「無啦啦多左幾個家姐同細妹 Season 2」: 奇怪
兩星期既時間，話長唔長，話短唔短，令人心癢癢。
其實我心情係好矛盾，我每日都好想時間可以快D過，快D到Party，等我可以見到條友。
但另一方面，我又擔心緊如果條友個日唔出現的話，我地又應該點做？要點去搵佢出黎？
同埋，晨哥同二家姐今次好似都怪怪地，唔似以前咁游刃有餘咁，晨哥仲要叫我地小心，以前都未試過。
唔通對方真係好勁？連晨哥都要忌佢三分？
每次諗呢件事我就好似被拉入一個無底深淵，一諗就諗好耐，連堂都無辦法專心上。
Cody：「喂Miss Leung叫你呀。」
嗱就好似而家咁喇，連老師叫我我都唔知。
阿希：「喂阿明做乜呢幾日都神不守舍呀，同女朋友嗌交黎呀？邊個呀係唔係Sarah？」
我：「無喇，你無位入架喇唔好哂心機。」
阿希：「哈哈，咁你煩緊乜呀，等我呢個動漫soc會長關心下會員啦。」
佢咁問到無理由唔講既，但應該點講先唔會嚇親佢地呢，佢地仲未知我背景，如果突然話我屋企公司比人惡意收購既肯定嚇死佢地。
我：「eh…我屋企出左d事咁囉，經濟上既問題。」
阿希：「咁呀，洗唔洗我幫你問校務處拎d津貼form？雖然係遲左好多但可以試下既。」
我：「哦唔洗啦，又未去到呢個地步。係呢你搵到人同你跑學會接力未呀？」
以為佢會笑下叫我take care就算添，估唔到佢係認真關心我喎，呢個朋友無識錯。
阿希：「哦咁就好啦有乜要幫手記得出聲，我幫到既一定會幫，至於學會接力件事呢…有小小阻滯呢哈哈。」
我：「阻滯？咩事？」
阿希：「無人肯跑囉，自從Kathy無出現之後大家都好似無乜意慾玩咁，而家得你，我同黑仔跑咋。」
Kathy啊…
阿希：「唔緊要我會諗辦法架啦，大不了咪唔參加囉係咪先哈哈。」
雖然佢哈哈左兩聲，但係人都睇得到佢其實係唔開心。
我諗佢應該真係好想參加到呢個學會接力。
之後放小息，阿希第一時間離開左班房，黑仔話佢又去左r人跑，唉。
我無去阻止亦無去幫手，因為我而家無呢個閒情逸致。
我想儘快諗出條友到底係邊個，等我可以同二家姐相討對策。
既然晨哥聽完Anna既線索有啟發，咁即係話我地既方向係正確啦，咁只要我繼續係呢個方向諗，一定可以搵到先係。
Cody：「喂，你係咪知道Kathy既野？」
諗諗下野Cody突然彈呢句野出黎真係咪話唔嚇死，心血小d都唔得掂。
我：「咩呀你想講乜呀，咩知道Kathy既野呀？」
Cody：「頭先你聽到阿希提起Kathy之後既反應好奇怪，你肯定知道D野先係。」
呀…睇黎我同阿希一樣，係人都睇得到我諗乜。
我：「eh…」
Cody：「算喇唔想講既話就唔好講啦，我唔鐘意迫人。」
喂咁你又問？你搞到我好似同Kathy有D乜野不可告人既秘密關係咁！
我：「而家未係適當時候啫，下個月話你知喇。」
Cody：「好，等你。」
我：「但係你可唔可以應承我暫時唔好話比其他人知？」
Cody：「你幫我保守到祕密，咁我都會幫你保守祕密既，更何況你根本咩都無話我知。」
又係呀可，我係咪痴左線。自己都開始因為件事變得奇奇怪怪。
睇黎真係有必要快D解決件事先得，如果唔係的話我一定會癲。
不如一陣就去搵晨哥直接問佢係咪諗到？一於咁話。
於是我係之後既小息都有上去搵晨哥，但都係唔見佢，問佢班既人都話佢出左去，但去邊就唔清楚。
真係吖，唔想見到佢個陣佢就突然出現係面前，到而家想搵佢又完全唔見人，你話有無搞錯。
