「無啦啦多左幾個家姐同細妹 Season 2」: 活該

三個人係天台攬埋一舊，如果比人見到肯定會拍片放上FB。

我知道而家我講乜都係無用，傷害已經造成，我真係做錯左。

如果Ellie佢唔原諒我，都係我抵死。

晨哥講得一D都無錯，為一件事困住自己真係唔值得，尤其係其實自己根本咩都做唔到。

呼…真係唔痛唔識醒呀我…

我先送左佢兩姊妹返屋企，送到個陣仲要咁岩見到佢父母出黎，佢地本來就已經神情哀傷，見到Ellie咁更加係大吃一驚。

佢地不斷問發生咩事，我唔敢答，只係匿係Anna後面，比Sarah佢地答。

係，我咁係好無用，但暫時就比我咁樣逃避下啦。

Sarah好識講野，避重就輕既功力可以話係已經去到大師級，完全無提到其實係我整喊Ellie。

大家係發生左件咁既事之後都無乜心機玩，Anna就返自己屋企繼續練氣備戰陸運會，Sarah就同Yui去照顧羽晨。

至於我？我就自己一個返左房，對住四幅牆自己發呆。

我：「我到底係度搞乜…」

我開始諗返Ellie今日講既野，先知道我真係一個處處都充滿住矛盾既人。

因為我話要平凡既生活，所以帶住佢地四個離開聖所羅王，仲帶埋Yui黎呢度讀書。

原本咁都唔係咩壞事，仲可以話係一件好事添，但我居然無融入呢種生活。

佢地幾個都可以好好適應，仲發展出自己既新圈子，識到好多新朋友。

但睇下我？好似一直都比以前個世界既事縛住咁，先係Kathy，之後又有二家姐係Party既事，而家又黎一個M。

其實有呢D事都好正常，畢竟我地既屋企都仲係呢個有錢人世界生活緊。

但問題係，一旦有呢D事發生，我就好似著左魔咁沉溺係入面，忽略哂身邊既人。

把口就話係要清走呢D麻煩，等我地既「平凡生活」唔會有阻礙，但其實我可能真係好似二家姐講既咁，我內心係期待緊呢d野。

我唔知點解，偏偏係呢個時候拎返阿樂個面具出黎，傻左咁望住。

點解我就唔可以好似以前咁呢…

「喂，你係度做咩。」

係二家姐…？幾時入黎架？

係因為我太入神定係因為二家姐神出鬼沒呢？點解我完全注意唔到二家姐入左黎既？連開門聲都聽唔到。

我傻傻咁望住企係門口既二家姐，但完全諗唔到點應二家姐。

二家姐：「喂，你係咪唔舒服？做乜呆呆濟濟咁。」

我：「我…」

個腦實在卡死左，想搵D野答二家姐都諗唔出。

不過唔緊要，二家姐已經比其他野吸引到，就係我手上既面具。

二家姐：「呢個就係…？點解會係你度？」

我：「嗯…係個日晨哥比我，話當係比我留個記念喎。」

真係奇怪，一講起呢件事我就識開口講野，我真係…唉。

二家姐：「阿晨條友…真係特別鐘意諗埋呢d衰野，攞黎睇下。」

佢都無等我遞比佢就自己拎走左個面具，仲左睇右睇係度研究個面具。

佢到底黎係做乜架…

我：「二家姐你黎係咪有咩事…？」

二家姐：「啊，係Sarah同泳琦話你好似有D事，叫我黎睇下你囉，話時話你拎住呢個野係度做乜？」

我：「做乜？無野做啊哈哈。」

二家姐：「係呀？無事就好啦，咁我走喇，同埋呢個借比我一陣，遲D還比你。」

佢咁就要走嗱…？

我望住佢個背影，開始慢慢離去。

我：「你話我應該點做先好啊二家姐…」

我好細聲咁講，但都係比佢聽到，佢即刻停低腳步，仲轉身望住我。

二家姐：「所以你肯同我講你有咩事嗱？」

的確，我呢一刻需要佢話我知我應該點做，但我又怕講出黎會比佢話，因為佢其實一早就已經講過我呢個問題。

死就死喇。我一五一十咁將所有而家煩住我既事話哂俾二家姐知，無錯係所有所有。不論係Ellie既事定係我自己既事都講哂。

二家姐聽既時候無乜反應，甚至有時會玩佢手上既面具，令我有點懷疑佢到底有無留心聽。

不過我講完之後佢好快就俾出一句一針見血既評語。

二家姐：「抵死，一早就已經話過你架啦，而家先識煩？

」

我：「係…但我真係唔知應該可以點做先好，我真係唔想再咁，我今次真係傷左Ellie心，我唔想再有下一次。」

二家姐：「係呢？如果下次你hurt既人係Sarah的話，我一定唔會放過你。

」

我：「我知…所以我而家咪…唉我都唔明自己點解會咁，到底我點先可以唔係咁呀…」

二家姐，「去一個無人識…」

我：「咩話？我聽唔到呀可唔可以講返大聲D。」

二家姐頭先講句野真係好鬼細聲，連Yui講野都大聲過佢。

二家姐：「無，我同自己講啫，我之前咪話過囉，用今次件事證明比全世界睇，咁自然無人敢惹你，你睇下李Uncle同愛麗絲，邊有人敢搞佢地。」

「至於你太過投入呢個問題我就幫你唔到架啦，我又無咩超能力可以分散你既注意力。」

「不過我可以提你一句既，記住自己到底係為乜先一路而黎搞咁多野，唔好到最後因為呢D事失去自己原本追尋既野。」

我：「到底為乜…Sarah…」

二家姐：「好彩你仲知道答案，仲有得救。」

「淨低呢幾日你不如唔好返學，好好冷靜下自己喇。」

我：「唔得，咁仲衰，我要返，我要投入學校既生活，咁先唔會亂諗野。」

二家姐：「你自己鐘意喇，不過話時話，今次呢個M確實係高明喎，居然令你搞成咁哈哈，以前你個frd阿威都做唔到咁？」

做乜無啦啦提起阿威呀二家姐…