《病港》: 144

「為感謝各位教徒一直喺低潮以嚟，都盡心盡力為組織付出！」此時，一把尖銳高昂、且狂熱的女聲，隱約地於教堂傳出：「特此，組織今日會如常等你哋可以獲得「恩賜」！接見天使！」


話一說完，教堂裡隨即傳來一片歡欣之聲。


「係「恩賜」‧‧‧‧‧‧」奎斯聆聽到她的重點字眼。


「睇嚟有必要過去睇一睇，先清楚係咩一回事。」我動身準備前去。






我們二人偷偷潛行過去，盡可能不發出半點聲音，直至靠近到教堂的牆邊後，我們終於能聽到清晰的鋼琴聲。


「聽落佢‧‧‧唔似播出嚟，係人手彈奏。」我說。


「‧‧‧」奎斯感覺到有點不妥：「唔知點解‧‧‧聽住呢啲琴聲，個心‧‧‧突然好似，好溫暖咁。」






最差勁的是，我也感覺到奎斯說出的感覺：「就好似羽毛包住‧‧‧‧‧‧」


到底什麼一回事？！


「奎斯，夠唔夠高上窗口睇情況。」我紮好馬步半蹲。






「好。」他點頭、然後踏上我的膊，再取出繩索工具勾住窗花爬上到窗口位觀察內部情況：「好奇怪‧‧‧‧‧‧有個女人彈緊琴，一班修女唱緊歌‧‧‧？然後，嗰堆教徒唔知做咩‧‧‧一副滿足、幸福嘅表情，喺到傻笑定唔知微笑‧‧‧‧‧‧」


「咁怪‧‧‧？」我心下有個推論：「唔通‧‧‧‧‧‧」


「我使下推開嗰窗聽清楚‧‧‧」奎斯緩緩地推開教堂的窗，料不知開不到一半，雙手就忽然軟下，並整個人摔了下來：「啊‧‧‧」


「唔好！」我想叫住他，但都已經太遲了。


他摔下來後，發出了「呯」的一聲，教堂裡的鋼琴聲亦停了下來。






「喂‧‧‧奎斯？！」我拍拍跌倒的他，只見其一面呆滯、目光放空：「果然‧‧‧裡面，可能存在住‧‧‧‧‧‧病童。」


「‧‧‧‧‧‧」奎斯已經完全陷入幻術或美好的回憶之中，根本弄不醒他。


已經放棄他嗎‧‧‧


我聽到，平權組織的人已經開始有走出來的聲音。


不過，我現在拋下奎斯‧‧‧‧‧‧






他就只有死路一條吧。


「果然有人侵犯聖堂，打擾「恩賜」。」這個從教堂走出來的人，正是犬京！


「犬京‧‧‧」我愣然的望住他。


「M，你仲未死。」他按一按鼻子，說：「你以前嘅氣味，同依家都一樣‧‧‧‧‧‧充滿住迷茫。」


說到此處，剛才進去教堂的白衣教徒都紛紛地出來，圍堵住我和奎斯。






看來，是逃不了。


「似乎係一位未受教嘅迷茫之人。」剛才那把狂熱高昂的聲音主人，出現了：「我哋「病者平權組織」，可以幫到你啊！係時候，進入天堂！」


她是個年約四十的瘦削婦人，有著電曲的短捲髮、淡橙色的烏蠅眼鏡為她帶來了尖酸計較的個性。


「頭先‧‧‧‧‧‧」奎斯按住頭部，開始回復清醒。


「冇錯，頭先你哋進入嘅‧‧‧‧‧‧！係天堂。」那女的沒有選擇當下殺死我們，反而作出了自我介紹：「先介紹下我自己～好多都叫我做德蘭女教主。或者？可以叫我做，上帝嘅先知。」






