《病港》: 102

他讓人毛豎的聲音在旁邊出現，卧躺著的我馬上舉起雨傘指向班尼，阻止他的靠近‧‧‧‧‧‧


「睇嚟已經到潮汐。」班尼望住渠道上，飛流直下的污水：「你根本唔需要驚‧‧‧」


我留意下水道周圍，發現，那隻盜屍賊‧‧‧不見了。


「隻病者喺邊。」我望住班尼。






「你唔記得佢特性？見到人就會驚‧‧‧你講嘢太大聲，會嚇親佢‧‧‧」班尼不懷好意地笑著：「但放心‧‧‧我會獻上你嚟做探訪禮物。」


「你咁講咩意思‧‧‧‧‧‧」我心底裡已經做好戰鬥的準備。


只是沒想到‧‧‧






會這麼突然。


心情難免有些緊促的感覺。


「偷屍賊除咗收集屍體之外，仲有一個特性！」班尼舉起自己的小食手指，低住頭對我說：「佢哋喜好係將屍體帶到自己地盤‧‧‧再將佢啃食，而死去無耐嘅新鮮血肉，佢肯定未試過，肯定會為我份禮物感到興趣。」






他暗示，我即將會是那塊新鮮的肉嗎。


面對班尼的竊笑，下水道的昏暗、屍體的堆積和腥爛的氣味，相信往後沒什麼經歷會比這次嘔心。


「你一早就打算將我帶過嚟之後殺死？」儘管這條問題愚蠢到不行，我還是要問一下。


「有諗過嘅‧‧‧」班尼啜咬著手指，抱手思考著：「因為你係一個「病獵」！一路上我嘅諗法同思想似乎都影響唔到你～既然係咁，我覺得你係必須死！」


「就單純因為‧‧‧‧‧‧」我盯實班尼的眼睛：「我係一個病獵？」






「冇錯～我最討厭就係你呢種人，好好地點解要去殺死病者！？」班尼把背上的自製木弓握到手中，恨切切地說：「我唔容許呢種事情繼續發生‧‧‧唔容許‧‧‧‧‧‧」


「你既然鐘意病者，何必加入「不良人」。」我慢慢地站起，望住眼神深怨的他：「索性出去街外面同班病者長相廝守就好。」


「我加入‧‧‧就係為咗對付你呢種「病獵」！」班尼極為震怒，說：「原本好似仲有一個叫滿天？我咁啱入到嚟想刺殺個陣，佢已經失蹤咗‧‧‧不過唔緊要‧‧‧依家殺死你就得！」


說畢，班尼一手持弓，一手拿箭便拉弓向我！


早有警惕的我把雨傘打開，形成一道防禦：「居然會有人為咗病者而殺人類‧‧‧‧‧‧」






根本荒謬。


「嘶！」箭狠狠地射中了傘瓣，成功擋住一箭。


「病者係上帝派落人類嘅天使！！清洗大地，你哋呢班專門狩獵病者嘅惡徒，就由我嚟懲罰！」班尼又再取出一箭，瞄準住我。


「你簡直係喪心病狂。」我以傘當作盾牌，向班尼衝刺。


傘身的前端設有刺針的關係，班尼不得不草草射完這箭，然後狼瘡地往一邊閃避！見此，我亦馬上收起傘布，用傘子往他的手腕揮打。






「啪」手腕受到打擊的他，木弓脫手掉落了。


一時間驚恐萬分的班尼，用腳踢開我傘子下一招的刺擊，令我刺了個空。繼而把握機會，再次拔出狩獵小刀，站起與我對峙。


「啪啦～！」忽然，班尼踢起地下的污水到我的身上。


下意識避開水濺的我，及時防備班尼的刀刺攻擊，每次他想用刀刺向我時，我都成功用傘擊退。


這些敏捷的回避動作，都歸功於我經常出外與病者實戰時，無形中所鍛練出的神經反應。

\

「上帝嘅叛徒！」班尼那熾熱的眼神，完全不像在說笑。


我用力反擊，暫時向後拉開彼此的距離：「病者對你嚟講，到底有乜意義。」我望望周邊的幾條大渠道，它們如同瀑布般一直把水流落下水道入面。


現在水位，已經淹到大腿的位置‧‧‧‧‧‧要速戰速決。


「咁戴住一個奇怪嘅面具，對你又有乜意義‧‧‧‧‧‧嘰嘰，掩蓋住自己，會令人感到嘔心嘅面孔‧‧‧？」經班尼這麼一說，我摸摸臉頰附近的位置。


才發現自己剛才把面具脫掉以後，忘記戴回上去。


班尼見到我的舉動後，嘴角的弧度更為之彎：「嘰嘰嘰‧‧‧失去面具就會俾人冷笑、嘲笑、戲弄嘅感覺，我好清楚，呢家外貌暴露喺外界面前‧‧‧‧‧‧係唔係覺得生不如死！就因為要顧及人類對「正常」所謂嘅普世標準！！！要受人異目冷眼！」


