「無啦啦多左幾個家姐同細妹 Season 2」: 警告

Kathy會參加呢個soc真係令我十分意外，我開頭以為佢係比「日本文化協會」呢個名呃左，但原來唔係，佢話佢都鐘意動漫，好似巨人，海賊王之類。

真係完全睇唔出。

所謂既開會，其實都係大家吹下水，我甚至覺得呢個會係阿希為左瞭解Kathy多d先開。

不過傾落又覺得Kathy幾nice，係有種女神feel。

唔知阿希溝唔溝到佢呢？

之後日子一日一日咁過，好快就已經過左兩星期。

學校方面，大家都開始上左軌道，各自識到唔同既朋友，Sarah仲比佢個班既人捧到做女神。

就連我之前最擔心既Yui，都已經識左幾個傾得埋既朋友，真係要多謝Ellie。

Anna仲勁，上左一次體育堂show左兩下身手就比佢個班既人求佢要跑班接，仲話之後既班際比賽靠哂佢。

啊不得不提Ellen，佢終於搵齊佢既學生會團隊，候選內閣個名好似叫「Eden」。

咁即係話我要準備做佢既助選團。

最後就係我同Sarah佢地既關係，除左Cody同晨哥之外，仍然係無人知道。

應該。

至於屋企，無人再提二家姐出國讀書既事。

我有去問過老母，大家姐，但佢地都話乜都唔知。

但每當Uncle同二家姐同場既時候，氣氛總係有D緊張。

佢地之間完全無交流，就連眼神都無交接過。

二家姐只係會出現係飯廳同佢自己房，一係就出街，好似有心避開Uncle咁。

我好想去問，但我硬係無咁既勇氣。

大家姐：「阿明，你聽晚有無時間？」

我：「星期六唔洗返學…時間應該有既。

」

大家姐：「咁你陪大家姐去個Party好無？

」

我：「eh…

」

我邊eh邊望過去Sarah個邊，但原來佢已經望住我，仲微笑住。

Sarah：「你就去陪下大家姐啦。

」

呼…Safe。

我：「咁…去D咩Party架大家姐。」

大家姐：「放心啦唔會係之前個D咁，係私人party，我既中學同學搞既~」

哦咁都好D，幾驚又要去D大企業party…

於是，我星期六夜晚就比人預約左了。

星期六既朝早，我全日都留係屋企做自己野，上網睇下高達咁。

點解唔洗陪佢地？因為佢地各自都約左朋友出街囉。

真係好，咁快就已經friend到一齊出街玩，我呢個毒撚仲係on99咁。

公平咩。

「叮噹~~」

有人㩒鐘？邊個？

反正唔洗我去開門，唔理了繼續睇。

過左無幾耐，有人走黎敲我門。

「明少爺，有客人想見你，想請你落黎大廳。」

係蘭姨把聲喎，有人想見我？會係邊個？唔通係阿惠？

一諗到可能可以見到阿惠我就即刻起身，連個Player都未熄就衝左落樓。

但係當我去到客廳，我好快就後悔。

坐係大廳等我既，唔係阿惠，而係一男一女。

李生同愛麗絲。

我再望一望自己既衣著，Tee配短褲，仆街失禮到爆。

我即刻轉身準備走人，但已經太遲，我被李生叫住左。

李生：「就咁得啦阿明，過黎啦。

」

唉走唔甩啦。

我唯有死死地氣，轉身行到佢地旁邊既梳化坐低。

我：「兩位好，別來無恙嗎。」

李生：「尚算幾好，有心有心。

」

愛麗絲：「唔差啦算係，你呢？讀書點？新學校點？

」

我：「幾好…所有野都向正常方向發展，兩位黎係..？」

李生：「哦無，只係心血來潮想見下你啫。」

突然間會諗起我..？李生你係咪Gay架？

我：「咁唔知我有無D乜可以幫到兩位..？」

李生：「哈哈我諗就無啦，點呀喜歡唔喜歡而家既生活？」

我：「還可以啦，起碼唔洗煩咁多野..可以盡情同學校既朋友癲下喪下，好似終於搵到真正既校園生活咁。」

李生：「係呀..？咁就好喇，恭喜你。

」

我：「多謝多謝，都係多得李生你。」

愛麗絲：「咁你有無同你而家既同學提過你以前既事？」

我：「無，我諗住又唔係咩威水史，而且D野誇張到講出黎都未必會有人信，所以我就無講。」

愛麗絲：「咁有無人問過？」

我：「都無啫，大家都唔係好關心呢樣野。」

李生：「好喇愛麗絲，我地都差唔多夠鐘要走，有機會再傾啦阿明。」

愛麗絲：「但係…

」

李生：「夠架喇。

」

嗯？有D奇怪…