「無啦啦多左幾個家姐同細妹 Season 2」: 週會
我：「點解係我…？我之前明明已經同七星劃清界線，佢地都應承過我唔會再騷擾我同我屋企人架。」
李生：「問題係，對方並唔係七星入面既人。」
我即刻呆左。唔係七星既人想搞我，咁係咩人想搞我…？
李生：「萬事要小心呀阿明，有咩需要的話你可以打比愛麗絲。」
愛麗絲：「嗱呢個係我電話。」
我：「嗯…」
李生：「對唔住，又將你捲入呢D你唔想面對既事。」
我：「邊關你事呢Uncle，你都控制唔到所有野既。」
「不過，我有事想求你。」
李生：「即管講。」
我：「呢件事可唔可以唔好話比我屋企人同埋Anna佢地知。」
李生：「你想自己一個處理？」
我：「我只係唔想我身邊既人又要因為呢D事為我擔心啫。」
李生：「好我明白啦，我答應你，我唔會將呢件事講出去。」
我：「多謝你。」
李生：「唔洗，咁我地都係時候要走啦。」
我：「我送你。」
我送左佢地兩位走，親手關上屋企既大門。
係閂左門之後，我企左係門前，深深咁嘆左一口氣。
我：「又搞D咁既野呀…」
二家姐：「你打算點處理件事。」
屌！二家姐幾時係度？佢咁問得即係佢聽到哂頭先既野？
我：「eh…」
二家姐：「上我房先講。呢度會比其他人聽到，你都唔想咁架？」
講得岩，我唔想再有其他人知道呢件事住。
之後我跟左二家姐去佢間房，佢沖左兩杯咖啡，放左係我地之間，但我唔敢飲，因為二家姐既神情相當冷酷，我怕做錯任何一個舉動激嬲佢。
二家姐：「聽你頭先講既野，你似乎想自己一個處理件事，具體黎講你想點做？」具體要點做？我都係五分鐘之前先知道呢件事，我邊可能咁快諗到具體既應對方案呀。
我：「暫時靜觀其變先啦，話哂我地而家都唔知道對方係咩人同咩目的。」
哈，咁講實掂啦，最冷靜既處理方法。
二家姐：「又係咁，次次都係將自己置於一個咁被重既處境，你唔認為應該主動出擊，搵個條友出黎架咩？
」二家姐相當激動，係差左未拍枱。
我：「但係我地在明，人地在暗，要點搵呀？而家又唔係好似上次查內鬼咁有個範圍可以俾我地去查…」
講係咁講，其實上次查內鬼我都係衰左，結果係其他人查出黎，我係最後一個先知。
二家姐：「一個人既能力固然有限，但你可以搵人幫你架嘛！搵阿晨囉！或者搵其餘四個七星。」
我：「唔得，唔可以搵佢地。
」我諗都無諗，好決絕咁答二家姐，二家姐甚至比我嚇左一跳，o哂嘴咁望住我。
睇黎我都激動左小小。
我深深咁吸左一口氣，跟住就講埋我想講既野。
我：「第一，我之前已經同左七星劃清界綫，唔應該有事就去請佢地幫手。二，我已經受過晨哥好多思惠，我唔想再打擾佢，想等佢開開心心咁讀埋Form 6。」
「我既事，我自己會諗到辦法解決。如果對方目標係我，就等佢黎搵我啦，有乜到時再算。」
我講完之後，靜左一陣，我同二家姐都無出聲只係一味對望，大概持續左兩三分鐘，二家姐先拎起個杯一直放係我地之間既咖啡黎飲，叫做打破左種尷尬感。
二家姐：「唉，真係無你收，你鐘意點就點啦，都唔明點解你總係成日惹麻煩返黎，出返去啦。」
我：「係既二家姐，咁呢件事…」
二家姐：「放心啦，我唔會話比其他人知，你自己小心，提防下身邊既人，你太易信人。」
我：「係既係既，多謝二家姐。
」總算擺平左二家姐個邊，但佢既說話亦不無道理，我一個人做到既事好小，可能真係應該要搵下人幫手。
算啦，而家唔諗咁多住喇。
之後，我同左大家姐去佢所講既「私人party」，起初我以為最多咪係唱下k咁，點知全部都係痴撚線既。
大家姐玩得好開心，係咁請我食波餅，仲同佢班中學同學講話我係佢男朋友。
我？都係笑下就算，一直坐係佢附近睇實佢廢事佢比人抽水。
話咁快，又到星期一返學，今日正正就係週會，宣布學會申請既日子。
大家今日上堂都無平時咁積極，因為大家都知道今日既重頭戲係乜。
尤其係阿希同黑仔，兩條友三句唔埋兩句就係提住個週會。
終於比佢兩個恨到，終於到週會既時間，大家都表現得相當期待，可能係俾氣氛感染到，我都有小小興奮。
唔知我地個soc係咪真係咁順利獲批呢？
好快，大家都排排坐哂係禮堂，睇住係台上面既人，校長。
校長鐘意9up，相信大家都唔會覺得意外。
校長：「相信大家都知道，今日係咩日子。係大家非常期待既學會結果公佈既日子。」
「今日同時係我地學校一個非常有紀念價值既日子，學會制度係今日正式成立，我諗將會係一個里程碑，為大家既校園生活增添唔小色彩。」
「我知道大家都好期待呢個制度，不過我希望大家唔好忘記讀書，畢竟學業始終應該為重。」
「最後，祝大家都可以有一個開心快樂既校園生活，事不宜遲，將時間交俾學生會。」
校長講完之後大家都拍爛手掌，就連學生會會長上左台都無人理。
學生會會長：「多謝校長，接下來我將會代表學生會宣布之前學會申請既結果。」
黎嗱黎嗱。
「以下既學會已被正式接納申請，空手道學會，烹飪學會，長跑學會…」
學生會會長每讀一個學會名我就緊張一分，因為每一個學會成功都可能代表住我地既學會會唔批。
不過皇天不負有心人，「日本文化協會」六個字終於傳入我隻耳入面。
黑仔：「好野！！」
你同我都無聽錯，黑仔佢居然係週會突然間大叫。
結果係點？訓導主任梗係即刻叫左佢出去啦。
雖然犠牲左黑仔，但係批左真係太好啦。
學生會會長：「接下來我要交俾訓導組向各位介紹為左學會制度而設既新校規。」