「所以‧‧‧‧‧‧病童就係你哋嘅上帝？」我直接戳破她的謊言。


「病童？我唔明你講咩～」德蘭教主不緩不急，慢慢地說：「我只係知道，可以做到人類做唔到嘅嘢，令佢哋帶嚟幸福同快樂，佢就可以係上帝。」


「你到底知唔知道自己講緊乜‧‧‧」我盯住她。


「我當然清楚～」德蘭女教主欣悅地微笑：「我哋人並唔係為咗受上帝奴役而辛苦自己，而係上帝能夠給予我哋心理上最高的幸福同美滿，而去為佢哋奉獻出自己。」


「可能宗教徒都係咁？」就算大難臨頭，我亦不禁冷笑一聲：「總係簡單複雜化，講啲正常人難以理解嘅句子。」


「你出現喺到，我相信都係上帝嘅指示，嚟拯救、加入陷入低谷嘅我哋。」德蘭女教主張開雙手，說：「成為弟兄之一，你將會得到至高無上嘅「恩賜」！」


原來是因為成員短缺，想借機拉我們入會嗎。


「恩賜？我唔需要虛假嘅幻覺‧‧‧‧‧‧」我橫視周遭的白衣信徒，說：「你哋都係！人死真係能復生咩，你哋只係俾佢利用。」


「‧‧‧」白衣信徒們，對我的說話有點反應，眼皮都開始抖動著。


「我知你哋入面‧‧‧‧‧‧」我對他們認真地說教，儘管不符合我的風格：「都一定有死咗嘅家人、朋友、愛人，當可以見番佢哋緊係開心，但係你哋只係呃到自己，真正死去嘅佢哋見到依一幕肯定好傷心！」


「爸‧‧‧爸爸‧‧‧‧‧‧」一位年輕的白衣女教徒，忽然想起什麼似的，突然哭了起來。

「明仔‧‧‧」另一個年老的伯伯，亦突然眼眨淚火，真正的想起了什麼一樣。


「好啦～好啦～」德蘭教主見到這場面，馬上安撫地說：「唔好再一派胡言，各位！我一陣會再帶你哋上天國，去見自己珍愛嘅人，但喺之前‧‧‧‧‧‧要先處理呢兩位魔鬼。」


「唔‧‧‧」奎斯馬上握緊弓箭，並手搭三枝鐵箭。


我亦以長矛擺好架式，指向他們：「即管嚟‧‧‧‧‧‧反正都難逃一死。」


「真係好恐怖嘅魔鬼～！」德蘭教主聲音帶住激動和興奮，說：「不過魔鬼都有並淨化嘅可能‧‧‧如果你哋‧‧‧實力‧‧‧高超嘅話，我會網開一面‧‧‧‧‧‧為上帝工作！！」


