[真人真事][校園][純愛]《婚宴上的重遇》: 第四章

跟住同之前一樣,
冇乜分別
都係成日去麥當勞望住佢咁樣
我知你地想鬧我毒架喇
搞錯呀,
日日淨係咁樣望
冇行動嘅咩
講真,
你估我唔想咩
但係我唔知可以點做丫嘛


如果我無啦啦行過去撩佢,
佢陣間以為我係狗公,痴漢咪死
咁大家個距離就更加遠
雖然依家都唔係近架喇
但係點都好過佢以為我係狗公掛
如是者,
每日都係咁樣做
每次我行過去櫃面買脆辣雞腿包餐嗰陣,
佢都會快我一步
問我係咪食脆辣雞腿包餐飲可樂


而每一次,
我都係笑笑口咁樣話係
之後佢用返微笑嚟回敬
佢呢個微笑真係好靚,好甜
我同佢之間就好似有個默契咁樣,
佢會知我係食脆辣雞腿包餐
當然啦,
呢啲所謂嘅默契其實都係我自己ff
我冇親口問過佢
因為真係好淆.



之後有一日,
我帶埋本生物書去麥當勞嗰度溫
點解咁樣
我冇記錯的話,
因為當時距離生物開考嘅日子好近
我好記得當年生物係星期四考
嗰日係星期二
正常咁樣我應該留喺屋企溫書,
但係我又傻傻地咁樣好想見到女神
所以就把心一橫,
將本書帶去麥當勞
嗰間麥當勞好在夠靜
同埋嗰日係閒日,
唔擔心會好嘈


梗係啦,
我呢個星期成日去嗰度
靜同嘈我會唔知
所以我就帶埋啲生物碌屎去溫書
咁當然啦,
無啦啦坐喺嗰度好怪架嘛
好似呃櫈坐咁樣
所以我最後都係去左買一個脆辣雞腿包餐
食完之後就溫書,
咁樣好似心安理得啲
唔錯唔錯
溫溫下書,
當然少不免會抬一抬頭望女神啦
佢專注收銀嗰陣個樣好靚,
其實我好鍾意見到啲女仔好認真做野個樣


做乜都冇所謂,
只要佢好全神貫注就冇問題
以前初中,小學都係
見到啲靚女好專心咁樣作文,
我都週不時會望住佢地
覺得佢地咁樣好有形態美
咁樣今次仲要係女神,
咁我梗係睇實佢啦
但係都唔可以望咁耐
萬一俾佢發現就唔好,
所以我都係溫一陣就望一陣
正當我溫溫下嗰陣,
突然我身邊有一把聲出現
呢把聲我好熟,
因為最近一個禮拜,


我聽過好多次,
同時我又覺得好震驚,
因為我估唔到,
呢把聲個主人,
會主動撩我傾計
咁究竟呢把聲係邊個
仲使問嘅
就梗係女神啦
佢撩我傾計呀
咁到底係傾乜
依家會講架喇,
女神:「你係今年會考生嚟架 」
我:「係……係呀 」
冇計,
小毒毒就係咁樣


當女神一開口同你講野嗰陣,
少不免會窒口
女神:「我都係呀
你溫緊乜野呀 」
我:「生物呀
後日就考
你讀咩科呀
唔使溫書嘅 」
今次你地唔好鬧我喇
我竟然可以成功問返佢
女神:「我讀文科架,
啱啱考完最後一科中史喇 」
我:「係咩,
有冇信心呀 」
女神:「麻麻地啦
加油啦唔阻你喇 」
我:「嗯,多謝 」
原來女神係同我同一屆,
我都依家先知
佢同我傾完計之後,
成個人充滿精力(唔好諗邪野)
好有幹勁
當然你可以話我係傻仔
不過都唔會理,
我真係估唔到女神會同我傾計
哎呀,
唔記得問佢讀邊間添,
算啦,
總有機會嘅
下次再問過.