「無啦啦多左幾個家姐同細妹 Season 2」: 家人
我跟住老母比既地址去左西貢，一間獨立屋既門前。
呢間屋簡直就係TVB拎黎拍D豪門劇既屋喎…二家姐一個人住係呢度咁正？
屌，佢係因為我先一個人走黎呢度住架，我又係度諗乜呀傻仔明。
都係快D入去搵二家姐啦，㩒鐘先…咦個鐘係邊？
搞左一大輪，我終於搵到個鐘係邊，咁大度門個鐘咁鬼細，想搵死人咩。
「叮噹~~」
如果一陣二家姐問我點解會黎，我應該點答好呢？話我已經知道哂，想出一分力？
唔得唔得，咁答的話肯定會比佢鬧到死，我已經想象到二家姐發嬲個樣了。咦…？
就係我度緊應該點解釋既時候，我眼前既大門居然自己打開左。
我無諗咁多，行左入去。
行左一小段路，入到去屋入面我仍然都係未見到二家姐既身影。
間屋雖然係好大，但就比好多野塞到滿哂，一部又一部電腦，一地都係既外賣盒。
二家姐到底係度搞乜呀…
「黎左嗱？我以為你聽日先會黎添。」
係二家姐把聲！！
我即刻抬高頭，望上二樓，搵二家姐既身影。
佢就咁企左係樓梯口，望住我。
好耐無見既二家姐，突然見到令我有D不知所措。
我傻咗咁企定定係度望住佢，就好似中左幻術咁。
二家姐佢就咁著住一件白色長裇衫，好似D model咁，好靚。
反而佢見到我完全唔驚訝，好似一早就知道我會黎搵佢一樣。
唔係喎，諗返起佢頭先講既個句野，佢似係一早就知道我會黎咁喎。
二家姐：「傻咁企係度做乜，上黎啦。」
唔係二家姐叫到我可能真係會就咁企係度企足全日。
我跟住佢，去到一間房，入面既擺設同一間書房無分別，但一本書，甚至連一張紙都無。
二家姐：「呢度應該係成間屋最舒服最岩講野既地方架啦，講啦，你山長水遠黎呢度搵我想點？」
相當直接，完全係二家姐風格。
我：「我咩都知道哂啦，我黎係想問今次我有咩係可以做既。」
我都無謂兜圈哂時間啦，直接講反而仲好。
二家姐：「哦？咩都知道哂？Daddy話哂俾你知？佢居然肯？」
「不過唔好意思，你無野可以做到，如果你黎只係想問呢樣野既話，你可以返去喇。」
我：「我知道對方係衝住我而黎，所以我應該有野可以做先係，話我知喇二家姐。」
二家姐：「學校個邊呢，你地應該差唔多要考試架，返去溫書喇。」
我：「我想幫手呀你明唔明！我唔想大家姐同一個唔鐘意既人結婚呀！！」
「我唔想大家因為我而唔開心落去！二家姐你都係！！我想大家一家人可以好似咁開開心心咁一齊過咋！」
面對住二家姐既冷漠，我終於都忍唔住爆左出黎。
我唔明點解到呢一刻佢仲可以咁冷漠，拒我於千里之外，佢到呢刻係咪仲…
我：「你其實係咪仲係唔當我係屋企人？」怒火換黎既，係一遍沉默。
大家咩都無講，只係望住對方。
佢繼續用個副咩都唔在乎既表情望住我，我亦繼續死啤住佢。
平時的話或者我已經縮左，不過今次唔得，唔可以再縮了，一定要企硬。
我再咁樣啤多佢幾分鐘，啤到佢終於有小小唔自在，開始迴避我視線。
繼續咁就可以喇！！一定會係佢開口先！！
二家姐：「點解你硬係咁鐘意自找麻煩？次次有事都係咁問自己有無野可以幫手…」
「明明我已經咁盡力去唔俾你掂呢D野，點解你係都要痴埋黎…」
「你咁蠢，咁易信人，咁易受打擊，根本就唔適合係呢個圈子…我唔明點解D大人不停咁話你係人才…」
二家姐一輪嘴咁講左好多野，內容都係圍繞我唔適合玩呢D野之類。
我聽左好多，最後忍唔住，企左起身。
我：「就算我幾唔適合係呢個圈子都好，屋企人同屋企有事我點都唔可以唔理！」
「我已經唔係三歲細路，唔洗事事都要人理。今次我點都要叉隻腳埋黎架喇，你唔幫我既話就算，我自己會諗辦法。」
我講完就自己向門口行去，但行左兩步，佢就叫住左我。
二家姐：「等等。」
我無轉身，繼續背向佢。
二家姐：「得喇我投降喇，俾你幫手啦跟我黎。」
「只限呢次吖，同埋你要努力溫書去考試。」
堅持，係有用既！！今次真係想大聲講聲成功爭取啦。
之後二家姐帶返我落樓，去左大廳個堆電腦度，逐個逐個咁同我解釋緊公司既情況。
大概就係股價上既問題，公司股價不停跌緊。
我只係理解到咁多咋唔好意思。
不過二家姐真係勁，都只係大我幾年，居然對呢D野咁熟悉。
我：「到底係咩人出手先會可以做到呢個程度呀…Uncle…公司既財政實力應該都叫做好穩健先係，但係只係兩個月內就搞成咁…」
二家姐：「啊，其實只要有心的話，好多大企業都可以做到，只係睇佢地會唔會咁癲啫。」
「肯用咁多錢去對付一個人，我都係第一次見，佢睇黎真係好憎你咁喎，你有無乜頭緒？」
憎我既人…我諗都係得阿偉，阿威，阿傑架啫，但佢地三個都應該仲係…
唔通係Kathy？
我：「會唔會係…」
二家姐：「你想話之前個女仔？唔大可能喎，佢應該…」
二家姐講講下就停左，好似由Kathy呢條線索諗到D野咁。
如果要講Kathy既話…呀！！！我諗到喇！！
「佢背後應該仲有一個人！！」
我同二家姐同時大聲叫左出黎，之後兩條友係度狂笑。
之前因為Kathy既失蹤而不了了之，無走去查佢背後既到底係咩人，而家就係時候搵埋佢出黎啦。
不過幕後黑手呢家野邊有咁易搵到出黎，又唔係用Google就可以search到出黎。
加上而家Kathy又失蹤埋，想搵佢出黎問都唔得。
但係二家姐仍然繼續瘋狂咁㩒電腦，唔知係度搞乜。
我：「二家姐你係咪有乜辦法？」
二家姐：「係，我有一個絕好既辦法，多得你我先諗到。」
「你頭先話要保護屋企人，點都要叉隻腳埋黎架嘛？岩啦，就用你做餌引佢出黎。」