「無啦啦多左幾個家姐同細妹 Season 2」: 感覺

事後，我比阿希佢地哦左勁耐。不停咁問我點解會識Kathy。
 
邊個係Kathy？其實我同你地都差唔多，係半個鐘都唔知邊個係Kathy。
 
「Hello阿明，我地第三次見面啦。」
 
佢行出人羣第一句說話就係呢句，令到大家都嘩然。
 
不過佢又無錯既，書局第一次，頭先第二次，而家咪第三次。
 




但係佢點知我個名…？
 
我：「你係…？」
 
「Kathy，我叫Kathy，今日開始我地就係同學啦。」
 
佢自我介紹完之後又擺出佢之前個個天使般既笑容，唔知係咁岩定點，我好似見到佢背後有道光咁。
 
但我都未睇清楚道光就已經比人拉走左，比阿希同黑仔拉左去浩賢度。
 




佢地一下就壓低左我係檯度，雖然feel到佢地有留力，但都係有小小痛。
 
阿希：「講呀，點解Kathy會咁留意你架！你之前係咪做過D乜？」
 
我：「無呀屌，我咩都無做呀，我同你地一樣連佢叫咩名都係岩岩先知咋。」
 
黑仔：「咁點解佢會話係第三次見面架！你地之前係咪見過！」
 
呢班友又幾醒目，算啦唯有認左佢啦。
 




我：「係…尋日去買書個陣見過一次囉…不過我地野都無講一句架。」
 
阿希：「我就唔信啦！點解Kathy會特登問我地你叫咩名！你肯定係買書個陣flirt過人！」
 
哇大人冤枉呀！！我真係一句說話都無同佢講架！！
 
我：「真係無呀！！我已經有女朋友架啦！！仲點會flirt女呀！！」
 
阿希，黑仔：「女朋友！？」
 
「現充！！」
 
唉呀做乜我解釋完仲大力左架！！
 
浩賢：「放開人啦，玩夠啦。」




 
阿希：「喂浩賢但係佢…」
 
浩賢：「算啦，睇阿明個樣就知佢無講大話啦，放開佢啦。」
 
多得浩賢幫我解圍，我先甩到身，我套校服都幾乎爛咁濟。
 
阿希：「喂Sorry阿明，係我地一時激動左。」
 
黑仔：「無整痛你吖嘛。」
 
我：「算啦，大家都係玩下咋嘛。」
 
阿希：「咁先係架嘛！」
 




我一講完算啦，阿希就即刻攬頭攬頸，笑哈哈咁。
 
真係好似阿惠。
 
唔知阿惠而家點呢？
 
唔？
 
係咪我錯覺？個Kathy又望住我笑？但係感覺好似…
 
阿希：「喂Miss Leung終於黎啦，返埋位啦我地。」
 
終於黎既意思係因為而家已經8:35，Miss Leung遲左好多。
 
佢好匆忙咁跑入黎，仲差D跌左本點名簿落地。




 
Miss Leung：「唔好意思呀各位同學我黎遲左，因為今日應該又有一位插班生…咦？」
 
「點解你會自己走左上黎先既？」
 
無錯，Miss Leung講既人就係Kathy。
 
Kathy：「唔好意思呀Miss，我見早左到所以就自己上黎先，無通知你真係對唔住。」
 
Kathy突然係眾人面前向Miss Leung躹躬，嚇到大家都唔知講乜好。
 
就係班房鴉雀無聲既時候，我聽到坐我旁邊既Cody細細聲講左句野。
 
Cody：「我唔鐘意呢個人。」
 




講到出口既竟然，女人真是可怕。
 
Miss Leung：「唔緊要啦，我諗你已經同左同學自我介紹啦，咁等我安排你坐邊先。」
 
之後，Miss Leung就安排左Kathy坐，大家就繼續上堂。
 
只不過，我總係覺得有人望住我，可能係我太敏感？
 
Miss Leung：「好啦各位同學，兩星期後學生會會開始舉辦第一個班際活動，班際閃避球，你地自己決定名單喇。」
 
咁快就有班際活動？
 
Miss Leung：「同時，學生會亦會發表學會申請結果，申請左既同學仔自己留意返啦。」
 
「Miss Leung，出面有人…」
 
唔？邊個？嘩晨哥做乜黎左…屌呀！！Ellen都係度既！？想點呀佢地！！
 
晨：「唔好意思呀阻住你地處理班務，我係受學生會委託黎架，為左…」
 
Ellen：「有無邊位同學想同我一齊選學生會？」
 
唉Ellen…叫左你要低調…