「無啦啦多左幾個家姐同細妹 Season 2」: 願望
雖然係二家姐身上感到有D奇怪，但我始終都對佢終於返返黎呢件事好開心。
所有野都好似去返以前咁。
之後，我順利咁考埋個bio，好多都識，感覺好好，係聖所羅王溫個陣真係有用。
再之後既中文口試，eh…都ok啦我諗，我講過乜我自己都唔記得了。
點都好，總算考完係新學校既第一個試喇，好似仲難過以前咁既。
之後要應付既就係二家姐講既慈善基金Party，仲有兩星期…都有唔少時間去準備。
唔係喎，其實都無乜要準備，我係餌黎咋嘛。
呢個Party之後過幾日就係陸運會啦，啊，我既人生真係充實。
希望呢個Party會係最後既麻煩啦，呢次之後最好唔好再有咩手尾要跟。
應該好難啦哈哈。屌肚餓添，Sarah佢地又早走過我，唯有自己搵D野食啦。
食乜好呢…吉野家都好喎，食個野菜牛肉飯。一於咁話。
當我想行既時候，居然有人叫住左我，係Anna。
Anna：「喂傻仔明，自己一個人係度做乜呀。
」佢叉住腰，企左係7-11前面，如果唔係佢叫我我諗我真係睇佢唔到。
我：「你唔係頭幾批考架咩？點解呢個鐘數仲係度既？」
Anna：「哦，我咁岩去左田徑club準備下陸運會D野所以咪搞到而家囉，我肚餓啦你食唔食lunch？」
我：「我岩岩就係想去食飯，岩啦我地去撐檯腳啦，久違既二人約會。」
Anna：「口花花，行啦食乜呀。」
之後我就帶左Anna去吉野家，一人叫左一個餐食。
而家帶佢地黎呢D地方佢地已經無左開頭個種驚喜，佢地都已經習慣左呢D地方。
當然，佢地習慣到呢D平凡貼地生活我都好開心啦，我開頭就係想咁。
如果要令佢地可以無憂無慮繼續過呢D生活，就要好似二家姐講既咁，要同全世界證明自己唔好蝦先得啊…
屌，我又做乜呀…
Anna：「喂，你又係度諗埋D咩白痴野呀。
」「唔好成日鑽牛角尖啦低能仔，逼到自己埋牆角有乜謂，諗下D開心野咪仲好。
」係佢識讀心吖，定係我真係咩都放哂係臉度呢？佢又知道我而家係度諗咩既？
Anna一邊講一邊輕撫我塊臉，係我眼中，而家既佢簡直就係仙女咁。
我捉住佢個隻摸我臉既手，用塊臉hi多幾下。
我：「你岩，你岩。」
「我一定可以同你地開開心心咁走落去，一定可以，今次之後。
」Anna：「其實呢，我呢，只要可以係你身邊同你一齊行就已經係好開心，呢個應該係我而家既願望。」
咩話…？Anna…居然會咁直接講呢D肉麻野？
我無辦法相信自己既耳仔，於是我伸手去摸下Anna既額頭，想話睇下佢有無發燒，點知俾佢大大力咁一下打左落我隻手度，痛到不得了。
Anna：「做乜鬼野呀你？
」我：「無呀想睇你有無發燒咋嘛，呢D說話都唔似你會講既野。
」Anna：「吖你個衰人我見你咁悶悶不樂我先氹下你，你居然話阿姐我發燒，你係咪打得少呀？
」佢講完又打左我兩下，痛到呢。
不過其實都係既，只要可以同佢地一齊我就已經好開心，佢地就係我既一切。
但係，我始終都係無辦法放低個條友…居然只係為左針對我一個搞咁多野出黎…
一定要搵佢出黎…睇下呢條友到底係咩一回事。
Anna：「其實我好怕你又會變到對付阿傑個陣咁，個陣既你真係好可怕。」
「應承我，點都唔好變返個陣咁，好無，做一個傻仔明就夠架喇，有再大既問題都有我地同你一齊面對。」
我：「嗯，一定…」
佢忽然提起個段時期，搞到我都唔知點好。
的確，個段時期既我真係好似走火入魔，令人不堪回首。
用好多污糟下賤既手段去對付自己既「敵人」，但居然無留意到自己一步步變成自己最討厭既個種人。
最後比人鬧到死，仲要晨哥出手幫先搞掂件事。
