「無啦啦多左幾個家姐同細妹 Season 2」: 派對

聽返Ellen佢之後講，佢捉住晨哥迫佢帶自己去哂全部班房，周圍問人有無興趣同佢選學生會。
 
好啦，而家佢肯定出哂名啦，全校都識佢啦。
 
Sarah：「咁結果有無人應承同你一齊搞學生會呀Ellen？」
 
Ellen：「無呀，個個人既樣都呆呆滯滯咁，都唔好玩既。」
 
Ellie：「人地肯定係比你嚇親啦家姐…開學第二日就捉住全校最出名既人去洗樓…」
 




Ellen：「吓…但我真係想搵人同我一齊搞學生會吖嘛…十月尾就選架啦…」
 
見到佢咁唔開心，我真係好想話我陪你選把啦，但係我又真係唔想再搞學生會，唉好矛盾。
 
Yui：「如果你唔介意既話，我可以同你一齊選…」
 
Ellen：「Yui！！你是最好的！！」
 
一聽到Yui肯陪佢顛Ellen就即刻飛撲埋去，好彩我無應承，如果唔係遭殃既就係我。
 




我：「咁咪幾好，唔洗再煩住晨哥啦。」
 
Ellen：「咩啫，係晨哥主動話帶我去搵人架。」
 
Ellie：「但係唔係你開頭主動去搵晨哥架咩…」
 
Ellen：「係…」
 
哈哈，Ellie技術性擊倒Ellen。
 




我：「算啦反正搞掂左就唔好咁care d細節啦，話時話晨哥黎我班房個陣突然黑面，你地有無？」
 
無錯，我真係見到晨哥突然黑面，變到個個咩認真mode咁，好可怕。
 
Anna：「無喎，佢仲笑得好nice，我個班d女仔仲開心到尖叫。」
 
Sarah：「我都唔覺喎，會唔會係阿明你諗得太多咋。」
 
會唔會真係咁呢…算啦都係唔好諗咁多了。
 
Anna：「喂傻仔明，聽日上體育堂喎。」
 
我：「係呀，咪住先你點知架？」
 
Anna：「嘻嘻，因為我地兩班體育堂係一齊上囉。」




 
原來呢度制度係咁，兩班一齊上體育堂。
 
Sarah：「吓我都想同阿明一齊上體育堂呀。」
 
Ellen：「我都係呀，唔公平呀點解得Anna有得一齊上架。」
 
Anna：「哈，呢D肯定係命運既安排啦。」
 
命運既安排，估唔到Anna都會講呢D野。
 
Sarah：「好啦我地都夠鐘行啦阿明，二家姐佢地應該都差唔多返到屋企。」
 
我：「係喎原來已經咁晏，咁你地三個…」
 




Ellie：「得啦我地會自己返屋企架啦，聽日見啦。」
 
我：「嗯，拜拜。」
 
咩事要Ellie佢地三個返去先？因為今日係Uncle公司既Party，身為仔女既我地梗係要去。
 
不過呢D Party好似都好耐無去喇…Uncle成個暑假都唔洗我地去，叫我地自己去玩。

之後我地換好衫，係客廳乖乖咁等大家姐佢地返黎。
 
大家姐佢地都無要我地久等，佢地好快就返左黎，仲好快咁換好衫落返黎客廳。
 
大家姐：「好啦好啦我地快D行啦，如果唔係就要遲到架啦。」
 
見到大家姐咁匆忙，我地都不敢怠慢，即刻出門口上車，但二家姐居然氣定神閒咁慢慢行，同大家姐形成強烈既對比。




 
我地五個人之後就坐華叔既車開始向住會場出發，無錯係得五個人，羽晨並未同我地一齊去。
 
我：「點解羽晨唔去既？」
 
大家姐：「哦，因為佢早兩日同Daddy嗌左交，所以佢咪發脾氣唔去囉，Daddy都話由佢。」
 
二家姐：「其實咁咪仲好，羽晨仲細，去到又要睇住佢，咪盞煩多樣野。」
 
二家姐好似唔多高興咁喎…係咪頭先發生左咩事呢…一陣講野都係小心D好。
 
Sarah：「咦係喎大家姐你地頭先去左邊黎吖？」
 
Sarah…真係夠膽…
 




大家姐：「eh…我地去左shopping囉哈哈哈哈。」
 
Yui：「但係點解你地咩都無拎返黎既…？」
 
啱呀Yui，你真係聰明，不過如果係我就唔會問咁多啦…
 
大家姐無再答任何問題，只係哈哈左幾聲，我就更加知道頭先發生既一定唔會係咩好事。
 
之後既車程，大家都靜靜咁過，不知不覺已經到左酒店。
 
二家姐：「行喇。」
 
二家姐咁cool，令我莫名其妙咁心寒，亦同時令我更好奇頭先到底發生咩事。
 
我地四個人跟住二家姐既身影一步一步咁行入去酒店，大家姐仲專登行係我旁邊，捉實我手臂。
 
我：「大家姐？」
 
大家姐：「阿明，我好驚…」
 
我：「驚？唔係Uncle公司Party咋咩？有咩好驚？」
 
大家姐：「我唔係指呢樣，我係話緊阿May…佢…」
 
二家姐：「唔好咁多嘴。」
 
就係我以為終於可以知道頭先發生咩事既時候，二家姐突然擰轉臉好惡咁望住我，嚇到我差D瀨屎。
 
我地唔敢再講任何野，只係乖乖咁行，好快我地就去到個hall門口。
 
二家姐諗都無諗就一手拉開道門，就連企係佢後面既我都feel到佢好用力。
 
直頭係想用道門發洩咁。
 
大門一開，入面既氣氛就即刻湧哂出黎，好似想淹沒我地咁。
 
都差唔多一年，我都仲係唔係好慣呢D場合。
 
回神一睇，二家姐已經一馬當先咁行左入去，旁若無人咁款。
 
佢應該真係好嬲…