「無啦啦多左幾個家姐同細妹 Season 2」: 坦白

喂…做乜野會無啦啦話去我度打邊爐架…你到底係點得出呢個提議？

我屋企離呢度好遠架喎…仲要無車可以直接去到…

老老實實，要拒絕阿希呢個突如其來既提議真係可以有千百萬個理由。

但問題係，Ellie同Yui對於呢個提議好似好感興趣，我見佢兩個都眼甘甘係度等我答。

我：「我就無乜問題既，但我要問下我屋企人先，同埋我屋企離呢度好遠架喎…你最好做好心理準備…」

阿希：「嗱一於咁話啦，我去班馬先！喂Cody姐，你有無興趣呀？

」

Cody：「我就唔喇，返屋企…」

阿希：「好喇預埋你喇，而家有黑仔，浩賢，我，Bella，Fanny仲有你，計埋阿明就七個人，呀仲有Kathy！

」

喂喂喂，呢條友真係完全唔理人架喎，無論係我定Cody講既野，佢都好似聽唔到咁。

唉，睇黎都係阻止唔到架，都係打個電話比屋企問下先。

打咗返去，唔係老母聽電話，而係大家姐聽。

我好簡單咁解釋咗一次事情既來龍去脈比大家姐知，佢聽到之後把聲好興奮，係咁話好，叫我地快D黎，仲問我洗唔洗叫蘭姨買定D靚海鮮又或者叫車黎接我地。

點解大家姐好似仲興奮過我地咁既…

我：「喂你好彩喇，我屋企人話無問題，你地係咪要黎？

」

我講完就望咗去Ellie同Yui個邊，對佢地苦笑咗一下，佢兩個都以笑容回敬。

我諗都係時候話俾阿希佢地知喇。

之後我地係運動場門口集合，加埋Sarah佢地都有十幾人。

唔知咩原因，大家對可以去我屋企打邊爐都好興趣，係因為個地點定係活動？我唔知。

齊人之後，我地就去街市買野，因為我唔想麻煩到蘭姨，加上買料都係打邊爐既樂趣之一。

前前後後買咗一個鐘頭多D終於買齊，終於可以返屋企。

由於我地人數眾多，所以我地要分開四架的士先得。

不過最後我地幾乎都係一齊到屋企。

佢地見到我間屋企既第一反應令我諗起我第一次黎呢度個陣，都係呆咗咁款。

入到屋之後阿希既反應更令我同Sarah忍唔住笑咗出黎。

阿希：「嘩好大呀…

」

阿希講完之後即刻就比Cody踢咗腳，問佢可唔可以唔好咁失禮，搞到大家都笑咗出聲。

聽到我地笑得咁開心，大家姐都知道我地到咗，彈下彈下好似個細佬女咁走咗出黎歡迎我地。

Eh…各方面都彈下彈下喇你明既。

大家姐：「你地好呀~~快D入黎坐喇~~

」

見到大家姐之後，唔止阿希，黑仔都嘩咗出聲，不過都係可以理解既，大家姐咁正，係人見到都會有咁既反應。

因為大家姐既熱烈歡迎，大家都紛紛走咗入大廳，係梳發附近留連，好拘謹，同係學校個陣完全唔同。

我叫咗佢地隨便坐幾次，但佢地好似聽唔到咁，特別係阿希，佢而家好似石化咗咁，郁都唔郁。

我望一望Yui，向佢打個眼色，希望佢幫手解決下呢個難題。

我既Yui咁聰明體貼，又點會唔明我意思吖，佢一接收到我既信號就有所行動，好親切咁帶咗一班人去廚房放低D料。

最後，係客廳既就只有Cody，Kathy同浩賢。

大家姐又唔知係邊度彈出黎，今次係搵Kathy。

大家姐：「點呀Kathy~今日陸運會好唔好玩？

」

點解會係問Kathy而唔係問我架大家姐…

Kathy：「呃…幾好啦可惜落雨，搞到賽事要腰斬。」

大家姐：「係啊？咁真係可惜囉，係呢不如你跟我黎吖，我知道你地會黎所以特登整咗D蛋糕呀，你黎幫我試下味吖~~

」

就係咁，Kathy都比大家姐拉走咗了。

Cody就係呢個時候走咗埋黎，捉住我。

Cody：「喂點解你家姐都會識Kathy既？你條友唔通連Kathy都…」

我：「喂絕無咁既事！！我屋企人識Kathy係因為其他野，唔係因為我有溝佢呀！

」

Cody聽到我解釋先肯放手，但諗深一層，點解我要同佢解釋？佢又唔係我邊個。

係我思考呢個問題既時候，我見到Anna居然拎住袋行緊去門口。

見到咁既我梗係咩都唔理衝上去截住佢啦。

我：「做乜呀你？要走？」

Anna：「廢話呀？我拎住袋行黎門口唔係走唔通去洗手間咩？

」

我：「但係就快開始打邊爐啦喎，你唔一齊食咩？」

Anna：「唔啦，今日淋雨淋咗咁耐搞到個人好攰，我想早D返屋企沖涼休息。」

我：「真係只係因為咁？無其他原因？」

Anna：「哈，呢個你就自己估下啦，

