「無啦啦多左幾個家姐同細妹 Season 2」: Extra 特別

我：「係你安排佢黎機場搵我？」

我一個人坐係閘口附近既櫈講電話，而電話另一邊既係我唯一既家姐，最鐘意整古做怪既家姐。

家姐：「嘻嘻，我唔明你講乜喎。」

我：「唔洗扮野啦，個傻仔有話過佢好好彩屋企門口有部的士停係度所以佢先可以咁快黎到呢度，肯定係你一早call定俾佢架啦。」

「唔洗問連D櫃位資料都係你話佢知架啦。」





家姐：「哈哈點解我個妹會咁聰明架，咩都瞞唔到你既？點解你唔會諗下係Daddy既？」

我：「邊會係佢，佢唔係個D咁細心既人，如果佢係，當初媽咪就唔會…」

家姐：「OK Stop!我地唔係話過唔再講呢個話題架咩？況且我都解釋過好多次啦，咁多年你都仲係唔化都有既。」

我：「唔知呢，我就係無辦法完全原諒佢，阿明黎咗之後就更加原諒唔到，話時話點解你要俾佢黎搵我？」

一講起Daddy同媽咪既事，我就忍唔住握緊拳頭，諗起都嬲。





家姐：「無啊，想睇下如果係佢既話有無辦法令你改變主意啫~~我諗而家都係得阿明有咁既能力~」

我：「家姐…我咪話咗我係…」

家姐：「我知啊，但其實你心入面都想佢黎搵你，唔係咩？」

一時之間，我無言以對，唔知應該點答佢先好。

沉默咗短短十幾秒，電話就傳黎家姐既笑聲。





家姐：「你會唔識反應真係好少見，睇黎我無講錯。點呀？見到佢出現係自己係面前個一刻有無覺得好感動，有無即刻覺得自己似電視劇既女主角？」

我：「家姐…玩夠喇唔好再講…如果俾Sarah佢地聽到就麻煩。」

其實俾家姐咁講一講，自己重新再諗返頭先既畫面，又真係幾似，特別係佢轉身望過黎個下。

一諗到咁，我就忍唔住笑咗出黎，俾坐係我對面既小朋友用一個疑惑既眼神望住。

家姐：「放心喇佢地而家陪緊羽晨玩七級豬等阿明返黎，而家唔係我旁邊。」

「阿明真係有種神奇既力量，自從佢黎咗之後，我地成家人都變得好開心，好似終於似一個正常既屋企咁。係呢，佢…有無同你講D乜？」

我：「啊，都講咗好多。」

「佢真係傻得可愛。」





之後再同家姐傾咗好耐，內容全部都係圍繞阿明。

佢不停咁問阿明到底同我講咗D乜，而我亦一一咁解答佢。

無辦法啦，鬼叫佢係我家姐，佢既要求我成日都無辦法拒絕。

不過咁樣複述一次，令我再重溫咗一次頭先既畫面。

又忍唔住笑咗出黎。

個傻仔講完鐘意我之後個慌張樣，之後又用盡一切方法去兜個樣真係好好笑。

同我個陣唔小心衝口而出之後冷靜咁兜真係差D共地，小朋友就真係小朋友，所有野都放哂係塊臉度。





不過…係囉就咁算啦。

家姐：「好開心吖可？最後佢出現係你面前。」

我：「啊…的確係有驚喜，我承認個下係好開心既。」

家姐：「哈哈，唔想係最後既話咪留低囉，阿明佢咁神奇，之後既日子肯定會再俾更多既驚喜你。」

我：「唔好玩啦，我而家已經坐咗係閘口啦，況且我咪話過囉，我會返黎既。做乜你地一個二個都講到我以後都唔返黎咁。」

家姐：「咁係吖嘛，你買單程機票喎…」

我：「咁係因為我都唔知道要幾耐嘛，媽咪既遺願要用幾耐時間先完成到邊有人知。」

家姐：「你真係要咁做？唔知要用幾多錢架喎？」





我：「無問題啦，錢已經唔係問題，唔洗擔心我。」

家姐：「係喎，咁最後，最後既最後你又有無同佢講？」

聽到家姐咁問，我臉不自禁咁紅起黎，因為我諗起自己做咗D乜。

啊而家諗返都有D後悔，雖然佢係蠢啫，但做到咁佢會唔會發現架…

家姐：「喂？喂？聽唔聽到呀？」

我：「我問佢我係咪佢心入面，之後錫咗佢一啖，仲叫佢唔好話俾Sarah佢地知…啊我到底做咗D乜呀…」

我好細聲咁講，但家姐聽到就好大聲咁笑，兩者形成咗一個好強烈既對比。





家姐：「睇黎就算係你，係呢D環境氣氛下都忍唔到呀。」

我：「慘啦慘啦，今次麻煩啦。」

家姐：「放心啦，你講到咁佢未必明既，只會以為係你呢個二家姐奇怪既道別方法啫。」

「有無打算返黎真真正正表白一次？」

聽到家姐咁問，我愕一愕然，因為我自己完全無諗過呢個問題。

不過我好快就得出答案，望住一架飛機慢慢升上天，飛向夕陽之下得出呢個答案。

「唔啦，唔會啦，就算我返黎之後都唔會講，我會用我自己既方式，特別D既方式去表達呢份感覺。」

「有種愛唔一定要講出口同係身邊，只要自己知道就可以喇。」


-完-