[真人真事][校園][純愛]《婚宴上的重遇》: 第十章
返到屋企,
我個腦就有好多疑問

點解若凝會無啦啦轉校

係咪佢考得唔好

所以原本間學校唔收留佢

咁其實佢係幾多分呢

亦都想問佢,
點解做做下麥當勞會唔見左

又唔知佢有冇幫我買手信呢

老實講,
其實我覺得冇買係好正常

正常出嚟社交,
你估話幫你買代表真係買咩

有時候,
講同埋做係兩樣野

可能佢只係信口雌黃啫

同埋最緊要嘅係,
依家打定底,
俾自己一個心理準備

到我真係知佢冇買嗰陣,
起碼個心會冇咁傷丫嘛

講到尾其實都只係我擔心佢冇買啫

咁多問題,
等我聽日一次過問佢先

今次我真係記得問喇,
如果坐我隔離都唔問,
咁幾時先問

第二日返到去就直接上左班房

等左一陣,
若凝終於返左嚟,
佢朝早個樣一樣咁靚

簡直係零死角,
若凝:「早晨.」
佢竟然會主動講早晨

有修養

唔錯唔錯,
正如我之前所講,
有外在美之餘亦都有內在美

當然啦,
認真講句,
其實好多人朝頭早都會同隔離嗰位講早晨

不過我就係無限放大呀

吹咩

我:「早晨

不過我留意到,
若凝朝早係冇乜野講

可能嗰腦未開

一到小息後就會特別多野講

咁佢朝早冇乜野講,
我都費事問佢啦

本身我自己都一樣,
朝頭早真係少啲野講

所以我完全明白唔想講野但又係咁俾人撩傾計嘅感受

我一定唔會煩佢,
小息之後就唔同喇

正當我準備問嗰陣,
班主任就話呢個時候要搞班會啲野

我地學校就咁嘅,
要喺開學半個月內做好壁報

校長到時檢查如果發現未做好就成班一齊受罰

所以我地要盡快傾好班會,
乜人做乜位

傾完之後就要傾壁報,
結果我又要等一陣先問

之後傾好晒邊個做主席,副主席嗰啲野,
我以為完啦

頂佢個肺原來仲有好多位,
嗰啲乜野總務,財政,宣傳,文書原來都要搵同學做

老實講,
選唔係問題

唔好揀中我就得

第一呢啲野好煩

唔好煩到我

第二我亦都冇咁多時間

你話要我放學留低喺度做乜做乜

最好就唔好啦

冇計天生比較懶

聽人講班會任何位置都係好多野做

你估我仲細咩

英雄感咁重

乜都要做,
我已經過左呢個時期啦

依家最重要就係唔好煩

每一日安穩就得

之後成班狗公話宣傳要搵個靚女去做,
最頂癮嘅係

連班主任都覺得係咁樣

咁聰明嘅讀者們你應該知係邊個做宣傳個位啦

唔使問就梗係若凝啦

全班最靚捨佢其誰

其實我估若凝都唔多想做,
因為佢係咁話唔識做

個樣又有少少徬徨咁樣望住我

似係想搵我求救,
但係你估我好似動畫嗰啲男主角咁樣咩

會幫佢出頭咩

我邊有咁嘅吉屎

所以我都係靜靜地咁樣望住佢陰陰嘴笑

唔係講笑,
佢咬住唇好徬徨望住我嗰個樣好可愛

好彩我定力夠

咁佢見到我笑就特登都碌大對眼啤住我

可能想話我幸災樂禍啦

但老實講,
群眾壓力你估咁易克服咩

如果幫我出頭,
咁其他人就知咩事啦

中學生傳緋聞都幾慘,
特別我呢啲毒勁就更加唔鍾意

因為我唔識應對丫嘛,
再加上其實我真係鍾意若凝

咁就最麻煩

所以我就冇出口,
之後若凝舉手,
佢問可唔可以搵多個同佢做一齊做宣傳

一嚟佢唔識點樣做,
二嚟佢都唔係好熟呢間學校,
所以想搵到過嚟幫手

靚女叫到老師梗係一定應承啦,
同時間仲有好多男同學自薦,
呢班死狗公真係呢

出晒面,
就算盲都可看到

唔知佢揀邊個呢,
你問我有冇自薦埋一份

咁就梗係冇啦

雖然話同佢一齊做係好爽,
可以再親近多啲

但係基於我實在太懶

同埋要親近佢唔只得呢個方法,
所以都係不了

呢個時候,
若凝就開聲:「我想搵呀行一齊做呀

坐隔離方便照應丫嘛

miss得唔得呀

班主任:「你都講得啱嘅

坐隔離係會方便啲

之後若凝對返住我陰陰嘴笑

好似回禮一樣

若凝呀若凝,
我真係俾你害死.