「上，我嘅白衣弟兄！」她震奮地高喊道。


說畢，已經有三個年輕的白衣少年向我們衝來，他們都握緊拳頭，似乎想空拳應對。


「啊！！！」第一個來勢洶洶的少年向奎斯拉出拳頭。


一向箭法精準的奎斯，轉為瞄準了他的腿部，發箭一射！


「嗖──」鐵箭射中了他的小腿，令他跌倒了。


另一個隨後而上的白衣男子，亦因為大腿中了奎斯一箭而失去移動能力。


「殺魔鬼殺魔鬼！！」一旁走出個白衣的四眼少年，在他要衝到我面前之際，我把長矛抵在對方的頸喉前。


他腳步馬上急剎下來，我再用長矛直刺他的腳掌一記！


「嘶」的一聲，他痛苦地按住腳掌，狼狽倒地。


「嘻哈哈哈哈哈～睇嚟一般嘅，唔夠應付兩位！」德蘭教主大笑，說：「犬京，我能力最高且最忠誠嘅信徒，為上帝而戰吧！」


聽到命的犬京，馬上目光一銳，把鋼腰刀掏出並奔向了我們。


「呢個唔同啱啱嗰啲‧‧‧‧‧‧」我提醒奎斯。


「明白。」奎斯從背上的箭袋中，取出三根鐵箭齊發。


「‧‧‧！」在三枝鐵箭襲去之際，犬京以超群的反應全身傾向左側避開，並在動作上保持衝刺的速度。


「果然係唔同‧‧‧」奎斯立即再取三箭，齊發射他。


下一秒！犬京全身傾向了右側避開了奎斯下一波的箭擊，再向前方的奎斯刺出一刀。手持長矛的我，打算往他掌部刺去，這下迫使犬京馬上取消動作，轉為翻空轉跳避去刺擊。


奎斯趁機拔刀還擊，犬京也急速地與他觸刃對上！「鏗──」明亮的兵器相交聲。


犬京忽然踏上奎斯膝部跳起，並雙腳夾住了他的頭部，進行後翻一甩！重心瞬間掌握不來的奎斯就這麼被人甩開兩米之遠。


整個動作完全是「速度」乘以「力度」所結合出來。


沒見犬京一段日子，他的動作已經‧‧‧‧‧‧變得究極靈活。


而被甩到去一邊的奎斯，未站起身之前已經被周邊的白衣教徒所制服住，使得動彈不能。


「Good job！仲差一個。」蘭德教主彎彎地微笑。


望住被制服了的奎斯，我心下有個了斷：「就一齊落地獄‧‧‧‧‧‧」


也不知是受誰影響，


在這種關頭，我還能說得出如此找死的說話。


圍觀的白衣教徒和德蘭教主的表情，都說明他們十分訝異‧‧‧‧‧‧


犬京話也不說，便用刀向我刺過來，看好時機的我向後一躍、轉身，出踢！「噹」刀子被我踢掉在地上，犬京立即對我使出虎拳的襲擊，伸出一虎拳想扣我喉嚨。


我一手捉住，離我喉頸只有半分之距。


限制住犬京動作的我，順勢拉向自己！接著用自己的前臂，撞擊在他的肘部關節位，實行帶馬歸槽。


「噠」犬京肘部發出甩骹之聲。


「‧‧‧！」他咬牙忍痛，使出了虎落把我打開。


「嗄‧‧‧‧‧‧」被他擊退的我，盯住只餘下一隻手可郁動的他。


「犬京！」一名白衣少女把本應踢到場外的腰刀，拋回給他使用。


他單手接回那把短腰刀，眼神中對我的殺意更為強烈。


這樣跟他撕殺下去不是辦法‧‧‧‧‧‧


擒賊先擒王，索性先對付一直會用說話影響他們的蘭德教主吧。


我眼角斜瞧了德蘭教主的位置一眼，然後拾起靠在牆邊的長矛，假裝要衝過去犬京面前，犬京亦反握腰刀，向前急速靠近。


可是我的目標並不是他，而是站在一旁看戲的德蘭教主。


所以到達雙方應該舉起武器的距離時，我用力一跳、轉身面向德蘭教主對她投擲出木長矛！這一下對他們來說，根本是意料不及，大家都張大了嘴巴。


