《病港》: １８３

「唔‧‧‧你哋會幾時走？」明雲轉問。


「應該喺夏晴醒咗之後。」


「好。」


「上去吧，你應該有病人要睇？」我也不阻撓明雲太多時間了。他是醫生，責任大很多。






「其實係嚟睇一位精神科病人，因為聽主診醫生講‧‧‧佢好似對倖存區呢到有啲陰影，所以我想睇下有咩可以幫到佢。」


「Sona‧‧‧？」


「醫生都好似咁叫佢‧‧‧‧‧‧」明雲疑惑地問：「你識佢？」






「算識。」


「咁就好，你得閒就一齊上埋去？有咩事，都可以有個照應。」明雲說。


「都得‧‧‧」






如是者，我便跟明雲上到Sona覆診的地點。

精神科診所是末日中很重要的一部份，因為人類的陰影，很多時會在這種惡劣的時代產生，如果得不到適當的開解，整個社區都會變得危險。


「明雲醫生！」一入去，坐在診所沙發上的小孩便齊聲呼喊。


「各位小朋友！今日食咗飯未？」明雲展現慈祥的笑容。


「食咗～～！！！」小孩們快樂地回答。


「呢到咁多細路精神有問題‧‧‧‧‧‧」我愣著橫視。






「唔係，佢哋有啲其實係正常，不過佢哋都應該好難適應，所以都慢慢幫助佢哋接受呢個社會。」明雲說。


「你依個醫生，同我哋大本營以前嗰個真係差得多‧‧‧」


「各有各好～」明雲微微一笑，說：「我記得康城倖存區兩年前都受過你哋大本營恩惠‧‧‧你哋嗰位主診醫生Dr.D，救咗我哋好多因為流感而差啲死嘅人。」


「咁又係～有時有啲嘢‧‧‧‧‧‧」我點頭，回想起奮戰到最後一刻的不破尚：「唔可以單用一方面去睇。」


「啱，好人同壞人，邊有分咁多。」明雲比我更確信這一點，說：「世界上無絕對嘅好人，都無絕對嘅壞人。」

「嗯，總之你就係救人。」


明雲的表情怔了怔，說：「笑話嚟‧‧‧？」


廢話一論，我們才正式入到Sona覆診的醫生房。


「之後你放心，我哋會安排一個單位你居住，慢慢幫助你融入康城倖存區。」我們開門進去，看見風流醫生正對Sona，說。


於是，風流醫生順勢介紹Sona身後的我們：「後面嗰位就係明雲，我哋倖存區嘅領導人。」






Sona緩緩地轉頭，望向身後的人。


「‧‧‧」殊不知，這下對望使她再次露出那張畏懼的臉孔。


就連明雲也愣著了，有那麼一瞬間呆著。


「你‧‧‧」Sona慢慢後退，清瘦的小腳更開始軟起來，站立不穩。


「‧‧‧」明雲也有些不知所措。






「Sona‧‧‧？」風流醫生用安慰的語氣試著問。


「唔好埋嚟‧‧‧‧‧‧」Sona按著頭部，苦不堪言地退後。


