[真人真事][校園][純愛]《婚宴上的重遇》: 第三十二章

星期日夜晚,
我一早on左面書
等若凝上線
佢尋晚講左,
話今晚講聽朝幾點喺茶記等
今次唔會唔記得
果然等左一陣之後,
佢就即刻online左
若凝:「仲以為你未on添 」
我心諗點會未on


尋晚已經衰過一次,
仲點會唔記得
當然啦,
我邊會咁大膽咁樣講
我只係話:「咁啱開面書睇啲野啫
又咁啱你搵我 」
其實我自己都喺度諗,
講真話係咪真係咁難
你估我唔想直接同佢講
係呀,我等你on,


咁樣到時你搵我嘅話,
我咪可以秒覆,
順便可以如我所願,
同你傾計囉
大家都知啦,
傾計真係好講氣氛
有時可以即時覆同埋唔可以即時覆係兩回事
即時覆係可以帶動個氣氛
但係唔知點解,
我真係唔夠膽咁樣講


成日都扮作漫不經心咁樣,
又唔係型喎
但就係唔知點解要咁樣做,
總之唔想俾若凝知道
我係為左佢先至長on面書,
係咪毒男都係咁樣嘅呢
講返個對話先,
若凝:「又真係好多咁啱喎 」
我:「係架 」
若凝:「聽日七點三喺樓下嗰間茶記等好冇 」
我:「冇問題呀 」
若凝:「你唔使瞓耐啲咩 」
我:「唔使,
我以為你要添 」
若凝:「從來唔賴床 」


我:「女仔會唔賴床
打死都唔信 」
若凝:「咁你可以死喇
真係唔賴床 」
我:「冬天呢 」
若凝:「冬天唔計 」
我:「你返去瞓啦
話左點會唔賴床 」
若凝:「我就唔信你冬天可以話醒就醒 」
我:「的確係唔可以 」
若凝:「好難架知唔知呀 」
我:「係你自己話唔賴咋喎
我從來冇講過 」
若凝:「係咩 」
我:「你自己碌返上去睇喇 」


若凝:「唔碌嚕
瞓覺啦 」
我:「早抖 」
若凝:「早抖 」
其實有時同若凝咁樣傾計真係好開心
佢條友又唔認輸,
成日都要拗
但係又唔乞人憎喎
你知啦,
有啲人咁樣真係好乞人憎
但係佢唔乞人憎不特止
仲幾可愛
就咁喺面書傾計,
已經諗到佢鼓埋泡腮個樣
不過可能係我主觀啫


第二個嘅話我就唔鍾意架啦.

第二朝我就準時去到茶記
老實講,
其實我朝早啱啱醒嗰陣係食唔到好多野,
中學到依家都係
飲一杯咖啡都已經好夠
同埋咁早起身,
你話唔辛苦就呃你嘅
我都係用意志力去醒
不過既然若凝叫到,
我先冇拒絕咁解啫
又或者咁講,
根本我搵唔到拒絕嘅理由
冇錯我的確係想瞓多陣,


朝早亦都食唔到一個茶記早餐,
要夾硬食先至食到
但呢啲所謂嘅理由,
根本就唔硬淨
就好似今日咁,
若凝叫我食,
我就已經去左茶記
係咪我太易俾人動搖
可能係啦,
定其實係太易俾若凝說服
我都唔清楚,
咁樣若凝喺幾分鐘之後就嚟左
我地就入左去坐低,
我淨係叫左一杯奶茶,
因為真係唔肚餓
若凝就叫左一個常餐,
叫完野食之後,
我:「真係冇遲到喎 」
若凝:「講左啦
係你唔信咋嘛 」
我:「又唔好講到唔信咁誇張
我係唔信你嘅話,
就唔會咁早到啦 」
若凝:「聽落好似好有道理
你朝早食咁少夠喇
一杯野飲咋喎 」
我:「夠喇,
朝早食唔到咁多野 」
若凝:「竟然係咁
不過我都有聽過有啲人係咁,
仲以為你想減肥 」
我:「本身都唔肥
冇需要 」
若凝:「咁你講丫嘛,
搞到我好似搵左你笨咁樣
咁早叫你出嚟 」
講完之後佢申一申脷,
之後仲笑一笑
真係不得了
呢個笑容,
世界上冇乜邊個人可以匹敵
已經值回票價啦,
我:「唔緊要啦,
鬼叫應承左你咩
又係自己返到去冇記性先嘅 」
若凝:「你真係丫,
都唔知話你咩先好 」
我:「應承左你嘛 」
若凝笑左一笑講:「嗯 」
承諾,
又有幾個真係可以講得出做得到?