一個遇上女神，再忘記她的故事: Chapter 22

「我上預科嗰年，識左個男仔，佢大我十年，係我嗰陣既私人補習老師。起初我地都係好似平時老師學生咁補習，但我地開始慢慢熟絡左，傾多左私人野。再之後我地開始一齊出街，嗰陣佢都冇追求過我，我地自自然然就一齊左。
 
嗰次係我既初戀，每個女人都對自己既初戀抱有期望抱有幻想，我都唔例外，但我既初戀冇經過人地熱烈既追求就付出左，都冇所謂，但求以後可以同自己男朋友一齊就夠。
 
其實我地嗰陣仲Keep住有補習，但始終係戀人，我地補習時專注喺學業既時間越黎越少，反而喺屋企做好多情侶做既事。我都唔怕話比你聽，我嗰陣比左隻豬佢。
 
之後大約經過半年左右，我地感情出現問題，佢開始對我越來越冷漠，後尾仲同我提出分手。我問佢點解，佢死都唔講。
 
到最後比我Find Out到，原來佢識左另一個補習學生，嗰個女仔係獨生女，佢爸爸已經六十幾歲，係一間中小企老闆，有十幾層樓渣手，你都估到做佢女婿都應該會衣食無憂，所以佢好快就溝左嗰個女仔而唔再理我。
 




我嗰刻好唔開心，我問個天點解喺我第一次拍拖就會遇到呢啲衰人?點解佢要向錢看?係咪因為我係住公屋我窮所以唔值得男人愛?我好唔甘心，所以我同自己講，女人既幸福，係要用自己雙手去爭取番黎。
 
我Down左一排之後，開始爬番起身，我唔想再相信男人，因為我已經Default左男人係有機心，如果女人要活得好，就要靠自己，所以我好努力咁讀書，由原本會考得14分，努力讀到夠資格升讀大學，到最尾皇天不負有心人，我入左黎城大。但我都冇放慢，我既目標係Dean List同First Hons，我想畢業後個Profile靚啲再去P&G、Unilever呢啲大公司做，咁我就唔使靠男人都可以得到幸福。」
 
她說了一大輪，跟喜歡我也沾不上半點關係，難道Dean List的人都是思想奇特的嗎?
 
「咁同你鍾意我有乜關係? 」我忍不住問。
 
我問完後，Tracy便開始故事的下半場。
 




「我一直以為我可以做一個女強人，但直至遇到你，開初一個陌生同學仔託我發短訊送玫瑰花，我以為都係一啲玩玩下既幼稚愛情遊戲，雖然我唔信愛情，但我都唔想潑你冷水，所以我都應承左你。
 
但到睇你嗰日既Slide Show、同埋聽你講你同CaRmen既認識、你對佢示愛既準備、你對Karl既反應，令我深深咁覺得，你真係好愛CaRmen。
 
再之後聽番熊仔同埋其他Marketing既同學講，先知道你原來中間為左CaRmen做咁多野，我嗰刻真係好妒忌佢，點解有一個男人可以對佢咁好而且咁長情?同時我又好鄧你唔抵，點解一個咁傻更更既人，用左咁多努力都得唔到佢應得既愛?
 
慢慢，我開始欣賞你，到我同你傾多左偈，甚至乎我已經愛上左你。
 
我既心態係，女人既幸福係要由女人一手去爭取，但唔代表女人要一直單身，我決定爭取自己幸福番黎，我希望得到你既愛，所以我唔介意叫你起身，幫你買廁紙，借Notes比你。我以為我可以做一個女強人，但當遇到一個自己愛既人之後，女強人只係我強加比自己既角色，爭取到嗰份被愛感覺後，我唔介意歸於平淡做一個小女人去Support你。
 




你可以話我主動話我唔知醜，但我唔會理任何人，包括你既睇法，我只係想爭取我自己想要既野。但我亦都冇諗住咁快同你示愛，因為我知你未放低到CaRmen，我應該等你慢慢丟淡件事先向你表白。不過愛一個人最基本既要求係對佢坦白，如果你問我係咪鍾意你，我一定會誠實咁答你，係!我係好愛你!
 
你係我經過上次感情創傷後可以醫番好我既人，你對愛情既堅持、固執、忍耐，令我覺得，你係我想搵既男人。而你，亦都令我再次相信愛情。」