「明雲醫生‧‧‧佢好似‧‧‧‧‧‧有啲驚你‧‧‧‧‧‧」風流醫生難為情地說。


「明雲‧‧‧？」我拉一拉他的膊頭，讓他先出去。


明雲自己也神魂未回的，在走廊外愣著。


「你識佢？」我覺得，他們之間有些關連。


「佢‧‧‧係我兩年前‧‧‧‧‧‧」明雲難以啟齒地說：「曾經‧‧‧‧‧‧視而不‧‧‧救嘅女仔‧‧‧‧‧‧」


「兩年前‧‧‧？」


明雲按著前額，悔恨地說：「我嗰陣‧‧‧無將佢係地獄救出嚟。」


「‧‧‧」


「我冇勇氣‧‧‧去阻止我老豆佢做嗰件事‧‧‧」明雲低著頭，咬牙切齒：「我一直好後悔‧‧‧好後悔‧‧‧‧‧‧」


明雲在說，當年KTV館發生的事？那麼‧‧‧‧‧‧


Sona當年對門外求救的人，就是明雲嗎。


「佢係地位好高嘅領導人‧‧‧‧‧‧冇一個人敢反抗佢‧‧‧」


「咁你父親仲喺唔喺到。」我問。


明雲搖一搖頭：「已經唔喺到‧‧‧‧‧‧」


「咁你，就去離補當日嘅過錯。」我把收在黑袍內的鳥嘴面具，給了他。


「‧‧‧‧‧‧咩意思」明雲抬起頭，望著面具。


「既然已經係過咗去嘅事，咁再喺到苦惱糾結都無用。」


「‧‧‧‧‧‧」


「戴上佢。」我把鳥嘴面目帶到明雲的臉上。


「噫‧‧‧」


「入去，好好咁講聲對唔住。」我想，明雲也不敢用真面目去面對Sona。


「咁樣點得‧‧‧‧‧‧」


「行。」我把他推入去房間。


但明雲還是退後出來，把面具脫下：「我始終‧‧‧‧‧‧」


「拎嚟‧‧‧」他猶豫不決，我只好自己來。


我把鳥嘴面具戴上後，回到房間中。


「鳥嘴先生‧‧‧‧‧‧！」Sona一見到戴著面具的我，便馬上走過來，將我抱緊。


這一點，我也是意想不到的。


「我好驚‧‧‧我好驚‧‧‧‧‧‧」聽她的聲音，幾乎想哭了。


「佢冇傷害過你，亦都唔會傷害你。」我說。


「我知‧‧‧我明啊‧‧‧但係我‧‧‧我始終‧‧‧‧‧‧接受唔到‧‧‧我一望到佢‧‧‧嗰個人，我就控制唔到自己‧‧‧嗰日所有負面嘅情緒都好似返緊嚟‧‧‧‧‧‧」Sona痛苦地說。


「戴住佢。」我把鳥嘴面具，交到Sona手中。


「咁你‧‧‧」



「送俾你。」


我把鳥嘴面具，交到去Sona的手中。


「但係咁樣‧‧‧咁樣‧‧‧‧‧‧」Sona望著我的五觀，說：「我根本睇唔清你‧‧‧！」


此時，風流醫生在我耳邊低聲地說：「佢仲未完全康復‧‧‧仲係好驚對人、好怕接觸陌生人，所以喺佢個腦入面，外界嘅人五觀都只係一片好模糊嘅白光，係睇唔清個樣‧‧‧‧‧‧呢個係佢大腦保護自己嘅心因性機制。」