「噫‧‧‧噫‧‧‧！」害怕非常的德蘭教主，下意識地拉住了在她兩邊站著的少女信徒擋住自己。


「嘶──！」一矛兩命，如同串燒一樣把兩名白衣少女貫穿而死。


不過，德蘭教主顯示絲毫未損‧‧‧‧‧‧失敗了。


持刀的犬京亦準備一刀舉起將我刺死，就在那一瞬間，德蘭教主叫停了戰爭：「等陣‧‧‧‧‧‧！嗄‧‧‧嗄‧‧‧‧‧‧」她明明沒有戰鬥過，卻緊張得喘住大氣。


「呢個人‧‧‧‧‧‧」德蘭教主指住我，再指住奎斯：「我要留佢哋命，佢哋嘅價值唔應該係白白死喺呢到‧‧‧嘻哈哈哈。」


「但係德蘭教主‧‧‧頭先佢哋先想殺你‧‧‧‧‧‧」一名大個子的白衣男人說。


「做教主，就要有教主嘅大器同風範。」她對住我們微笑，既高昂又激動地說：「佢哋進入過天堂，就肯定會跪拜喺上帝嘅腳下‧‧‧‧‧‧立即「恩賜」佢哋！」


之後，戰鬥失利的我和奎斯，便被人五花大綁地帶到去靈實教堂之中。


德蘭教主更命令幾個白衣男子，先毆打我們一身，一直在看戲的她看得不易樂乎，更細心提意不要把我們打死，我感覺比死更難受。


十五分鐘後‧‧‧‧‧‧


「嗄‧‧‧咳‧‧‧」奎斯咳出了一口血，含辛茹苦地喘息：「嗄‧‧‧嗄‧‧‧‧‧‧咳咳‧‧‧嗄‧‧‧啊‧‧‧」


被毆打一身的我，亦開始有些頭昏腦脹：「嗄‧‧‧呃‧‧‧‧‧‧啊‧‧‧嗄‧‧‧」


「好啦～好啦～再係咁打，佢哋就會死。」德蘭教主托托她的烏蠅眼鏡，微笑：「幾位男士可以出番去先，我要單獨地同呢兩位小英雄‧‧‧‧‧‧共處一下。」


「八婆‧‧‧咳！」奎斯吐了一口血到其衣服上。


「喀──」那幾名白衣男士把教堂的門關上了。


現在教堂中，只餘下我們三人。


寂靜無比。


我淺淺一笑，學著奎斯說：「八婆‧‧‧‧‧‧」


「你話邊個～？」德蘭教主居高臨下的俯視著我。


「邊個應‧‧‧咪就係邊個。」我對她輕笑。


「嘿‧‧‧哈哈哈‧‧‧」奎斯聽到後，也不禁笑了出來。


「你哋完全冇會意到～自己係處於下勢？」德蘭教主反問。


「並唔係單單只有劣勢先可以笑。」我收起笑容，說：「仲唔派你啲病童嚟洗我哋腦‧‧‧‧‧‧」


「你好快就會學識傻笑，或者對住我好似病者咁微笑？」德蘭教主對我們二人，說：「我喺背後控制人嘅方法，居然會俾你兩個‧‧‧‧‧‧睇落唔大又唔細嘅o靚仔戳破，我下次真係要小心啲～呵嘿嘿嘿。不過放心，利用病童洗你哋腦之後，你哋就會對我唯命是從，因為喺呢個咁惡劣嘅環境下，現實同虛假嘅分別真係咁重要？你哋遲早會依賴咗呢種美滿嘅幻境，然後向我乞求更多更多，呵嘿嘿嘿～～～」


「你就係利用依種方式‧‧‧‧‧‧去吸引啲人，去信你嘅組織？」奎斯說。


「好啦～識得用咁聰明嘅方法去利用病者同人類，我基本上可以稱為呢個病港最優秀嘅領導人，而且我重要係個女人。」蘭德教主微笑著說：「我都不況同你哋分享下我嘅方法，始終太優秀但係冇人知道，呢種寂寞係好難受、好難受～就好似細個考試滿分，但係無家人、無朋友、無同學同你講啲嘢咁。」


「就算係咁‧‧‧」我盯住她。


「呵嘿嘿～我的確係利用病童去控制其他人，令佢哋產生對美好回憶嘅依賴，始終‧‧‧喺呢個殘酷嘅世界入面，見番自己愛錫嘅人係一件幾窩心嘅事，只有夢境先做得到。」蘭德教主作更深入的自我介紹，走到鋼琴前：「或者，我應該一路演奏鋼琴，一路去講述優秀嘅我‧‧‧‧‧‧嘅故事。」


