《病港》: ９２

王白蛋再一次向呆然的公仔招手，軍刀被強行交上作賭注品的他，只好無奈地參與這場射擊遊戲。


「只要你射中哂所有靶，就可以拎返自己嘅賭注同可遇不可求嘅獎品‧‧‧‧‧‧十字弓！」遊戲場負責人高呼。


現場氣氛被炒熱起來了，大家都為著公仔這個素未謀面的人打氣與歡喊，現場緊湊起來。


王白蛋在我耳邊低聲說：「喺我哋呢到‧‧‧武器就等同於地位，所以你會見到佢哋對於呢件事，係幾咁熱情！幾咁雀躍！！」






「把十字弓‧‧‧好厲害？」我只問一句。


「手工又型、配件又靚、殺害力高，仲要喺我哋不良人之中，係無冇一個人拎過十字弓做武器！可想而知‧‧‧係幾咁正！！！」王白蛋壞壞地淺笑：「萬一你朋友真係咁好彩拎得到嘅‧‧‧‧‧‧叫佢借俾我炫耀幾日得呱！」


「嗶──」射擊場響起警報聲，負責人便把一樽BB彈和一把手槍放到公仔面前。






「三、二、一，開始！」負責人高喊。


首先，一塊被繪畫剪裁得類似大眼的佈景版突然從地上彈起豎立，跟公仔只有大約兩個身位的距離，十分之近。


「上膛。」我在一旁提醒他。






公仔望一望我，然後手忙腳亂地把BB彈入到彈匣中，再雙手捉緊住氣槍，打算直接往大眼佈景版開槍‧‧‧‧‧‧


「扣板機。」我再提醒。


公仔又稍稍回頭望我，然後以手指按壓扳機。


「砰！」公仔開起第一槍，射中目標極近的大眼景佈板。


隨後，他的十一點鐘以及兩點鐘方向，又有兩塊像似大耳的景佈板豎立，供人射擊。






公仔瞇起一隻眼，把聚焦都放在一邊，好讓自己射得更準。


「砰！砰！」兩發連中。


「唔錯唔錯！」王白蛋拍掌道。


之後射擊場左面的暗角，突然無聲地豎立起一塊舌女的景佈板，還好公仔留意得到，並將其射掉。


「仲有六十秒～！」遊戲負責人高呼，說：「打中最後排嗰三個汽水罐之一，都可以加十五秒時間！」






緊接，公仔開始心急起來，遊戲難道亦漸漸上升，有個目標要連續開好幾發才射得到，最後公仔的子彈耗盡，時間也結束了，沒能贏出到。


「真係可惜～嘿，５７０分。」遊戲的負責人宣佈公仔的分數：「距離拎十字弓要達到嘅１０００千仲差一半。」


王白蛋深疑地望住公仔：「細路，你第一次玩？」


公仔輕微地點頭。


「第一次玩已經有平時有參加個班友‧‧‧差唔多嘅分數，你都幾厲害。」王白蛋點點頭。

「咁我把軍刀‧‧‧」公仔無助地望向王白蛋。


「呃‧‧‧嘿哈‧‧‧！哈哈哈‧‧‧出到去一定會搵到更好嘅軍刀嘅，或者我一陣借枝威力武器俾你用住先！」王白蛋以笑帶過：「帶你哋去下一個遊戲室熱門嘅地點！」


王白蛋下一個帶我們去的地方，是一個舉辦著小型拳賽的地方，觀眾包括不良人和大本營新來的八樓知識份子，他們似乎都看得不易樂乎。


中間則站住兩名脫去上衣的漢子在毆鬥著，拳拳到肉，一不小心可能牙齒也破飛掉。


「你帶我嚟嘅地方的確係有趣‧‧‧不過，我哋想休息下。」我見公仔也累了，便主動提出。






「好，關於呢到有咩唔明再問我。」王白蛋終於介紹完畢，說：「我哋呢到咩地方都訓得，隨你便，喺酒吧訓應該唔錯～暖暖地。」


「公仔，你去個到休息先，你睇落太攰。」我說。


「老師‧‧‧但係娃娃佢‧‧‧‧‧‧」公仔依然在擔心著妹的安全。


「我會去睇佢。」我答。


現在我們初入「不良人」，只能如同我之前在「大本營」般，慢慢往上爬，