「嗄‧‧‧」我嘆了口氣，望住漸漸上升著的水位：「算，戴唔戴都冇分別。」


「唔‧‧‧！！」班尼聽到我這句發言之後，更為激動：「你‧‧‧你唔好扮哂根本唔作乎！」


「我根本唔在乎，」我望向表情怒不可遏的班尼，說：「只係為咗方便行事。」



臉頰只是被舌女的強酸弄得火燒般皺乾，又不是‧‧‧‧‧‧要了我的命。


「你‧‧‧你‧‧‧肯定講緊反話‧‧‧你內心肯定好自卑！」班尼用強硬的語氣，想要我承認。


我望住班尼滿身包得密實的衣服和對「正常」定義的執著，開始推敲出一些事情‧‧‧‧‧‧


「自卑嗰一個，係你。」我說。


我估計，班尼本身是個其貌不揚的人。


「我‧‧‧唔係‧‧‧我唔需要你哋認同！我唔需要跟從你哋嘅想法！我就係我，冇人可以‧‧‧影響我啊！！」班尼怒喊，下水道的回音都足以回傳幾遍。


「咁點解你要包住自己塊臉？」我反問，淺笑：「連我咁樣衰嘅人‧‧‧都已除咗面具落嚟。」


「我‧‧‧我‧‧‧‧‧‧」班尼漸漸握緊拳頭，雙眼用力地瞪住我：「我就係我！我係班尼！我唔會介意你點睇我！」


說畢，班尼憤然脫下了包住臉的口罩與、頭巾和圍巾，他的樣貌亦終於顯露出來了。


班尼的臉一啡一白，不平均地分佈在臉上各處，看上去確實與常人不一，原來他是一個患有白斑症的人。


他自己揭露了樣子後，下水道只餘下渠上流水的聲音。


「哈‧‧‧」班尼見我無話可說，便主動地說：「嚇到出唔到聲？冇錯啊‧‧‧我就係正常人眼中嘅怪胎‧‧‧‧‧‧嘰，點解仲唔嘲笑我！」


「呢個就係你要保護病者嘅原因？」我和班尼彼此都脫下了自己的面具，互視對方：「你覺得佢哋同你一樣。」


「病者唔似你哋‧‧‧唔會歧視、唔會嘲笑、唔會侮辱‧‧‧」班尼垂下了頭，沒精打采地說：「只要世界上得番病者‧‧‧就永遠唔會有人諗起我、講起我，然後拎我嚟做笑話‧‧‧」


「‧‧‧」


「只要得番病者，世界會單純好多！！！」班尼仰天大喊。


人類，太複雜了。


「就睇下我哋兩個‧‧‧邊個會死‧‧‧！」握緊住狩獵小刀的班尼，掩住淚線狂流的眼睛：「反正‧‧‧我成日都會諗‧‧‧點解死嗰個一定要係我哋‧‧‧！唔可以係個班正常人啊！！！」


「班尼‧‧‧唔好亂嚟。」我盡量以冷靜的聲線，讓他平復下來。


「錯嗰個根本唔係我！！」班尼衝上來向我揮刀。


我側身躲開，用傘柄把他推走：「你係咩人唔緊要‧‧‧仲緊要係，你嘅所作所為！」


不要因為自身的缺憾‧‧‧‧‧‧


而走向極端。


「人哋接受唔到我‧‧‧就搵接受到我嘅人啊！！病者係同我一樣俾你哋世人認為係「怪物」嘅物種啊！既然我都係你哋口中嘅「怪胎」咁保護佢哋都理所當然‧‧‧‧‧‧！」班尼快速地轉身一斬，我感覺到背肩被劃了一刀：「你呢種病獵，就係殺死我同類嘅人！」