「真係自大嘅人‧‧‧‧‧‧」


之後，那瘋婆娘真的開始一邊彈奏著詭異的歌曲、一邊帶點哀怨地說唱著：「２７年？我大概～♬已經喺孤兒院工作咗咁多年～♫我見過好多被拋棄嘅孩童～∮佢哋嘅遭遇同細個嘅我相同♪～充滿住哀怨。♩我哋憎恨呢個世界～帶嚟咗孤獨～直至到呢一日嘅來臨♬～有更多更多嘅人加入我哋呢個大家庭！嘿～呵呵呵♭～只要越多人陪住班孤兒，佢哋就會好愉快咁唱歌～我哋只係需要一啲‧‧‧‧‧‧陪伴。」



「‧‧‧‧‧‧」我跟奎斯被這種哀怨感，弄得說不出任何話。


「唱歌嗰班孤兒～♫係我由孤兒院帶嚟。」德蘭繼續訴說著她的故事：「♫我好愛佢哋～陪伴咗孤獨嘅我好幾年¶～我唔會拋棄佢哋，佢哋唔會攻擊人類♭反而總會帶嚟希望、美夢、回憶～呢個就係我為佢哋平權原因♫～可悲嘅童年啊～♯唔會再存在，從今日起都係一個大家庭！呢個就係我創立「病者平權組織」嘅真正原因。」


「‧‧‧」


德蘭從鋼琴椅上離開，向我們問：「係唔係有俾我感動到？」


「我唔理你咩原因，總之你已經令好多人損失咗性命‧‧‧‧‧‧」奎斯說。


「佢哋係兒童，應該受到保護。」


「咁教主‧‧‧？」我反而有興趣，問下去：「個男教主又係邊個。」


「就係以前偉大嘅孤兒院院長。」德蘭張開雙手，歡笑：「如今，我哋都係被世界遺棄嘅孤兒，你喺呢到將會得到尊重。」


「怪物就係怪物‧‧‧‧‧‧」我盯住德蘭，狠斷地說：「被消滅都係正常。」


儘管病童它們沒有攻擊能力，我們也不能忽視其哭泣時所帶來的影響。


「做人唔應該咁死板～病者同人類，係做到朋友同家人。」德蘭說下去：「知唔知點解我要搵人打到你哋迷迷糊糊？因為就算你哋知道咗病童嘅秘密同破解方法，都會因為意志模糊而不知不覺陷入佢哋嘅「恩賜」。」


‧‧‧我居然沒想這一點，還以為她只想找人來打我們出氣。


「好啦～唔應該再阻撓你哋接下落嚟歡樂嘅時光。」德蘭步出教堂：「慢慢享受。」


「‧‧‧可惡。」奎斯只能目睹她的遠去。


「佢點樣控制病童‧‧‧‧‧‧」我想不通。


「病童佢哋係擁有自己年齡嘅智商‧‧‧所以佢哋係會識得分辨‧‧‧邊個對佢好、邊個係想殺佢，一般情況下，佢哋好鐘意搵倖存者玩‧‧‧‧‧‧不過佢哋對於「玩」嘅定義係咩，就睇佢哋。」在幽暗的教堂中，奎斯補加一句：「前半段說話‧‧‧‧‧‧係根據病獵公會資料記載。」


難怪‧‧‧


之前將軍商場中，那個米奇瘋子倖存者在病童存在的情況下，都一直存活下來。

說起上來，上次經過寶康公園時，那三個病童都是在跟我們「玩」角色扮演的遊戲，並沒有像那個男病童‧‧‧‧‧‧


一來就釋出不明的雜聲干擾我腦袋。


「咁我哋‧‧‧‧‧‧」被五花大綁的我，望住了教堂的天花板：「應該點做好。」


「放心‧‧‧」奎斯淺淺一笑，說：「你唔記得‧‧‧咗？舌女的‧‧‧‧‧‧」


「毒辣靈藥。」我會意地答。