再找一個機會摧毀這裡。


「轟隆──」雷聲響起，原本的毛雨下得更大。


我撐住傘，走到去操場的斷頭台上，坐了在娃娃的一旁，用雨傘為她擋去雨水。在凌亂的狂風之中，我陪她一起待在外面，望住陰沉的天空與烏雲。


「老師‧‧‧」娃娃似乎著涼了，說話都帶點顫：「你唔‧‧‧入返去？外面‧‧‧落雨‧‧‧‧‧‧會好凍‧‧‧。」


「老師我‧‧‧正想望下個天。」我說。


憂鬱的天空，恰如我現在的心境。


冰冷的臉孔被面具同化了般，不能再展出笑容。


想起了幾街之隔的大本營，他們肯定徹底地恨透我。


而關於我的秘密，又會有誰知？


如同這場雨一樣，越下越大，我越是望不清此刻天空的結構。


但‧‧‧總有一天。



我抬頭仰望時，會見到陽光吧。


經過雷雨一夜反覆的交纏，天空終於得以平靜，在黎明上升之時泛出淡橙淡紅的彩霞。


望住眼前的娃娃，他們兩兄妹就如同我一樣，被遺棄到世界之外。


短期內我要做的事‧‧‧‧‧‧


應該是，先找個地方讓他們安置下來。


這一早，我為了應付病童，而在不良人的據點內周圍尋找耳塞，因為南愚給我的情報是，需要用到它。


意味住，病童的攻擊方法極有可能是透過聲音造成。


另外，我特意地走了去問一問周圍的不良人，查詢了一下他們關於病童的認知。一些人對我的問題視而不見、一些人答我不清楚，


餘下的一些人則說是恐怖的病者，說有命從二樓活過來的不良人都幾乎有了精神病，不得不殺死。


「你知道一啲關於病童嘅事？」我這次向禮堂，一名正準備用餐的不破尚的飛虎部隊成員問。
「哼？」他喝著一杯珍貴的即溶咖啡：「病童？你好似係不破尚叫去對付嘅人‧‧‧」


「嗯。」我喝著水，答。


「祝你好運～」他淡淡一笑，說：「不破尚曾經都派過幾名隊員入去殲滅病童，可惜‧‧‧最後全部失去聯絡，任務失敗。」


「‧‧‧」就連有槍的，也解決不了嗎‧‧‧


「病者係一種‧‧‧」不破尚的手下想了想，繼續跟著互相閒聊著：「好狡猾嘅生物，不良人過往就有好多人死喺病童手上，你永遠估唔到佢哋下一步～」


「見識過好多。」我回想起當初遇見的第一隻病腦，他真的使盡了渾身詭計要致我們於死地：「而且‧‧‧似乎數量越係稀有嘅病者，能力就越恐怖。」


「咁當然，就好似你哋呢種病獵咁，喺我哋「不良人」入面都超級罕有～因為我哋淨係識殺人。」他打趣地說：「對於病者我哋真係一曉不通～唔算嘅，至少我哋唔會好似你咁特登去迎戰病者。」


「病獵？」我對他這個用詞，感到新奇：「不過‧‧‧對付怪物，都的確係一門學問。」


「病獵，係我哋稱呼專門對付病者嘅人類統稱。」他咬著自己烤得香脆的多士，說：「我哋「不良人」以前都有個類似你咁嘅病獵專家～叫滿天。」
「滿天‧‧‧」我心下默然。


他果然是待過在「不良人」入面‧‧‧


「後嚟？」我問下去。


「喺一次出征靈實醫院嘅旅程入面，滿天同其餘不良人嘅聯絡消失咗，後嚟我哋再派過幾隊人去搜索調查‧‧‧‧‧‧消失埋。」他說起，也自覺心寒：「之後我哋就認定咗嗰到有非常厲害嘅病者出沒，就冇再去過。」


事實上‧‧‧


滿天在靈實醫院和大BOSS生活得好好的，其餘不良人則死清光，便是我見到的事實。


「唉～真係可惜，我哋「不良人」唯一出色嘅病獵就咁消失咗，原本不破尚仲好重用佢‧‧‧‧‧‧幾乎已經係佢左右手。」他想著用什麼形容詞接下一句話：「一隻‧‧‧專門對付病者嘅左手。」


