一個遇上女神，再忘記她的故事: Chapter 14

「李生，大個仔架喇，你喺法律上係成年人，我地冇必要將呢件事同你父母講，而作為成年人，你都好應該為自己既行為負責，唔好做一個有事要求救就搵父母既人，更加唔好做一個踩左屎就怕比父母知既人，同自己交代。OK? 」
 
張Sir說完，我再次哭了，我一直只是從CaRmen的角度出發，卻從來沒有想我每一個決定每一個行為要為未來的自己負責。這一刻我大概明白，我不能再將CaRmen放在第一位。
 
最後，我致電給軒仔來旺角警署保釋我，從此我便要過著所謂揹擔保的生活，亦倒數著上庭認罪的日子。
 
「嘩!乜你溝女溝到咁大鑊架? 」軒仔接我後立即問。
 
「係我衝動啫，我唔出手咪冇事囉。」我回答。
 




「你知自己衝動就好啦，Henry哥，為女死為女亡唔係真係咁型架乍，今次比你好彩行番出黎保得到你，上完庭守一年行為冇事，下次真係入冊咁點呀?係咪要真係出左事先黎後悔呢?
 
自從知道你鍾意CaRmen之後，你成個人迷晒落去，完全唔對版，根本冇左自己，係呀，你係變左好多，由內向變做積極健談，但你同時冇左一樣好重要既野，就係你自己既本質。要吸引人唔係改變自己成為佢想要既模樣，吸引人係將自己做到最好，發揮自己最大既優點呀。」
 
「我知你為我好，呢一刻你比我個腦停下啦。」
 
「知啦，個腦要停個口都唔好停，你今日成日喺差館肯定冇食過野啦，落德興打邊爐啦。」
 
一圍火煱，兩支大啤，五個男人...
 




我、阿偉、軒仔、達哥...還有熊仔...
 
「喂Henry哥，你做左我地學校既男神喎! 」甫一到埗，熊仔便語帶興奮的對我說。
 
「爭啲入冊仲做男神? 」我驚訝道。
 
「你有所不知喇，雖然你今日咁Rock既行為令到好多人反感，但又有唔少女仔覺得你為左CaRmen做咁多野好偉大，係一個好好既男人，做你女人一直好幸福嗰隻。有好多女仔仲話想識你添，你番到學校大把Fans啦! 」
 
熊仔說得微飛色舞，彷彿告訴我一件錯的事，是多麼的偉大，多麼的感人。而我，卻不以為然。
 




「咁又點啫!感動到佢咩?其他女仔鍾意我又點?我最愛嗰個咪又係當我透明?」我反駁說。
 
「唉!其實CaRmen呢個女仔又有乜咁好呀?」熊仔嘆氣道。
 
「CaRmen有乜唔好，兄弟，講下!」達哥插咀道。
 
「係囉係囉，講黎聽下啦。雖然係中學同學但我都唔係同佢咁熟。」阿偉和軒仔附和著。
 
「唉!Henry哥，係兄弟既啱聽就聽，唔啱聽就當我冇講過，OK? 」熊仔說。
 
「得啦長氣。」
 
「是咁的，其實之前我同阿偉講既野，全部都係真架，我地嗰陣去完O Camp之後佢同佢個組爸已經行得好密架喇。
 
個組爸叫Karl，即係你郁手打佢嗰個呀，屋企算係有啲錢咁啦，個人又幾靚仔。咁CaRmen都叫有啲姿色，Karl咪溝佢囉，點知佢又受喎。咁其實一個普通女仔又點會唔受吖，人地出親街食飯睇戲直落全部比晒錢，大時大節名牌手袋呀靚衫呀照送比佢，係女都受溝啦。」熊仔將他們的關係娓娓道來。