直至放學，我再試多次睇下可唔可以撞到佢，但結果都係一樣，無功而還。
唉算喇都係返屋企訓個好覺，等自己冷靜下吧喇，我而家真係成個癲佬咁，差左未有張白卡係手。
Ellie：「阿明？點解你會係度既？」
嗱嗱嗱你睇下，我開始有幻聽喇，居然會係得Form 6用既樓層聽到Ellie把聲，哈哈哈哈。
Yui：「你黎呢度做咩啊阿明？」
哈哈我仲聽到Yui把聲呀哈哈…咦…？咪住先…
我望向左邊，無人。
我再慢慢望返去右邊，見到Ellie同Yui企左係走廊望住我，仲要披頭散髮，差D認唔到佢地。
我：「哇呀呀呀！！！
」我突然係走廊嗌左出黎。
如果突然有人係你班房外面大叫，你會點？通常都係第一時間望出去，睇下發生咩事。
無錯啦，差唔多每一個班房都有人伸個頭出黎睇下到底發生乜事。
好彩我都蠢唔哂，我都即時係咁四圍望，扮到自己都係度搵緊到底係邊個傻鳩係度叫。
多得我精彩絕倫既演技，Form 6既師兄師姐先發覺唔到個個傻鳩係我。
但係睇住我嗌既Ellie同Yui就笑到停唔到喇，屌好想搵窿捐，我到底做乜呀。
之後我一邊搖頭一邊走埋佢地度，佢地都仲笑緊，好似完全無想停既意思。
我：「喂笑夠未呀你地。」
Ellie：「咁真係好好笑吖嘛，無諗過你見到我地會無啦啦大叫。」
Yui：「係咪我地個樣嚇親你…？頭先太大風，吹到我個頭好似隻女鬼咁…」
我：「唔係！！點會呢！！我頭先只係…唉我都唔知應該點講，我呢排好似怪怪地咁。」
估唔到Yui咁醒，係咪跟得Ellie多呢？搞到我即刻慌一慌。
Ellie：「仲諗緊個件事？黎呢度想搵晨哥？」
講聰明同機智，都係Ellie最勁。
我咩都冇講，只係點左下頭。
Ellie深深咁嘆左一口氣，唉。
我都想唔諗，但係…
Ellie：「陪我一陣喇阿明，Yui你都一齊黎。」
我，Yui：「吓？」
無錯，我同Yui一齊吓左出聲。我仲以為Ellie會好似Anna好惡咁鬧我添。
Ellie帶住我同Yui，唔知想去邊。佢好似想搵D野，但又唔講係乜。
佢行呀行，行到去Sarah同Anna班房個層，仲望左兩下，之後又走左去望下操場。
好明顯佢係搵緊D野，但我同Yui都無出聲，只係跟住佢行。
最後，佢帶左我地去操場。
去到操場我先知道佢想搵既野係乜。
原來係Sarah，Anna仲有Ellen。佢地三個咁岩都同時係操場，Anna練跑，Sarah就睇住佢練，至於Ellen就係另一邊同學生會既人傾緊野。
我：「Ellie你搵佢地想點呀唔好…喂喂..！」
我都未講完，Ellie就已經係咁多人面前拖住我同Yui行過去搵Sarah佢地，想叫都叫唔住。
佢認真起上黎真係完全唔聽人講野，第一次覺得佢性格上原來都似Ellen。
首先，佢去左搵Sarah同Anna，話有野要同大家講，Sarah佢地見Ellie既態度咁認真都愣左，之後好似隻綿羊咁乖乖咁跟住Ellie行，途中仲細細聲問Yui到底發生咩事。
我諗我地幾個都係第一次見到Ellie咁認真？
終點站，就自然係Ellen個邊啦，Ellen都唔例外，見到Ellie咁有氣勢走埋黎，佢自己都嚇左跳。
Ellen：「哇乜咁齊人呀？Ellie你做乜咁既口臉，發生咩事？」
Ellie：「我有野想同大家傾下。」
Ellen：「哦咁返去個陣先傾啦，我仲要…」
Ellie：「係重要野，我想而家就傾。」
嘩…氣勢銳不可擋呀…