一個遇上女神，再忘記她的故事: Chapter 31

終於到了上庭的日子，不要以為擔保完後等大約一個月便可以上庭，你的時間根本不值錢，法官大人的時間才值錢，在某地區犯案需要到特定的地方上庭，而法庭時間寶貴，當然將你的時間作為最低的考量，因此我在這段時間每次去警署報到，都只是做著轉擔保的程序。
 
我被傳召的時間是早上九時，我八時半便穿了整齊的西裝出席。原以為上庭的時間正正是九時，但我想大概普通襲擊罪普通得連法庭特別撥給你時間也覺無聊，因此我和其他犯人一直在庭外守候，每當有一丁點空餘時間便被召上庭審理。
 
「陣間你唔好串串貢對住法官呀，記住扮晒內疚咁呀。」Tracy在一旁指點道。
 
「我知喇，唔使扮我都已經好內疚啦。」我說道。
 
「嘩頂吖，爭啲遲到…」突然一把女聲在大門外傳來。
 




是CaRmen...
 
「吳嘉敏小姐，你又做乜喺度呢?」Tracy見到CaRmen，立時進入戒備狀態，直呼CaRmen的中文名。
 
「冇呀，呢單案係我報案既，咁作為良好既香港市民，我都想睇下個官點判架嘛。」CaRmen輕挑的道。
 
「咁你又知Henry今日上庭?」Tracy邊說，邊用眼尾望著我。
 
「乜你好唔想比人知咩?慘得過Henry自己親口話我知既。嗰日我帶左壽司上Henry間房食，佢食食下咪講囉。但Tracy，我地真係冇野架，雖然你男朋友以前好愛我，我又唔知佢而家係咪仲鍾意我，不過我同佢之間真係朋友關係黎架乍。」CaRmen繼續以攻擊者的姿態作出挑釁。
 




「喂，你唔好講啲唔講啲喎。」我為求清白，立時出聲澄清。
 
當一個女人下決心爭奪想要的東西時，她的恐佈程度絕非男人可以想像，CaRmen在之前對我忽冷忽熱，但到我離開她時，她卻以侵略者的姿態出現，尤如一個小朋友跟另一個小朋友在爭玩具一樣。我相信這情況，男人十居其九都是百口莫辯。尤如現在的我，寧願把這件事情順便交給法官給我審理一樣。
 
「智傑，話我知，有冇件咁既事。」Tracy語氣低沉的說。
 
「......有......但係...... 」我正想向她辯解，便被她阻止。
 
「得喇，唔使講，有乜等審完再講啦。」說完Tracy便鐵青著臉，一屁股坐下，我正想坐在她旁邊，好讓我有機會向她作進一步解釋，但她卻突然說「污糟呀!唔好坐呢度。「究竟她是說我這人很污糟，還是那張椅子很污糟?我也不知道，我唯有遠遠坐在另一個位置。CaRmen則正正坐在Tracy對面走廊的另一旁，在庭外的氣氛立時降至冰點。
 




三個人，懷著三種心情，臉上掛著三個面色。
 
Tracy一直鐵青著臉，想必一定要怒火中燒，今晚一定有夠我好受。
 
CaRmen一直以輕鬆的態度邊笑邊望著Tracy，像在心裡說著「我是勝利者「的模樣。
 
而我，則誠惶誠恐地坐在一旁，低頭望著膝蓋，盤算著這對膝蓋可以承受到多久的跪玻璃之刑。
 
「CaRmen...不如...不如...你番去先啦...」經過一小時的冰點，我終於鼓起勇氣打破沉默。
 
「唔得，我地話晒識左咁耐，你以前又對我咁好，我都想比啲支持你架嘛。」CaRmen回答。
 
「唔使喇，我女朋友喺度得架喇。」我回答，CaRmen，你究竟對我有甚麼居心?你還要玩弄我玩到甚麼時候?






「咁唔係咁好既。」
 
「得!你唔使走，我走!」Tracy說完，便立即起身打算離開裁判法院。