世界走向了終端，也令很多人的思想走向了終端。


「你大可以選擇做一個令佢哋尊敬嘅人‧‧‧‧‧‧」我反手捉住其腕，並用另一隻手按壓他的頭入水中。


班尼在水中掙扎了好幾秒，最後把全身傾靠向我撞去，使我一時間失去了平衡，與他一同摔倒在污水之中。


此時，屍山後方出現了踏水的聲音，那個躲藏多時的陀背病者──盜屍賊，終於趁我們二人鬥得雙雙落水時，馬上逃命。


它跑到下水道的其中一條比較少水流入的渠口下，拉住一旁生銹的鐵鍊上去，然後就順住渠道快快逃去了。


「我都唔會咁輕易死‧‧‧」狼狽不堪的班尼亦走到它的位置，拉住鐵鍊苦苦地爬上去：「我仲要你哋全部人通通都死清光‧‧‧‧‧‧」


「班尼‧‧‧」我望住他懦怯的背影。


之後撿起了自己在水中飄浮著的鳥嘴面具，也試圖跟著爬上去。可是，班尼卻馬上收起鐵鍊，不打算讓我依靠鐵鍊上去‧‧‧‧‧‧！


「你就留喺到慢慢浸死‧‧‧‧‧‧」班尼拋下這一句，便轉身逃離。


我望了望周圍，恐怕那條放住鐵鍊的路，是盜屍賊為了讓自己能離開這個下水道而唯一設置的東西。


望住周圍，如今我只有一個方法。


「啪啪格格格噠噠噠啦──」我把放在中央位置的沉重屍山，推向了渠口的方向。


我先推比較上方的屍體，因為底下的屍體都被上面的壓得沉甸甸。


我借住這堆屍體，形成了一條屍路，供自己踏上足夠的高度，能夠上到去渠口之中，在淹死之前順利推出。


只是‧‧‧用上這個方法的話，晚上不免會發惡夢。


由於這條渠道都是單向性的，沒有分支的路，因此跑了不到五分鐘，我便逃出生天，重返地面的懷抱。


久久未見日光的我，就快要得到照耀。


可我快要出去時，見到外面的班尼正跪在那隻躺地的盜屍賊病者面前，而一旁‧‧‧‧‧‧站住了白魂。


「白魂‧‧‧」他怎會在這裡？


班尼一聽到腳步聲從渠道傳出，便知道我出來了，馬上轉頭望住我：「我唔會放過你哋兩個‧‧‧‧‧‧！」然後，就轉身逃跑。


「白魂唔好俾佢走‧‧‧！」我大喊。


愕然的白魂想去追，但明顯地跑得不太自如，應該是之前捕獸器所致的舊傷。


於是，我們只能目睹班尼逃去。


「你點解會喺到‧‧‧」我望住握住武士刀的白魂。


「你呢！？同埋做咩叫我斬佢！佢係班尼喎‧‧‧我哋不良人架喎‧‧‧‧‧‧」白魂問。


「你見唔到佢啱啱做咩？跪喺隻病者面前。」我望住倒臥於地上滲著血的盜屍賊，問：「你做嘅？」


「我咁啱調查到呢到‧‧‧準備入去個陣，就見到呢隻病者走咗出嚟，咪一刀斬死佢！」白魂說得斬釘截鐵。


「調查‧‧‧？」


「王白蛋俾人捉嘅事。」


「你仲有去查？」


「大佬‧‧‧如果唔係我點會暫時離開「不良人」‧‧‧‧‧‧」白魂問：「不如你講班尼同你點解會喺到先。」


我見想追敏捷的班尼無望，索性當作休息，跟白魂交代下什麼一回事，也想打聽一下他調查成怎樣。


「咁嘅‧‧‧我去咗調查王白蛋去向，發現捉走佢嘅人，係一個組織！」白魂凝重地說：「人類組織，唔係病者。」


「惡意‧‧‧倖存者？」


「應該就係‧‧‧佢哋好似叫乜嘢「病者平權組織」。」白魂無聊地對空揮了兩刀：「將軍澳咁細，我連續用咗兩、三日就發現佢哋蹤影‧‧‧‧‧‧發現佢哋綁架咗唔少附近嘅倖存者，所以應該就係佢哋。」


