[真人真事][校園][純愛]《婚宴上的重遇》: 第七十三章

返到屋企就即刻開電腦上面書,
跟住唔使問阿貴就去左若凝個相簿度睇,
睇下之前喺佢個相簿入面見到嘅嗰個男仔
亦即係佢個初戀男朋友,
係咪我頭先喺公園見到嘅嗰個男仔,
卒之我搵到佢張相
一張若凝同佢個初戀男朋友一齊影嘅相,
兩個人笑得好開心
老實講識左若凝都成年幾,
我都真係未見過咁樣笑




佢個初戀男朋友好野,
我用左一年幾時間,
都唔可以令佢好似喺相入面咁樣笑,
嗰個男仔就得
心服口服,
冇野好講
跟住我再望望下,
好似有啲似我啱啱見到嗰個
定唔知係我主觀意願,
覺得頭先嗰個係佢男朋友,




所以就覺得似
睇完之後跟住即刻熄啦
嗰陣我坐喺度諗,
原來自己已經沉左船,
以前我話過,
做唔做到男朋友冇乜所謂
最緊要係可以陪住佢,
佢開心我就開心
我到今時今日先至發覺,
其實我都係一個好自私嘅人




見住佢同第二個男仔一齊,
我個心都仲係會乸住乸住
佢唔係皮外傷嗰隻痛,
而係入心嗰種,
兩種痛完全唔同
皮外傷過幾日就好返,
入心嗰種唔係,
佢冇時間限制,
永遠都唔知幾耐先會好 ,
我真係做唔到所謂佢開心我就開心
冇咁大方
做男仔,
有邊個唔想係自己令鍾意嘅女仔開心,
而唔係睇住佢開心先得架,
自己鍾意嘅女仔開心,




但係,
係由其他男仔賜予俾佢嘅,
個心真係有少少痛
我以前以為自己冇
諗住自己係一個好灑脫嘅傻仔
點知原來連自己都估錯自己,
連自己都唔熟悉,
又點會熟悉若凝呢?

跟住我就搵左呀成傾
其實就唔係叫春,
我邊有呢個資格
其實大家真係朋友關係,
要叫春都唔輪到我叫啦
咁樣跟住我就同呀成講晒我見到嘅野,




或者喺嗰陣,
我需要一個朋友
俾我去訴苦又好乜都好,
講開又講,
真正嘅朋友,
就係當你需要一個人嘅時候,
佢就會行出嚟
大家自動自覺,
唔需要講多餘嘅野,
真心朋友,
有時一個已經夠
呀成:「咁你依家想點 」
我:「我都唔知,
好煩 」
有一樣野我冇同各位講,




其實我原本有個諗法,
就係既然嗰排我同若凝行得咁密,
我係曾經有諗過,
會唔會同佢有發展嘅空間呢
不過依家成盤冷水兜頭淋
已經唔敢再諗啦
始終都係唔會夠初戀男朋友鬥,
初戀就係初戀,
硬係會有個光環喺度
咁樣我就照直同呀成講我有呢個諗法
呀成:「乜原來你地唔係架 」
我:「梗係唔係啦 」
呀成:「我以為你地已經發展到男女朋友
只係你條蛋散冇同我地講 」
我:「我都想 」




呀成:「其實你有冇問清楚佢係咩事 」
我:「點問得出口
同埋係我親眼見到,
應該唔會假啦 」
之前若凝講到佢個初戀呃佢,
又話已經唔鍾意個初戀男朋友,
咁點解今日會咁
我好想問清楚若凝,
但真係唔知點樣開口問佢
呀成:「你依家想點 」
我:「依家冇架喇
仲可以點 」
呀成:「你一定知你自己想點,
我就唔信你冇諗法 」
呀成原來都真係好了解我
明明我都冇講,
佢都知我係有諗法
我:「你應該知我好鍾意啦.」
呀成:「梗係知啦,
由你麥當勞嗰個年代開始,
講到依家
梗係知你條友有幾鍾意人地 」
我:「唔講唔覺我都鍾意左佢好耐,
亦都識左佢好耐
照計有發展嘅話,
一早應該有發展 」
呀成:「咁樣女追男又難啲嘅
你有冇暗示俾佢聽你鍾意佢 」
我:「冇呀 」
呀成:「一係你依家試下同佢講囉.」
我:「依家講仲有乜用
佢個初戀男朋友已經搵返佢,
同埋唔知係咪我錯覺,
我從來都覺得佢對我係冇感覺 」
呀成:「乜真係咁
咁你依家想點先 」
我:「其實我頭先諗到我想點做 」
呀成:「咁就快啲講啦 」