「你意思係‧‧‧‧‧‧佢睇唔到所有人嘅樣？」


「係‧‧‧我唔知點解明雲係除外，我唯一可以確定嘅係‧‧‧‧‧‧」風流醫生解答下去：「佢話見到鳥嘴先生嗰陣，就好似見到個人咁，可以望得好清楚。」


「Sona，你依家睇唔清楚我‧‧‧唔緊要。」我為她戴上了鳥嘴面具，說：「總有一日，你睇得番。」


「‧‧‧‧‧‧」


「股起勇氣，任何人都好‧‧‧點都要股起勇氣。」


而明雲亦低著頭，充滿悔疚地走入房間，向Sona致歉：「對唔住‧‧‧‧‧‧當日‧‧‧當日，我冇股起勇氣‧‧‧‧‧‧去救你，對唔住‧‧‧！」


「你原諒佢？當然，你有權拒絕‧‧‧」我說。


原本畏懼非常的Sona開始平復下來，面對明雲的道歉，她久歷思索之後，最終都接受了。


至於他們，以後怎樣相處，就要看兩人的做化。


我能幫的，只到這裡。


步出診所時，我聞聞外面的空氣、望望天上的白雲，沒有發覺，原來大家距離都這麼近。


小小的倖存區中，滿載了數不盡的故事。


由大本營、不良人、艾寶琳、到最後的康城，我都似乎走了好遙遠的路。



「M‧‧‧你個面具？‧‧‧見你冇帶幾日。」碰巧，我在街上遇到少佐。


雖則，其實康城倖存區也不是很大。


「已經‧‧‧送咗俾人。」我答。


「你唔驚俾熟人發現？」


「既然我都鼓起勇氣‧‧‧‧‧‧叫人去面對陰影，咁我再匿喺個面具後面，都冇乜意思。」


「你諗住‧‧‧‧‧‧」


「係～認到就認。」我說。


「你捨得？」少佐他淺淡一笑，說：「你都已經戴咗好耐。」


「有需要嘅，遲啲再整一個就係。」我說。


「咁你之後‧‧‧會返嚟大本營？」


「我仲有事要做。」


少佐點頭：「嗯，我都知留唔住你，出咗鳥籠嘅鷹，點會鐘意繼續留喺個籠入面。」


「你明就好。」我更不想自己有天病發，會死得像個垃圾一樣在你們的面前。


「係咁嘅話，返到大本營之後，我有啲嘢俾你睇。」少佐凝重地說：「係我哋接收不良人據點嗰陣‧‧‧‧‧‧搵到嘅一條錄影片段。」


「錄影片段？」


「我講過，不破尚係飛虎隊。所以佢哋執行任務嗰陣，某啲隊員嘅槍或者頭盔都會附帶住錄影機，去錄低當時情況。」


「我知。」我有看過，外國某些軍人打仗時，也會在槍械上裝配錄影機。


「段片，正正錄低咗佢哋飛虎隊同一隻‧‧‧‧‧‧恐怖嘅生物對打時嘅情況。」少佐一邊回想，一邊說：「而錄影日期，正正係香港人開始變成病者，爆發病毒嘅前夕。」


「嗯？！」


「但我冇去調查或者分析咁多，所以我諗‧‧‧‧‧‧既然你都係周圍走，可能你會有興趣。」少佐說。


「返到之後，帶我睇下。」


在我們話題要結束之際，少佐提議一起去廣場的燒烤區吃點什麼，當是好好的聚聚餐一次，我同意了。


但當我們一邊燒烤時，一邊閒聊著各自的趣事時，旁邊燒烤爐的兩名中年男人和一名女人，卻暗地裡對我們指指望望‧‧‧‧‧‧


「你識佢哋？」少佐留意到了。


「唔識。」我說。


然後，他們知道被發現後，便雙雙走到來我們面前。


他們一出聲，才得知對方三人都是中國人說普通話的：「先生～」他用著不屑的語氣，對我說。


「唔？」我應該不認識他才是。


「我給你一千塊～你能走遠點燒烤嗎？」他問。


「點解？」我反問。


「你不覺得，你的樣子很嚇人嗎？」他不屑地說：「離我遠點～你們兩個的衣服看起來這麼破爛，是怎樣啊？」


「我哋今日只係嚟聚餐，你冇必要咁講嘢。」少佐說。


此時，另一名女子走過來，說：「嘻～你兩個窮傢伙，康城高級技術顧問你聽過吧？！你們面前的華哥，可是裡面的高級技術顧問，跟明雲領導十分相熟！」


那名叫華哥的，默默地笑了笑。


「還有！這雙皮鞋你看過嗎？」那中年女人強迫我們望向那名華哥的貴皮鞋，說：「可是用很多個月對康城的貢獻換回來，你花多少年才換得起？」


「關咩事‧‧‧」我跟少佐也一面愣然。


「這隻手錶你見過嗎！！？」華哥忽然舉起手腕，特顯出自己戴著的精工錶：「是我為康城工作了一年多，用貢獻值換來的！你這輩子也換不起！」


「‧‧‧」


「還有還有‧‧‧‧‧‧！」那女人馬不停蹄地，把放在自己那邊的單車，也突然推了過來：「這是華哥的「寶馬牌」自行車！是華哥上班的專屬代步工具，沒這樣的地位你一輩子也騎不起！！」



「‧‧‧‧‧‧」我和少佐也不知回應什麼好了。


「你看看你們這遜樣！除了吃、喝、玩樂還玩做什麼？對世界有貢獻嗎？對人民有貢獻嗎？你看看你們混得怎麼樣！！一點出色也沒有‧‧‧！」


那女的，再插一嘴：「最近我們華哥接收到明雲領導一項大重任，就是跟大本營的領導合作，而我們華哥將會是其中一位技術顧問～即將會賺到好多聲望呢！倒是看看你們這兩個窮逼！一張傻臉！」


