾蜜莉停下來並消除了照明用的火球。「叮！噹！噹！⋯⋯」敲擊聲依然有規律地響著，我閉上眼憑聲辨位，大約向前二十多米。我指示艾蜜莉退在我後方前進（作為男仔保護女仔是本能吧，雖然佢好似勁過我的說。），走了數步便碰到了石板。盡頭了？ 電影情節一般在這關口也會有機關的，我心想。
正想著要艾蜜莉用火球的時候，卻聽到有人在談話：「把野仲要搞幾耐先做好呀？雷大人等得唔耐煩啦！」（以下對話皆為英語，用中文寫只為方便讀者及遷就作者英語能力）「奇虜大人息怒呀，慢工出細貨架嘛！呢把刀差不多完成啦，今日之內一定交到比你地！」
「好，咁你地而家放飯，食完返黎同我死掂佢！」好好的幹嘛要提食？我感覺到我肚子已發聲抗議。「咕！」「咕！」咦！為甚麼有兩聲的？我側身望向後方，儘管環境暗淡，但仍隱約可見艾蜜莉的臉蛋全紅了並露出尷尬的神情。
「咩聲！」那個叫奇虜的人大喊。該不會因為肚子不爭氣而暴露行蹤吧！同時我感覺到一隻滑溜的手掌突然緊握著我手。哈！原來女神也有膽小的一面。「回大人，可能係老鼠姐。」其中一個工匠回答。「哦，咁好心你地注意下衛生啦！我走啦，快手快腳整好佢呀！」緊隨的是一陣急促的腳步聲。確認奇虜走遠後，我才剛鬆了口氣，那工匠的下一句卻又嚇我一跳。「地道入面個位小兄弟，出黎啦！我地唔會害你。」說著我面前的石板便緩緩移開，眼前出現的是一個大工場和數位老年男人。事已至此，我也沒有其他的選擇，拉著艾蜜莉的手便走出來。
「你又知唔係真係有老鼠？老伯你又點解要呃你老闆既？我點解要信你地唔會點我？」我決定先發制人，一發現有不妥便出手打暈他們再說。「細路你冷靜啲先，我地真係唔會害你架。首先呢個荒島黎架嘛，無啦啦邊度有老鼠出現喎。係個班痴線佬先信既姐。仲有，啲聲由地道傳出黎架嘛！係呢，你同你女朋友都係魔法師係咪？」「我唔係佢女朋友呀！」「無錯。」我二人同時答道，但是回答的重點好像卻不同。只見老伯們聽到我表明魔法師身分後好像看到救星一般，展現崇拜的眼神。