「咁點解你又會喺到？」我又問。


「我無意中‧‧‧偷偷哋聽到佢哋話，下次要送啲活人嚟呢個渠口做乜嘢供奉，我覺得有奇怪，就預先嚟睇下呢到乜料。」白魂滄桑的眼神，投視住我：「之後就遇到你。」


「原來係咁‧‧‧不過真係估唔到仲有其他生存團體喺到，仲以為你哋不良人已經殺哂附近所有人。」我把鳥嘴面具戴好。


「最主要嘅我哋不良人都清除哂！將軍澳區淨低落嚟嘅都係小團體或者行事秘密嘅組織。」白魂忽然咬牙，往偷屍賊的屍身上刺了一刀：「鳥嘴，呢隻又係咩嚟！？」


「就‧‧‧」我為它起個更易讓人明白的名字，整天叫偷屍賊好易讓人誤會：「病盜，一隻行動好低調嘅病者。」


「生命力真係薄弱啊‧‧‧‧‧‧」白魂望住它，說：「就算唔係斬弱點，都隨便斬一刀就死。」


「既然係咁‧‧‧」我用傘子撥一撥病盜的屍體，說：「我就唔洗研究佢。」


「喂‧‧‧！唔好講咁多，既然你喺到，我哋一齊去‧‧‧‧‧‧」白魂一拐一拐的走向我，忽然軟了一跤：「救王白蛋‧‧‧」


「你咁嘅樣，仲點救‧‧‧」我及時扶住腳軟的白魂。


「換下嘢‧‧‧包住個傷口就得‧‧‧」白魂腳上的碎布，看來很久沒換了，血都滲染著出來。


「你返去不良人接受醫治仲好。」


「醫得嚟王白蛋都死！」


「同不良人回報你搵到一個小型生存團隊，基於利益層面，佢哋自然會派人幫你。」我說。


「真係得‧‧‧？」


我點頭：「我幫你回報。」


而我，也能用這件事提升自己地位吧。


只要一天不找點事情來表現自己，達至在「不良人」的地位提升，大本營的安全就岌岌可危。


相信現在的我‧‧‧‧‧‧


在那伙「不良人」的眼中，只是個在劣勢之下殺掉自己首領，借此向敵人投誠的人反賊。


單純為了自保而傾向敵方，並不是真的忠心。


所以不破尚每次與我對談時，往往會不經意地流露出不信任、疑惑的眼神。



「點解你咁熱衷於救王白蛋？」我扶住白魂，離開這兒。


「因為‧‧‧」白魂流露出微弱的淺笑，說：「當初因為佢，我先加入不良人。」


「嗯？」


「個陣我仲係一個周圍流浪嘅人‧‧‧‧‧‧經常三餐不飽，又冇固定嘅地方住，每日同病者仲有人類戰鬥，練就我刀技嘅命中能力同雙腳嘅回避能力。」白魂續說下去：「大概‧‧‧個陣仲係世界病變嘅初期？個陣係倖存者唔同勢力仲有同病者鬥得最激烈嘅時期，幾乎每條街、每個商鋪、每間商場日日都上演激鬥。你估我真係叫「白魂」！？都係倖存者之間咁樣稱呼住我‧‧‧‧‧‧喺戰場上苟延殘喘嘅靈魂！」


世界病變的初期，我身在家中安然渡日。


但確實地，每天都會聽到街外人類之間互相殘殺，可以是單純為了一樽礦泉水。


把白魂送回不良人的據點後，我步上小學的最高層，準備向不破尚回報發現倖存團體一事。


既然對方會強行擄走王白蛋，又名為「病者平權協會」這種聽上去也知道是神經病的名字，足以證明對方不是善類。


使我出征，也有個理由。


殺病者我可以，殺人類‧‧‧‧‧‧我並不拿手。


「有另一個倖存者團隊？」不破尚如同帝皇般，坐在佛陀像的石腿上凝望住我。


「詳情白魂會比較清楚。」


「銘凱，」不破尚向身邊的助手，問：「班戰士休息夠未？」


「我哋攻陷大本營都有一、兩個星期，佢哋應該都飲夠食夠。」銘凱答。


「將軍澳區附近仲有任何倖存者團隊？」不破尚問下去。


這個叫銘凱的高瘦美男，幾乎如同不破尚的秘書，條理有序地答：「除咗香港知專設計學院個邊之外，任何大、中型倖存團隊都幾乎已經俾我哋不良人用咗半年時間清除‧‧‧‧‧‧附近淨番部份遊走嘅小型倖存團隊。」


「好。」不破尚發落指示時，都兵貴神速，：「聽日開始點算物資、武器，大後日開始，清除埋呢一區所有小型倖存團體。」