[真人真事][校園][純愛]《婚宴上的重遇》: 第九章

之後我地落左去禮堂進行開學禮
大家都明架啦,
呢啲係開學嘅基本儀式
其實我到呢一刻都唔係好信佢做左我同班同學
因為實在太戲劇性,
之後我特登搣自己大脾
嘩好乸痛
咁應該係真架啦,
落到去禮堂,
我地嗰班喺禮堂個座位安排係男仔一行女仔一行




女仔係坐喺男仔前面,
若凝坐左喺前面嘅右手邊,
基本上我全程都係望住若凝
呢個咁靚嘅側面,
我好好彩咁樣,
可以成個學期都有得欣賞
唔記得之前有冇同大家講過,
我地學校啲老師就好懶
特別去到高中之後,
基本上成年都唔會調位




除非個別同學要求要掉去邊個邊個位
而坐喺原本嗰個位嘅同學又肯掉,
咁先至會調位,
如果唔係,
如果唔係就會由九月坐到下年七月放暑假
所以點解當初若凝坐我隔離會興奮成咁
就係咁解喇,
都見到若凝好快就同女同學傾熟左,
大家都有講有笑
同我呢個小毒毒完全冇得比




交際手腕強過我好多,
小毒毒即係小毒毒
不過就未見到若凝同男同學有啲咩交流,
但係我好肯定班狗公好想有進一步嘅行動

之後就返上去班房開簿同埋開file
預備新一季嘅功課
同埋填下時間表,
同一般中學冇乜分別
原本想傾埋班會嗰啲野,
即係嗰啲乜q野主席,副主席,財政,總務等等
但係班主任話聽日有一堂班主任堂,
時間充裕啲,
咁就留返聽日先傾
大家都知架啦,




開學第一日係好早放
咁去到十二點零左右就響起放學嘅鐘聲,
之後若凝無啦啦跌左個筆袋落地下
仲要跌落我附近
咁我梗係幫佢執番啦
正常禮貌嚟,
之後我就話:「你嘅 」
大鑊
失誤呀失誤呀
因為太過情急嘅關係,
我唔記得左壓沉把聲
用返原本個把聲同若凝講野
正當我喺度抱怨自己之際,
若凝:「終於唔扮聲喇咩 」
我嗰陣已經無言以對




若凝:「你真係當我傻
你呀,
嗰陣日日嚟麥當勞食野
日日嚟都算喇,
仲要次次都係嚟食同一個餐
坐同一個位
點會唔認得你
仲要我地係有傾過計
下次揀過第二個呃啦 」
我:「都係同你玩下啫 」
若凝:「本來睇死你忍唔到笑架喇,
點知你又忍到喎
不過最後都係自爆 」
我:「 」
若凝:「冇野講呢嘻嘻 」




我:「今次係我自己失誤咋 」
若凝:「錯喇,
本來我都想喺放學之前拆穿你 」
我:「好似好叻咁喎,
都唔知係咪馬後炮 」
若凝:「梗係唔係啦,
本身認人有一手
你搵錯人玩喇嘻嘻 」
估唔到原來若凝一早已經知
等我仲以為我可以成功呃佢,
唉,
對住若凝始終都係觸摸唔到佢
從來都係會失預算,
由幾個月之前已經係咁樣,
去到今日都仲係咁樣




失敗,
之後我要去同呀成佢地食飯
所以就先行離開,
我:「至叻係你喇
走先喇拜拜 」
若凝:「拜拜喇
傻~仔 」
今日,
係佢第一次叫我做傻仔
中六生涯嘅第一日,
若凝意想不到嘅出現,
改變左我嘅中學生活
今日嘅我回想起,
的而且確,
如果冇左若凝,
我嘅中學生活同依家相比
一定會好唔一樣,
無論啲回憶係開心抑或係唔開心都好,
我都好慶幸我個腦裝住左佢地
呢點係從來都冇改變過.