「你話，你即將同大本營領導合作？」少佐反問。


「對！我是其中一個顧問，怎樣？很了不起吧！」華哥自傲地微笑：「要是你願意說聲對不起，再跪下來吠兩聲，我倒是可以讓你進來我工作的地方幫我擦擦鞋子！」



恰巧，剛下班的風流醫生經過這裡，遇見了我們：「咦，你係大本營嘅領導仲有鳥嘴？嚟燒烤啊？」


「什‧‧‧什麼！？大本營領導‧‧‧‧‧‧！！？」華哥和中年女人都晴天霹靂一樣。


為什麼‧‧‧‧‧‧


有點像中國某些影片的情節。


「對不起！我不知道你就是大本營的領導！！」華哥馬上想要跪下，少佐把他勉強地捉住，才免受跪禮。


「一個倖存區，總係有你呢啲睇唔起人嘅人。」少佐沒有生氣，只是淡淡地說：「都已經見慣。」


「對不起對不起！」說著說著，他們兩個勢利鬼便跑掉了。


「估唔到燒嘢食都會遇到呢種人～」少佐搖搖頭，坐回下來。


「呢種人大把，成個倖存區咁安全。」我也坐下。


「好彩，我唔係呢種人。」風流醫生與我一同坐下：「Can i join？」


我們點頭，讓他加入。



所有事情，在這星期都結束了。


只餘下暈迷著的夏晴，還未醒來。


少佐每天會做的事，就是在床邊陪伴住夏晴。


我有問過少佐他，到底有沒有跟過夏晴正式地在一起。


少佐點頭答覆：「你知道我永遠喺前線做嘢‧‧‧‧‧‧」


「你驚自己有三長兩短？」我說。


「嗯，我唔想開一個空頭嘅承諾。」


「你哋點樣識？我真係好奇。」我回想起第一次見面，是在便利店吧：「我記得‧‧‧第一次見你哋，都係一齊行動緊。」


「以前我初初由不良人轉嚟大本營嗰陣‧‧‧‧‧‧好少人肯接納我。」少佐擦擦鼻頭，說下去：「偏偏係夏晴佢，好照顧我。」


「唔‧‧‧」我點頭，聆聽下去。


「我一心為老賢賣命，每次出去行動都會有損有傷，而我一返到嚟佢都會忙住幫我清潔傷口、貼膠布，久而久之，我同佢就建立咗一啲感情。」



「比起大本營嘅懶蟲，你呢種拎住棒球棍就可以行出去隻揪嘅男人，的確係吸引好多～」我輕蔑一笑。


「都係一個，好傳統嘅愛情故事。」我望著夏晴，再望向少佐。


「係老套，不過夠真實。」少佐凝視著夏晴，說：「感情就係咁，一點一滴慢慢建立返嚟。」


「不過之後你做咗前線指揮官，應該已經唔得閒。」


「嗯，更加唔洗講，做咗領導人呢個位之後。」少佐握住夏晴的手：「呢個時代，太唔適合開花結果。」


「但唔係呢個時代，你哋就唔會相遇。」


「我識咗你都好耐？老朋友。」


「係，都好耐。」少佐抬起頭，說：「時間，好似眨下眼就過。」


「轉眼間，我已經遊走過唔同倖存區‧‧‧搞掂咗兩個病者組織，而你做咗大本營領導人。」我說。


「講起上嚟，我都好耐無對付過病者。」少佐停頓了一下，再說。


「我都係‧‧‧‧‧‧最近喺倖存區對得太多人。」


「冇辦法，人性仲恐怖過班病者。」


「De──De──」心跳機發出的聲音，開始不同。


忽地，夏晴的手指微微作動‧‧‧‧‧‧


「夏‧‧‧晴？！」


「我去叫醫生。」我說。


「少‧‧‧佐‧‧‧」夏晴緩緩地張開眼皮，醒來的第一眼，就見到自己喜歡的人。


是多麼幸福的一件事。


久經一個星期多的時間，夏晴終於回復意識。


她的身體很累，心應該更累，因此都由少佐一直陪伴著。


在病房外的走廊，望到這一幕‧‧‧‧‧‧


我不禁會想起，未來自己會有否有愛的人？


那個人會是什麼樣子，什麼的性格？



但我怎樣看，這機會都是微。


大本營失蹤的人找回了、Sona接受事實與原諒了、夏晴醒來了，某程度上，就是一個完好的結局。


所有事情，都辦妥了。


我卻還有著一絲的惆悵，縈迴在我心中不散。


「你哋今晚走？」明雲來到醫療室窗邊，問遠眺著大海的我。


「都已經留咗喺到一、兩個星期，」我默然地點頭：「都係時候。」


「多謝你。」


「‧‧‧」我轉頭、望向明雲。


「你對於救朋友嘅執著‧‧‧真係好大。」明雲點一點頭，說：「呢一點，我或者可以喺你身上學習。我諗‧‧‧佢咁執著於你，都正正係呢一點‧‧‧」


明雲沒有說下去，而是遠眺在海上展翅飛翔著的獵鷹。


「佢？」



「啊，」明雲答：「一個好人。」


明雲他，是在說Sona嗎？


「Sona佢同你點？」我續問。


「大家僵持總有，不過佢都開始慢慢咁學識接受‧‧‧‧‧‧」明雲低頭凝視自己的掌心，說：「我會，盡力，成為一個好嘅領導人，唔會再俾悲劇發生。」


「你似乎‧‧‧上咗一堂。」


「哈哈哈，我喺囚房嗰幾日，諗咗好多嘢。」明雲指著遠方的天空，說：「但既然都過去，咁樣我繼續沉沒喺過往嘅悔疚都無用‧‧‧我會帶住Sona，慢慢咁接受‧‧‧‧‧‧新嘅未來。」