係喎，講起晨哥，最近好似好小見到佢地班人，係咪有乜忙緊呢？定係因為努力讀緊書呢？
我：「唔知晨哥呢排搞乜呢，最近好似都唔見佢。」
Anna：「唔？做乜無啦啦提起佢？你想搵佢問佢意見？
」我：「哦唔係，唔好煩到佢啦我地自己就可以搞掂，只係突然間諗起呢個神人啫，你估我地咁樣講佢佢會唔會突然出現係我地面前呢？
」Anna：「你係咪傻架，邊有可能咁岩，我諗Form6呢排應該趕緊進度？佢地好似就快study break。」
係喎佢地好快就畢業架喎…
晨：「喂你地兩個係度拍緊拖呀？
」嘩屌你老母！！
真係日頭唔好講人，呀唔係，係唔好講晨先岩，佢真係突然出現係我地面前。
Anna：「晨哥！？
你地D Form 6唔係要補課架咩？點解你會係度既？ 」晨哥：「啊補課呀？太悶太麻煩喇所以我走左出黎囉哈哈。
」「係呢我頭先好似聽到你地講緊我wor？講我咩呀~
」我：「無~邊有講你呢，你肯定係聽錯啦晨哥。
」嘩真係唔好比佢聽到呀，我唔想搞到佢呀。
晨：「唔~~？我明明聽到咩搵我問我意見架？黎啦快D話我知啦我最近好鬼悶呀真係~~
」唉屌，真係比佢聽到。呢條友隻耳到底係咩構造架，我地明明都唔係講得好大聲啫。
我即刻望下Anna，想睇下佢有乜主意，點知佢同我都係一樣反應，兩條友係度互望。
就係我猶豫不決既一刻，晨哥發火了。
晨：「喂，唔好要我同一句野講兩次，講。
」喂大佬你為左問我野用認真mode？阿哥你知道咩係私隱嘛？我係有權唔講架！
心係咁講，但我既身體卻很誠實，屈服了。
我將一切都講哂出黎，無錯，係一切，由大家姐話要結婚個度開始講，講到見返Kathy同埋二家姐話已經準備好局個度為止。
晨哥聽得津津有味，表情好似MJ食爆谷張gif咁，仲唔知係邊度拎左包花生出黎剝，邊聽邊食。
晨：「哦~~聽落好似漫畫情節咁喎，有個一直都痛恨主角既敵役，一個鋪陳左好耐既計劃，有意思有意思。
」我：「晨哥…唔係講玩架…條友已經做左好多野，差D可以食左Uncle間公司架啦…」
聽佢既語氣同反應，佢好似唔知道呢件事？
我：「二家姐無因為呢件事搵你咩？
」晨：「May姐？無呀佢呢排都無聯絡過我。喂講返正題先，個M既身份你有無頭緒啫到底？」
二家姐今次無搵晨哥幫手…？
我：「真係無呀，Anna佢地都有試過幫我組織過，但都係無頭緒。」
晨：「哦？又講黎聽下？不過等陣先，我包花生食哂，開過包先。
」佢講完就係自己書包再拎出一包新既花生繼續食，痴線佬到底佢個書包係放乜架。
Anna：「咁我地就根據返Kathy講既野去推測對方身份啦，Kathy話對方對付阿明既計劃已經準備左幾年，即係係阿明入曹家之前已經開始準備，咁基本上已經可以排除左咩七星先。」
「對方係係阿明仲係窮..仲係一般人個陣已經想對付佢，加上佢又知道阿樂既死，呢件事基本上外界係唔知，即係佢應該係同聖所羅王有關係既人啦。」
晨：「好好既推測呀，範圍咁窄都鎖定唔到嫌疑人
」Anna：「係呀，我地將成個學生list初步睇左一次，都無一個係有可能做到咁既，就算係前七星阿傑，而家既佢都做唔到咁既事啦。」
「仲要基本上聖所羅王都無憎阿明既人啦，我真係諗唔到會係咩人會做出d咁既事。」
聽完Anna一輪嘴講完一大輪，我同晨哥都不斷點頭，唔知點解。
有五個能幹既女朋友真好。
晨：「哦…原來係咁…可能我知道D野…」
！？晨哥諗到！？
我：「你有頭緒？？？
」晨：「係有少少，不過都唔可以咁快下結論住，等我去八下先。
」「你地自己小心D，我有消息會通知你。」
講完佢就急急腳走左，連包未食完既花生都無帶走。
點解連晨哥都好似怪怪地咁…？