「你哋「不良人」，似乎好缺乏出色嘅病獵。」我說。


「如果你想上位嘅話‧‧‧‧‧‧」他輕淡一笑，離開餐桌：「今次就係向不破尚證明自己實力嘅機會。」


「借我一用。」我視線的焦點，放了在他紮在後褲袋的無線電對講機上：「我會雙倍奉還。」


「‧‧‧」不破尚的手下，停下腳步：「唔？」


「你個對講機。」我說。


他思考了幾秒，笑住問：「‧‧‧‧‧‧點樣雙倍法？」


「你會唔會有缺乏嘅武器零件或者想要嘅武器？上到去之後，如果我有命返嚟會首先拎俾你。」他們不良人，對於武器很是講究吧。


昨天聽王白蛋說，講究得幾乎是地位的象徵。


「如果你係個商人，都幾出色。」他返回到我面前坐下，說：「至少‧‧‧你嘅交易方案吸引到我坐番低。」


「如果世界上得一部無線電對講機，係唔會發揮到佢嘅功用。」我暗示不單止要一部對講機，還需要一部給公仔。


「呢樣風險較大～我要問朋友借多部。」他說。


「你一定做得到。」我說。


「就好似你咁？你一定有命返嚟，而且消滅病童‧‧‧‧‧‧」他說話像逐句逐句吐出來。


「唔肯定，但你肯對我伸出援助，成功率點都高啲。」我答。


他盯住我雙眼，思考了很久很久，沒有十五分鐘也有三十分鐘。


終於，艱難地得出了一個回覆給我。


「我睇過間商場嘅平面圖，以我印象‧‧‧上面二樓係有一間好大嘅百貨公司，點都會有瑞士或者德國出產嘅生存軍刀，帶幾把俾我。」下一句，才是他的重點：「我講過‧‧‧‧‧‧不破尚曾經派過飛虎隊成員入去，我要你‧‧‧幫我喺佢哋條屍身上拎走哂有子彈、軍刀、手榴彈同埋槍械俾我，你將所有嘢袋好入一個大袋，然後放喺外面某一個隱蔽嘅地方，再同我講實際上地點，我會出去拎。」


原來不良人的撿屍癖，是出自對武器的渴愛。


難怪他們那麼喜歡去回收自己死去隊友身上的物資。


「冇問題。」我先說好一個有可能出現的情況：「但係講定先‧‧‧喺呢個世界，無論病者定人類屍體都好，只要隔一段時間‧‧‧‧‧‧佢哋就會好似憑空消失咁。」


「即係話條屍會唔見咗？」他問。


「以我經常觀察就係。」對於這問題，我也很疑惑：「至於點解，我就唔清楚，冇特登喺外面研究過。」


但我相信‧‧‧


一定有個原因。


因為在倖存區之中，屍體不會像在街外的一樣，隔一會兒就消失掉。


「好‧‧‧盡你能力。」他站起，說：「你坐喺到先，我一陣會帶多個對講機嚟俾你。」


一會兒後‧‧‧‧‧‧


他真的帶多一部精良的無線電對講機給我了，現在我手上總共有兩部。此外，他還教了我如何使用，例如轉換頻道什麼的。



現在生存率又高一點了。


之後，我去找了公仔並說及此事。


「出去外面嘅生存率‧‧‧就係要靠自己慢慢累積，搵番嚟‧‧‧明唔明？」我望住公仔。


「係‧‧‧老師。」


「王白蛋話會俾件武器你，有冇拎到俾你？」我問。


「冇。」


「去搵佢拎件武器吧，你唔可以兩手空空咁同我去對付病童。」順便，當訓練一下自己與人交際的膽量。


「我‧‧‧自己一個？」我看得出，公仔很沒自信。


「係。」


「‧‧‧知道。」公仔點頭。


原本我想找個耳塞來用，可這種東西不會無緣無故什麼地方也有，所以我只能找了隔絕外界聲音較遜的耳機來充替，希望不會出什麼大事。


公仔如我所言，去找了王白蛋要武器，但公仔拿回來的居然是兒童節目《幪面超人》的玩具劍，簡直把公仔他當成了是小孩，雖然我某程度上也認同。


「呢玩具‧‧‧就扔咗佢。」我交代公仔。


不良人果然都不可信。


「‧‧‧咁去邊到搵武器？」公仔主動問。


「你企喺到等我一陣。」我周圍望了望，入到去遊戲室酒吧。


望住裡面一些醉醺醺的壯漢，在胡言亂語、自說自笑、大呼大睡，連放在自己身邊的武器也管不好，就會得到被我盜竊的下場。


「軍用手斧‧‧‧‧‧‧」我望住從醉漢身上偷回來的武器。


斧刃用精鋼打造，似乎是高級的武器。