[真人真事][校園][純愛]《婚宴上的重遇》: 第八十章

話說嗰陣係夜晚嚟
我就喺屋企戇居居咁樣上緊網
突然之間我個電話響,
咁我就去望下邊個打嚟啦
之前都講過,
好少人會咁夜打俾我
之後我望一望個來電顯示,
有啲熟口面,
但又唔知係邊個
因為我冇set佢名,




但硬係覺得好似見過呢個冧把咁樣
咁之後我就聽啦,
我:「喂 」
xx:「我同你講,
若凝依家就喺機場
就嚟走架喇,
佢要去英國讀書,
短期內都唔會返嚟
想嚟見佢就去機場啦.」
我:「等陣先




你係邊個呀 」
xx:「之前若凝成日借我個電話打俾你
之後佢仲喺我部電話入面set埋你個名
咁樣我先有你電話 」
原來呢個就係若凝個好姊妹
唔怪得我覺得個電話熟口面啦,
之前若凝間唔中會用呢個電話打俾我
我:「你講咩話 」
xx:「若凝要去外國讀書
短期內都唔會返嚟,




佢依家就嚟check in
想嚟見佢就去機場客運大樓啦 」
我:「你講真呀 」
xx:「廢話梗係啦
你估依家玩緊呀
我唔想我好姊妹成日都愁眉苦臉,
我亦都知佢唔會特登打俾你
所以我先靜靜雞行開搵你,
嚟唔嚟自己決定啦,
係咁.」
之後佢就收左我線,
大佬依家發生咩事呀
一時之間話若凝離開香港,
又話去外國讀書,
我點樣消化




但係照計又冇理由吹水丫
佢唔似啲咁無聊嘅人
不過話時話,
若凝之前好似冇同我講過,
話會去英國讀書,
不過冇同我講都唔出奇丫,
我又唔係佢邊個
之後我繼續上網,
上左三個字到,
唔知點解,
我嗰一刻好想見到若凝
我好似嗰一陣先接受到,
若凝係要離開香港,
短期內都唔會返嚟
去定唔去好呢




去嘅話就前功盡廢,
唔去嘅話,
會唔會遺憾一世呢
我嗰陣真係好亂
仲諗緊去唔去好,
跟住我成個腦都係以前同若凝一齊嘅畫面,
開心又有唔開心又有,
依家講緊佢有排都唔會返嚟,
讀書起碼幾年啦
原來瞇埋眼嘅時候,
腦海入面嘅畫面全部都係關於若凝,
就係因為咁,
我已經知道點揀喇

跟住我就同呀媽講話我要出去機場




然之後就跑落去樓下,
因為已經遲左幾個字,
已經冇時間再俾我嘥
一路跑一路諗,
反正都係一次,
搭的士啦
好彩之後我見到架的士,
跟住就二話不說飛去機場
上一次搭的士,
就係因為要陪若凝
今次搭的士,
同樣都係因為若凝
嗰陣我個心好急
好想快啲去到機場,
喺個心入面係咁叫個司機快啲快啲,




已經唔會考慮安全嘅問題
但係老實講,
其實我當時係一次都冇去過機場
幾經辛苦終於去到,
要去客運大樓,
去到我先發現,
原來係有一號客運大樓同埋二號客運大樓
究竟係邊個先啱
跟住我就周圍問人,
當然係問職員啦
我:「我有個朋友去英國,
我想知佢喺邊度 」
職員:「佢check左in未呀 」
我:「我唔知呀 」
職員:「咁你快啲聯絡佢 」
之後我就打俾若凝,
冇開電話
然之後再打俾佢個好姊妹,
今次有開電話但係冇人聽
跟住我決定跟住嗰指示牌,
不斷喺一號客運大樓同埋二號客運大樓之間搵若凝
可能嗰陣啲人都以為我係傻嘅
我一路快步咁樣行,
一直都見唔到我想見嘅樣,
我冇記錯係嗰度搵到起碼有半個鐘以上
直至到佢個好姊妹打返俾我,
我:「若凝喺邊度呀 」
xx:「佢好快就check左in喇,
依家已經上左飛機,
點解咁遲呀 」
我:「你講真架 」
xx:「係呀,
我見住佢入去,
明明我都唔係好晏打俾你
點解遲咁多先到 」
唔通我同佢講,
話我諗左好耐先決定去咩
最後我只係話:「因為塞車,
咁唔該晒你喇拜拜.」
收左線之後,
我就搭返巴士返屋企,
當然我要極力控制情緒,
因為始終都仲有好多人
我唔想喺咁多人面前暴露最真實嘅情緒,
一路搭車一路望風景,
我個腦就喺度諗若凝同我呢一年幾兩年嘅片段,
由我唔知佢叫咩名
去到最後同我喺grad din入面影相,
全部野都好記得
落左車我冇即刻返屋企,
坐左喺樓下嗰個公園度,
因為嗰度夜晚好靜冇乜人
喺嗰一刻我先知,
自己根本就冇可能忘記到佢,
由頭先喺屋企聽到佢要去英國讀書,
一路直至到依家,
我個腦全部都係若凝,
一齊食車仔麵,
平安夜一齊出嚟,
打俾我同我講生日快樂,
之後仲專登叫我去商場,
原來係送波鞋俾我,
佢唔開心,
挨住我膊頭喊,
自己講大話激嬲左佢
但係最後都因為我輸左班足,
冰釋前嫌
行過嚟安慰我,
喺佢生日嗰陣,
幫佢揀蛋糕順便試味,
同佢一齊去迪士尼,
仲有好多好多嘅野,
邊有可能忘記到
係我自己太戇居
以為自己好醒,
諗住一路唔見,
就可以放低佢,
我真係錯得好緊要,
如果當初我唔係猶豫,
或者我可以趕到去機場見佢
就算到時見唔到都好,
都起碼冇藉口,
但係依家唔係,
真係好憎自己,
成日都做好多無謂嘅野,
原來我一直都係喺度自欺欺人,
人唔跌過真係唔知痛,
我依家真係知點解喇,
我起碼會有三四年見唔到佢,
甚至我地以後會變陌路人,
自己真係完全唔了解自己,
低估左對若凝嘅鍾意程度
之前佢喺度嗰陣,
我就扮晒野,
懶係瀟灑咁樣,
唔行過去搵人
到依家佢真係走左,
先至知道扮瀟灑原來係有代價
想搵都搵唔到,
呢個代價真係太重,
承擔唔起,
我永遠都記得嗰一晚
坐喺公園係咁喊,
係咁打自己大髀,
喊到三四點先至返屋企,
沖完涼上到床,
第二朝個枕頭都仲係濕晒,
嗰一個感覺.