「咁就好。」有時學懂放下，比起執著更為重要。


「鳥嘴‧‧‧或者，應該叫你M？。」明雲問下去：「你之後嘅旅程會係點。」


「我嘅旅程，大概‧‧‧‧‧‧會走到走唔郁為止。」我合上眼睛，淡然地微笑：「我諗你都已經知我有絕症？你之前都講到咁白叫我休息。」


「嗯‧‧‧‧‧‧我習慣咗幫傷者全身檢驗。」


「既然你係醫生，你推唔推測到‧‧‧‧‧‧」我張開眼睛，望視明雲：「我仲會有幾耐命？」


明雲沉默良久，才答：「一年。」


「停藥咁耐，」我心中默然：「都差唔多。」


「你唔打算把握時間，去陪自己最好嘅朋友？」明雲問。


「你寧願選擇喺病床上不捨嘅離別，定係令佢哋早啲忘記。」我望著白色的地磚，搖搖頭：「我唔習慣人哋對我喊‧‧‧我唔習慣‧‧‧大家將注意力放喺我身上。」


「即係就算死，你都要靜靜咁離開？」


「咁嘅結局係最好。」


是晚，大本營的人徐徐地出發，由於病者在晚間會躲進建築物中休息，因此路上應該不會有太多病者去阻撓。


我們離開康城倖存區的一刻，康城全部樓宇的每一個單位，全都忽地亮起了燈光。從前漆黑一片的每一個單位，如今都彷彿有人在內，整個康城都散發著珠寶般璀璨的光亮，令大本營們都十分讚嘆。


「哇‧‧‧真係好靚啊‧‧‧！」、「全部單位都著哂光‧‧‧‧‧‧點做嫁‧‧‧！？好想影低啊。」、「好耐無見到一橦係著哂燈咁！」、「喺周圍都係黑媽媽嘅情況下，真係好正‧‧‧」


「如果佢哋咁做，係用嚟歡送我哋離開，咁都幾浪費電。」少佐淺淡一笑。


「我都唔知點做到‧‧‧‧‧‧」


但整個康城每家每戶都在閃閃發亮，彷彿‧‧‧‧‧‧希望又再輝耀著。


一小時前。


Eagle酒吧中，身體狀況接近垂死的董倫伏在酒吧檯上，等待著生命迎來的最後一刻‧‧‧‧‧‧


「叮嚀～」門鈴響起，來了一位不速之客。


面色不佳的董倫，淺淺地淡笑：「咳‧‧‧‧‧‧係死神‧‧‧？定係牛頭馬面嚟接我‧‧‧‧‧‧」


「仲有冇酒飲？」這人卻問。


「哦～？」董倫把眼角瞧去了門邊，發現那裡站著一個不認識的人。


對方不像死神，也不像天國的使者，只像一個平凡的人。


「酒，人類苦惱嗰陣，似乎係要飲酒消愁。」那名不速之客，走到酒吧檯的高椅上坐著：「我都想試下。」


董倫的嘴角中，溜出了淡淡的笑意：「呢到，得番醉生夢死。」


「可以，總之‧‧‧‧‧‧」對方直視董倫，說：「我想要搵番嗰種感覺。」


「人類有一種感覺‧‧‧係痛苦～你都要試？」董倫用那被毒藥傷透了全身的身體，去為這名不速之客調配了一杯深綠色的酒。


「要，我要搵番嗰啲失去嘅感覺。」對方堅定地答。


「小草麥汁酒。」董倫把那杯飲料，放到對方面前：「咳‧‧‧咳咳‧‧‧‧‧‧飲咗之後～就無後悔藥，仲要試？呢間酒吧‧‧‧咳‧‧‧‧‧‧得番呢一杯嘢賣‧‧‧咳‧‧‧。」


對方直視著那杯飲料，沒有任何表情。


「但如果你唔想飲～」董倫微微一笑：「咳‧‧‧咳咳‧‧‧‧‧‧就等我飲，俾自己一個痛快都好。」


「多謝。」對方直接把這杯飲料喝下。


董倫感到意外地望著他：「居然～？」因為，對方喝下的是一整杯巴拉刈的毒藥。


這種程度，正常人類喝下後的幾十秒，就會立即死亡。


但對方，還是直挺挺地坐在高椅上，把董倫當作酒保般訴說著：「我分唔清，自己到底係人類，定係怪物。」


「‧‧‧」


「我應該站喺人類嘅立場？定係協助病者嘅一方。」對方續說。


「你好明顯～咳‧‧‧咳咳‧‧‧‧‧‧」董倫因為喝下前幾天的毒酒，已經開始咳嗽嚴重且呼吸困難：「‧‧‧陷入咗自我身份嘅認同困難～」「‧‧‧‧‧‧」我和少佐也不知回應什麼好了。