「無啦啦多左幾個家姐同細妹 Season 2」: 知錯

我第二朝一早就去左Ellen佢地屋企，想正正式式同佢地道一次歉。

Ellen好爽快咁接受左我既道歉，仲笑笑口咁拍左我頭一下話唔緊要。

至於Ellie呢…佢就無乜反應，木口木面掂行掂過。

之後我成程車都不停撩佢氹佢，佢都無表示，只係一直望住窗外既風景，連Ellen都有D睇唔過眼，幫我口。

Ellen：「Ellie你就原諒阿明喇，佢真係知錯架喇，你咁又何苦呢。

」

就算係Ellen出到聲，Ellie依然不為所動，直至我地落車，佢先同我講左一句野。

Ellie：「放學可唔可以陪我去探嫲嫲？」

我：「梗係可以！！

」

我知道要佢即刻原諒我可以話係不可能的任務，不過咁算係一個好開始？

之後，我地就各自各上堂，好快上左幾堂，而家去到體育堂，同Anna個班一齊上既。

Anna仍然係度練習緊跑步備戰陸運會，我就係一邊睇，仲同阿希佢地吹水。

阿希：「唉今次仆街嗱始終都湊唔夠人跑，唔通真係要未戰先輸？」

睇黎阿希仲係好執著個學會接力咁喎。

黑仔：「咁你咪叫浩賢陪我地一齊跑囉咁簡單。

」

阿希：「唉唔好搞佢喇佢都唔鐘意跑步，同埋佢自己都要做工作人員。」

黑仔：「咁真係無辦法架喎，唯有放棄等下年囉。」

阿希：「等下年啊…下年我地都已經Form 6，到時都唔知仲有無動漫soc…

」

阿希講呢句既時候托住自己下巴，語速仲好明顯減慢左。

我偏偏係呢個時候諗起自己尋晚講既野。

就盡下人事喇。

我：「喂不如寫住Kathy個名落去先？起碼交左份名單先算，之後再去試下搵人跑。」

阿希：「吓咁真係好咩？Kathy佢都咁耐無返學，寫佢名頂檔會唔會唔係咁好呀。

」

我：「可能到時Kathy會突然出現呢？如果到時真係唔夠人先放棄囉，起碼唔好而家就放棄。」

我講完之後大家都靜左一靜，你眼望我眼，似係考慮緊我既建議。

阿希：「就咁決定喇，我再落力D去叫佢地再考慮下跑唔跑。

」

我：「今次我都幫手啦。

」

黑仔：「唉見你咁恨參加，我都幫手喇。

」

阿希：「好！一定要搵到人跑！！

」

阿希佢即時生猛返哂，真係搞笑。

Anna：「你地幾個傾乜傾得咁開心呀？」

嘩Anna幾時走左埋黎架！？

阿希，黑仔：「Anna哥你好！！」

喂屌你兩個，呢句係禁語黎架！！

我即刻望下Anna，佢已經黑哂臉。

Anna：「陳煒明…！」

喂真係唔關我事架！！！

儘管我極力否認，想同件事劃清界線，但係Anna而家好似著左魔咁，我講咩佢都聽唔到。

佢走到去我面前，一腳踢落我個肚度。

如果要我搵相似既情境去形容既話…就好似《機動戰士高達UC》第二集入面新安洲一腳踢落Unicorn度咁，諗起都有九成似。

我既反應當然都同駕駛倉入面既巴納吉一樣，即時想嘔。

Anna強而有力既力既一腳除左令我想嘔之外，我仲捱唔到跪左係地下。

阿希同黑仔見到Anna驚人既舉動之後都即刻唔出聲行開，我仲見到呢兩條仆街掩住嘴偷偷地笑。

正仆街黎，我肯定佢兩個知道呢句係禁語，佢地一定係想知道到底會有乜後果先專登講。

Anna：「個兩個係你朋友黎，即係話係你話佢地知Anna哥呢個花名架啦！

」

佢緊握拳頭，準備再送我一拳。

我：「唔係吖真係唔係我！！我可以發誓真係唔係我講！！如果係我講既話我就爛手爛腳！」

我既毒誓似乎起到作用，Anna聽到之後打左個突，表情仲有D驚。

嗱不過我要講明先，我呢個毒誓唔係為左嚇窒Anna，我真係無做過架。

Anna：「咁又唔洗既…其實諗落好小事啫…都只係花名一個…

」

屌，你呢幾年唔係咁諗架喎！！點會無啦啦轉立場都有架。

不過原因就無謂拆穿啦，我唔想真係比人打到嘔呀。用另一個角度帶過件事令佢感覺舒服D算喇。

我：「我諗D人可能見你咁型所以先改呢個花名俾你架啫，唔好唔開心喇。

」

Anna：「唔得，我諗起呢個花名始終都係好嬲，俾我知道邊個改既話我一定打佢一鑊甘既。」

我：「唔好搞出人命呀記得，係得我一個先受到你既拳打腳踢咋。」

Anna：「懶叻，係本小姐我留力咋，如果我認真既話你早死左喇傻仔明。話時話Ellie原諒左你呢個人渣未？

」

我：「喂用人渣稱呼我好hurt架…

我諗算叫做開始原諒掛，佢叫我放學陪佢去探佢嫲嫲。」

Anna：「你呢排要好好陪住佢啊…呢段時間對佢好重要，我好清楚…唉我都係繼續練跑先！你過黎幫我計時！

」

Anna講得好岩，呢段時間Ellie好需要人扶持。

我會做好呢份工！

係Anna仲有Sarah佢地既再三提醒同叮囑下，我一放學就即刻走左過去隔離班房搵Ellie接佢。

其實就算佢地唔講我都會記得啦，今次既事係認真架唔係講笑。

今日我就連阿希佢地話請我食lunch我都堅拒，點都同Ellie佢…佢地食。

Btw，Ellen又話要食譚仔，真係想死。

Ellie好快就同Yui一齊出黎，表情仍然係好cool無感情咁款。

Yui：「咁我去學生會搵Ellen先喇…陸運會同班際閃避球比賽仲有好多野要搞…」

我：「嗯，走個陣打比我喇。」

簡單咁同Yui道別之後，我就再一次將注意力放返係Ellie身上，佢雙手放係身後，臉就望住走廊既盡頭，無同我有任何眼神接觸。

我：「可以行喇Ellie。」

Ellie無開聲應我，只係自己開始行，我就唯有快快跟係佢後面。

佢好似裝左摩打咁，行得快到飛起，可能仲快過平時佢跑步。

不過咁都可以理解既，佢咁擔心佢嫲嫲，佢心入面一定係想儘可能早一秒見到佢嫲嫲都好。

我地離開左學校之後就即刻截左架的士，一上車司機大佬就問我地要去邊。

係喎，Ellie嫲嫲係邊間醫院我都唔知添。

Ellie：「去養和醫院吖唔該你。」

佢把聲…唔通佢係學校個陣喊過黎？唉呀我可以點做呢，遞紙巾比佢？仆街我頭先去痾屎用哂添，唉屌點解世事可以咁巧合架。

唉雖然咁做係有D突兀，但都係試下，希望佢唔好推開我喇。

我輕輕咁伸手繞過佢，再輕輕咁捉住佢膊頭，令佢挨落我度。

謝天謝地佢無推開我，仲自己就位等自己可以挨得舒服D。

咁應該係一個好signal？希望係喇。