咁近唔洗送啦，今晚玩得開心D。」

雖然佢係咁講，但我最後都係送咗佢返屋企，學佢話齋，咁近，送埋返去都無乜所謂啦。

送佢返去既途中，大家一句野都無講，一直都只係望住個地下行。

應該話我唔知應該講乜先好。

又係因為好近，所以好快就到Anna屋企門口。

佢用個背脊對住我，望住自己間屋但又唔入去，感覺好奇怪。

我：「Anna

」

Anna：「要贏呀知唔知？如果唔係我真係唔會原諒你架。

」

佢講完無等我答就自己返咗入屋，留低我一個on99咁企係度。

佢…岩岩講咩話？

我唔肯定自己聽咗D乜，迷迷糊糊咁一個人行咗返屋企。

都未行到去飯廳就已經聽到阿希仲有大家姐把笑聲，做咩事笑得咁開心呢？佢地無等我就開始食咁衰仔？

因為好奇所以我加快腳步行去飯廳，行到去只見大家一片歡騰，大家姐甚至自己拎住成支紅酒係度飲。

係我唔係度呢十分鐘到底發生咗咩事…？

大家係我唔係度既呢度時間已經同大家姐打成一片，仲有二家姐同羽晨都落咗黎一齊打邊爐。

大家仲要開心投入到連我返咗黎都唔知，繼續食，傾計同笑。

好彩得我個位可愛又趣緻既細妹羽晨發現到我，好可愛咁企起身指住我，大家先發現到我返咗黎。

阿希：「喂阿明返黎嗱？我地見水滾所以無等你就食往先喇，你都快D過黎食啦！」

喂…做乜搞到好似呢度係佢屋企而唔係我屋企咁既…

我傻下傻下咁行過去飯檯，坐係Sarah同Yui中間，加入佢地一齊食。

原來細心既Yui有為我夾起定D野食，等我可以唔洗殺入戰場都有得食，真係令人感動。

大家姐：「哈哈哈，咁開心一於等我入去拎多幾支酒出黎同大家一齊飲先~~」

大家姐好似真係好開心咁喎…不過唔意外既，幾乎每次有親稍有規模既Party聚會佢都會特別開心興奮。

二家姐：「喂家姐…佢地未成年架，唔好比酒佢地飲喇…

」

大家姐：「有乜所謂啫大家圍內食飯飲下酒開心下咋嘛，難得阿明肯帶同學返黎開party，大家話係咪？

」

大家姐講完就高舉支酒，好似D嗌緊選舉口號既候選人咁，大家反應都好似D支持者咁歡呼。

二家姐面對群眾壓力都無哂辦法，唯有跟住大家姐一齊去酒櫃拎酒，留低我地繼續食。

頭先大家既拘謹怕羞而家已經完全唔知去咗邊，真係當咗呢度係自己屋企咁嘻嘻哈哈，𣈱所欲言。

阿希：「阿明你就唔岩啦，有個咁靚咁大既屋企仲有兩位咁靚既家姐都唔請我地黎玩，真係唔夠朋友。

」

黑仔：「係囉係囉你就正啦，有幾個女朋友，仲要有一個咁爽朗既大家姐，一個咁cool既二家姐，直頭係人生贏家啦。

」

痴線講到人生贏家咁誇張，雖然我有時都會覺得自己好幸福既哈哈。

我：「因為我怕我講出黎你地會以為我吹水，以為我睇我迷失在這場愛情遊戲睇上腦，所以我咪一直唔講囉。」

「話時話，點解會係打邊爐？大家出去食都可以好開心架。

」

阿希：「啊，呢個問題問得非常好，係關乎一個崇高既理想。

」

打邊爐拉到去乎一個崇高既理想？呢條友又發乜神經？

睇到Cody搖頭嘆息，我就知道一定唔慌係好野。

照阿希既思考邏輯去諗的話，肯定係一D中二病既野啦。

羽晨：「係咩呀係咩呀？

」

真係得羽晨一個先會想知阿希d低能野。

阿希：「哈哈，呢個理想就係！！延續5C班既傳統！！

」

5C既傳統？佢又想講咩痴線野呀。

阿希：「之所以要係打邊爐呢，係因為上年藍洛晨同佢既5C班都係係陸運會之後就去咗打邊爐，所以身為今年5C既我地，好應該遵守呢個傳統，大家話係咪？

」

你有無咁崇拜晨哥呀…你以前唔係輸過比佢咩，仲咁崇拜佢？

無人理佢，大家都掛住食，尤其係蘭姨準備既海鮮，特別搶手。係得羽晨會拍手鼓勵，小朋友真係可愛。

阿希都自覺無癮，繼續食野。

呢餐邊爐大家都玩得同食得好開心，大家姐仲同班女仔玩得好投契，送左一人一隻桶叔叔比佢地。

至於阿希，黑仔仲有浩賢三個就同我玩鋤Dee，仲用張大圓檯玩，搞到個feel真係好似拍緊賭神咁。

Sarah同Ellie仲要企係我後面，好似拍戲D靚女會係你身後面助陣咁

真係估唔到原來請佢地係可以玩得咁開心，仲以為會好尷尬添，睇黎係我諗太多喇。

開心既時光過得特別快，唔覺唔覺就玩到十點幾，都係時候送佢地走。

阿希：「喂下次都黎你度玩喇，你話好無呀Cody姐？