一個遇上女神，再忘記她的故事: Chapter 6

宇軒，一個在這兩年間經常在我耳邊甚至心入面出現的名字，一個我的情敵，一個我最愛的人的最愛的人，第一次出現在我眼前，宇軒，一個不認識我，而一直影響我的人，我第一次看你…
 
如果大家有經驗，接觸一個你最愛的人的伴侶，你一定會在這時覺得被比下去，不是因為他真的有甚麼比你優勝，而是你會暗地裡認為，當那個女的選擇上他而沒有選擇上你，一定是有甚麼原因的。男生是一種愛比拼的動物，既然心儀對像已經落入別人手中，又如何沒有被比下去的感覺?
 
但此刻，我沒有這種感覺，甚至乎一點負面情緒也沒有…
 
因為我嗅出，宇軒身上沒有優勝者的氣勢…
 
甚至乎，我俩共同的對像---CaRmen，她的氣勢已壓倒了宇軒…
 




「有冇發覺，入左U之後，大家距離好似遠左? 」點了飲品後，CaRmen首先開腔。
 
「我知，你講左好多次啦，你嫌我讀唔到Degree吖嘛，我可以努力吖，雖然而家淨係入到副學士，但出年可能升番上Degree架喎，我GPA今個Sem都有3.3，上番Degree唔難喎，你唔使驚我襯你唔起喎。」宇軒一開始便激動的說，我想他們在見面前已為此事爭執過。
 
「我唔係講呢樣囉! 」CaRmen提高八度說。「我覺得…其實大家入左唔同既學校之後，大家好似望既世界唔同…其實呢個問題已經存在左好耐架喇，好似咁，我平時放學就去Main Campus聽Business Leader Forum，聽下啲GM呀CEO呀分享成功之道，而你就貪近Poly叫我去科學館陪你去睇機械展，你覺得，我地係咪要好好地咁傾下? 」
 
「得!我知!我係Engine仔吖嘛，我讀Engine唔睇呢啲可以睇邊啲呀?咁你讀商科聽呢啲講座都啱架喎，唔通一齊去睇大戲呀? 」宇軒依然辯解說。
 
「You don’t know me宇軒，你咁講我地個世界真係好唔同，就好似咁，我覺得貴買平用所以用Gucci LV唔係咩大問題，反正一用就十年八年，除非有人送個新既比我啫，但你又成日貪平用埋啲East Pak袋，I am not talking about money，but you know…我地個價值觀真係好唔同呀。」說罷，CaRmen低下頭望著手中的紅豆冰。
 




「得喇!一句講晒你都係嫌我冇錢冇學歷想分手啫，OK!分囉!不過我話你知，我今日冇錢、冇學歷，他朝一日我一定會有，而你，當日比我破左處，你呢世都唔會係處女呀! 」宇軒說罷，便在銀包拿出一張一百蚊。
 
「錢呀!唔使你埋呢張單呀! 」宇軒怒哮後，便頭也不回的離開翠華。
 
宇軒離開後，我和CaRmen呆呆的坐在翠華，足足三十分鐘。
 
「走啦。」CaRmen首先打破了沉默。
 
然後，我們行到上環的海傍，邊走邊吹海風。
 




「你一定覺得我係貪新忘舊，水性楊花啦。」CaRmen說道。
 
我不語。
 
「其實宇軒份人就係咁，A Level嗰陣成日唔讀書，搞到而家讀副學士，我都叫左佢呀比心機讀書架啦，係唔聽，好喇，而家讀副學士，我想佢積極啲啫，又話我功利，我根本唔介意佢讀副學士唔介意佢冇錢，我只係介意佢唔上進乍嘛。」CaRmen繼續說。
 
「嗯。知道。」我不知道可以回答甚麼，唯有簡單的答一句。
 
「你唔明我? 」
 
「我明…」
 
「咁…你會唔會繼續喺我身邊支持我架?」
 
「會，一定會。」




 
「多謝你呀傻佬。」說完，CaRmen便倒在我的懷裡。
 
這是她第一次攬我，那種甜蜜，那懷內的充實，令我一世難忘，我第一次感受到她頭髪的香氣、第一次感受到她的呼吸、第一次感受到她胸脯的起伏、第一次覺得…那一直期待的機會，似乎越來越近，只要再近一點…再近一點…
 
我嘗試著給她一個親吻…我一直把初吻留下，希望可以給她…今天，兩個人在海演公園，面對著維港浪漫的景色，會是一個機會嗎?
 
「喂!衰人，你做乜野! 」CaRmen怒道。
 
「下…我…」我立即不知所措。
 
「你唔好乘人之危呀衰人。」CaRmen說完便用力地打我。
 
「唔好呀法官大人…」