[真人真事][校園][純愛]《婚宴上的重遇》: 第六十章

之後就放新年假啦
呢個新年假冇乜特別
若凝同爸爸媽媽去旅行,
我就自己喺屋企毒
如果唔係嘅話就同呀成佢地出去行下或者打機
都冇乜特別野好講
係有一日佢臨上機前打左俾我
若凝:「依家上機啦 」
我:「有錢真係好
又去旅行 」




若凝:「又唔係我搵到錢
同我講都冇用 」
我:「巴閉啦 」
若凝:「要咩手信呀 」
我:「你話事啦
不過最好食得嘅
因為上次嗰件唔食得 」
若凝:「一日到黑淨係掛住食 」
我:「你唔係 」
若凝:「女仔唔計 」




我:「咁男仔都唔計 」
若凝:「男仔女仔都唔計
咁樣咩野先計 」
我:「係囉
低能 」
若凝:「真係走喇
返嚟搵你啦拜拜 」
我:「拜拜 」
之後佢喺開學前嗰一兩日就返左嚟,
有一日仲專登約我出嚟俾手信我




坐喺個公園度,
若凝:「呢盒朱古力真係好好食
特登買返嚟俾你 」
我:「係咪伏嚟 」
若凝:「試下先啦咁多野講 」
食落去幾好食
若凝:「點呀會唔會太甜 」
我:「就係鍾意佢夠甜
幾好食 」
若凝:「冇買錯呢 」
我:「冇
不如我地兩個喺度食埋啦
唔想拎返屋企 」
若凝:「你屋企人唔食朱古力嘅咩 」
我:「佢地唔食




同埋唔想拎返屋企
因為呢盒野都唔輕 」
若凝:「死懶鬼 」
我:「我認
所以就拿拿臨食晒佢唔好煩 」
若凝:「既然你講到咁,
我就勉為其難食左佢啦 」
屋企人唔食朱古力係真嘅
但老實講,
我又點會因為呢盒野重,
所以唔想拎返屋企丫
我雖然唔係大隻
但未至於話拎一盒朱古力都嫌重咁孱
其實我只係想睇若凝食朱古力嗰個滿足樣
你地可能唔知啦,




佢食朱古力嗰陣個樣係特別唔同
有時會塞到個口脹卜卜
有時會好論盡,
整污糟左件衫
佢個樣就會好唔忿氣
但一將舊朱古力擺落口,
又會冇事
咁樣嘅佢真係好搞笑
呢啲一定係同佢一齊食先會見到.

放完新年假
返到去學校
又繼續上課的日子
之前都有講過
一年大約會考四次考試,




第二個同第四個係大考,
第一個同第三個係普通考試,
嚟緊嗰個就係第三次
雖然話就話係普通考試,
不過都要溫架
同埋一考完就會放復活節假
所以好多同學都會喺嗰陣係咁溫書
因為一考完就可以放鬆,
同埋其實我地好快就會中七
得返一年左右就考a-level
喺嗰一期我地都冇乜點樣大轉變
幾乎日日都係差唔多,
有時可能會陪若凝放學,
大家都仲記得,
我同佢係班會嘅宣傳人員




有時放學都要留低傾班會
當然都仲係好多狗公煩佢啦,
若凝又真係夠膽死拒絕
如果我唔係同佢咁熟,
我會以為佢係嗰啲串串貢
平時唧都唔笑嘅人
佢條友對外同對內真係兩個樣嚟
有時我都問佢,
點解咁嗰陣
佢都淨係答班狗公好煩
同埋唔想俾到誤會佢地
所以就咁樣,
去到三月嗰陣,
臨考試嗰一兩個禮拜,
我同若凝都有去返之前嗰個圖書館溫書
基本上已經變左一個習慣
溫完就去直接食夜晚嗰餐,
但都仲係未試過,
喺我地住緊嗰條屋邨嘅嗰間麥當勞食
真係搞笑,
因為佢仲係怕見到,
當日同佢一齊做嘅人
之前佢咪講過自己去完旅行返嚟就懶,
求求其其話要考試就唔做
嗰期嘅日子過得好順利,
無憂無慮,
其實真係幾好
大個左你就會發覺,
咁樣嘅日子真係好正