一個遇上女神，再忘記她的故事: Chapter 32

「李智傑!」突然法庭主任走出來叫喚我的名字，原來是被傳召的時刻，我和她們二人便先將剛才的恩怨情仇放下，一齊進入法庭聽審。
 
終於…我被判守一年行為。
 
聽完法庭宣判的結果後，CaRmen便先行離開，而我和Tracy則雙雙行到APM，沿途我們沒有拖手，沒有說話，只有如屐薄冰的徨恐，以及不停想著如果破冰的心思。
 
「Tracy，我...」行至APM的中庭，我終於忍不住開腔。
 
「我咩呀我?你而家當我死架?你背住我帶第二條女去宿舍?仲要係你以前女神?你有冇諗過我呀?有冇諗過我為你做幾多野呀?你咁做真係傷透我既心呀!李智傑!」想不到我一叫她，她便立即熱淚盈腔，連珠炮發的向我責罵。而且我亦未見過她是如此凶惡，甚至開始有途人駐足圍觀。
 




事實証明，一個有資格獲得Dean List的聰明女人，在遇到呷醋時智力便會大為降低，明眼人一早應該知道這是CaRmen的奸計，為何強如Tracy亦不能察覺?
 
「喂我冇呀!係佢自己無端端買壽司上黎食乍，我同佢冇野架!」我立時解釋。
 
「冇野?冇野你唔趕佢走?你仲記唔記得佢搞到你幾慘呀?你仲記唔記得佢以前係我地之間既陰影呀?我地辛辛苦苦先可以喺呢個陰影走出黎，慢慢搵番屬於淨係我地兩個既空間，你唔趕佢走不突止你仲叫埋佢入房?」
 
「喂你唔好咁橫蠻無理好冇呀?佢要入黎唔通我放狗咬佢呀?邊個對我好邊個對我唔好我唔識分咩?呢個擺明係CaRmen既毒計啦!」
 
「我橫蠻無理?係佢既計又點?如果唔係你自己有心你會中佢計咩?我橫蠻無理就唔會未同你一齊就管出管入?我橫蠻無理就唔會明知你心入面有第二個我都同你一齊!我橫蠻無理就唔會明知你上床都諗住第二個都仲同你扑野呀!哇~~~」Tracy說完，便跪在地上大哭起來，這情境，真的令我突然間措手不及。而且，亦彷彿令我看到當日崩潰的自己...那種抑鬱、那種痛…原來不只我一個人承受，Tracy亦同時承受著這種絕望。
 




「嘩乜呢個男人咁衰架...」
「係我就唔忍喇，同佢分手啦...」
「唉官仔骨骨原來係斯文敗類...」
「散啦，大家女人我撐你架!」
「我係男人都唔幫你呀...」
 
途人把矛頭全部指向我，令我啞子吃黃蓮，我真的沒有對CaRmen做過甚麼不軌的事，真的沒有，為何上天要用我雙手去折磨我的女人?只要我受苦便可以了，Tracy是真心愛我真心對我好的，要她受著這樣的痛苦，我的心真的很難受啊!
 
「李智傑，我問你，你而家仲係咪放唔低CaRmen?」Tracy邊哭邊說。
 




「唔係呀!」
 
「你坦坦白白認認真真，再答我一次!你係唔係仲未放低CaRmen!」這時Tracy突然向我怒睜。
 
我...真的答不出口...我知道如果我再次否認對CaRmen的思念，我和Tracy之間的一切便會有所轉機。
 
雖然我知道CaRmen並不是一個好女人，而且我亦恨她為我沒有選擇我。經過Tracy這段時間的陪伴，我的確把CaRmen的思念放下了百份之九十九，然而真的要切切實實回答我已經放下對她那百份之一的思念，我實在說不出口，這不但是欺騙自己，更加是欺騙Tracy。
 
問心，我對CaRmen仍然有百份之一的思念，仍然有百份之一的幻想，幻想我們可以把一切重來。但另一邊廂，我的確在這段時間深深地愛上Tracy，一個既聰明又體貼的女生。
 
Tracy不只是一個好女友，更是一個好老婆。體貼、溫柔、知足、聰明、善解人意，一切女性應有的美德都集合到Tracy身上。如果現在你問我，我一定會說我愛Tracy多於CaRmen，但要我欺騙自己已放下了她嗎?我真的做不到。
 
要忘記一個人，只有兩種方法，一是時間，二是忙碌，然而忙碌的意思，只是把你利用時間的密度增加，令自己減少對對方思念的時間，因此，說穿了要忘記一個人方法只有一個---時間。
 
Tracy見我沉默不語，大概已猜到背後的答案...




 
「我唔識做你女朋友呀...我好攰喇...我地分手啦...」Tracy絕望的說，說完便跑著離開。
 
我趕緊追上她捉住她的手，卻猛然被她觸及我的金剛圈。
 
「你放手呀!你守緊行為架，你唔放手我就告你襲擊我!」
 
這時我大概已沒有選擇的餘地，只有呆呆的，看著她從人群消失。當我定過神來時，已不知她在何方，不用說，她的手機早已關掉，再也找不到她。