[真人真事][校園][純愛]《婚宴上的重遇》: 第五章

之後第二日我又去左麥當勞
唔使問梗係想一邊睇女一邊溫書
咁我一上到去麥當勞,
果然見到女神喺度,
咁我梗係二話不說
行去佢嗰條隊嗰度買野食,
終於排到我喇
佢見到我嗰陣,
就展露左一個「你又嚟呀」個樣出嚟
我嗰陣又唔敢咁大聲笑




費事俾佢以為我係痴線佬啦係咪先
但老實講真係好開心
又或者咁講,
邊一個毒男,
見到女神同你講野嗰陣,
係會唔開心先得架
跟住佢問我:「係咪照舊 」
咁我打死都話係啦
可能佢見到我孭住個書包
所以佢就問我:「又嚟溫書呀 」




我:「係呀,
聽日考 」
佢:「加油呀 」
女神再一次幫我加油
戰鬥力激增
咁我拎餐嗰陣,
我見到我個盤上面多左一包薯條
咁我梗係好似黑人問號個樣咁
當然啦,
我明明冇叫多一包薯條,




點會無啦啦多左一包
之後女神細細聲同我講:「私人醒架
溫書冇野喺個口食下唔得嘅 」
講完之後佢仲要笑左一笑
大佬呢個樣點頂呀
最緊要嘅係,
眼前其中一包薯條係女神私人醒
同平時食嗰啲完全唔同
真係好感動
可能誇左少少嘅
但對於一個毒男嚟講,
美女私人醒啲野俾你係一件好難得嘅事
更何況嗰個仲要係女神
一個雖然唔係見得好多次,
唔係識左好耐,




但喺個腦時時刻刻都出現嘅女神
之後佢可能見到我溫書,
又或者其實唔係好想理我呢條友
佢都冇行過嚟,
咁我亦都順理成章溫書
應付最後一科--生物,
不過喺我臨走前,
佢見到我執野
用口型同我講多聲拜拜
咁我當然用返口型同佢講拜拜啦
呢次係我第一次同佢講拜拜,
女神好可愛呀
人又靚,心地又好,
不過再諗深一層,
呢啲人會冇男朋友丫




唔好玩啦,
女神嘅野,
從來只係可遠觀而不可褻玩
我係好深信呢個道理.

考完生物,
淨返嘅科目只係得口試
意味著我唔可以再用溫書呢個藉口去麥當勞親近佢
我諗都係得我一個咁低b,
咁唔捨得考試
鬼叫我想親近女神咩
所以之後我就好似之前咁樣,
隔幾日去麥當勞
就唔係日日去,
費事俾佢見到




以為我真係一個痴漢啦
我就係咁樣
對住啲愈鍾意嘅野,
就會愈保守
愈怕失去
其實人地可能唔放你喺心上
你日日去又好,隔日去都好,
根本就對人地冇影響
係我自己多心啫.

咁有一日我都係照舊去左麥當勞,
當我食緊脆辣雞腿包餐嗰陣
我見到女神拎住個地拖
周圍拖地
拖拖下,




佢走左埋嚟同我傾計
女神:「你成日落嚟食野嘅 」
梗係啦,
我想見到你丫嘛
但我當然唔會咁講
我:「係呀,
住得近落嚟好方便 」
女神:「哦原來係咁.」
我:「你呢,
我見你好似成日都返工 」
其實點會係「好似」成日都返工丫
我日日都望佢,
佢擺明係每一日都有返
但我梗係要咁樣講,
加埋啲「好似」「應該」等字眼,
等佢覺得我唔係成日都mon住佢
費事俾佢以為我係痴漢啦
女神:「係呀,
想搵多啲錢嘛遲啲去旅行
同埋喺屋企冇野做 」
一聽到去旅行,
我又好想問佢係咪同男朋友一齊去
但再細心諗下,
其實佢同邊個去唔係好關我事
同埋其實同佢唔係好熟
呢啲問題唔方便問,
所以最後都係冇問到
我:「正喎去旅行,
去邊度呀 」
女神:「多數去日本呀 」
我:「有冇手信先 」
女神:「你個人咁貪心嘅
啱啱識就話要手信 」
其實我梗係唔係想要手信啦
不過我係想藉住咁樣同佢傾多陣計咋嘛,
可能女神冇講錯,
我真係有少少貪心
我:「講下笑啫 」
女神:「咁我都係講下笑啫
買手信都唔係好麻煩
預埋你一份 」
我:「多謝呀 」
女神:「我返去做野先,
費事又俾人咋形
拜拜 」
我:「拜拜 」
哎呀,
我又唔記得問佢讀邊間中學
唉,
又要等下次再問過.