「無啦啦多左幾個家姐同細妹 Season 2」: 傳說

Miss Leung好快就安排左我坐既位置，係一個窗口位，旁邊坐左個女仔。
 
個女仔同我差唔多高，長頭髮扎馬尾，皮膚白白咁幾靚女，不過可惜我無興趣。
 
我一坐低，係我前面同後面既兩個男仔就撩我傾計。
 
「喂阿明你好呀，我叫黑仔，有乜關於呢間學校既問題都可以問我架，我知既都會答。」
 
黑仔？呢個名都幾貼切喎…睇佢皮膚…
 




「屌，咪鬼理佢啦阿明，喂我叫阿希。」
 
我：「阿希？你係阿希？哦…你係阿希…哦…」
 
頂，忍唔住搞gag添。
 
阿希：「屌！十次自介有八次都係咁架喎！我唔識管家婆架！」
 
阿希咁講完之後大家都笑左，大聲到比Miss Leung叫我地靜D。
 




咁算唔算識到兩個朋友呢？
 
之後我地都係班房處理班務，好似選下班長呀，班會之類。
 
只係我初黎報到而且又唔係特別有咩職位想做，所以我都只係保持沉默。
 
大家都好積極咁去爭取職位，氣氛非常熱烈。
 
就係職位都差唔多選哂既時候，有一個我認為最惡頂既職位推左出黎。
 




無錯，就係班長。
 
Miss Leung一講呢兩個字，成班都即刻靜哂。
 
睇黎大家都同我一樣覺得班長呢個位係件豬頭骨。
 
Miss Leung：「真係無人想做班長？但係呢個位一定要有人做架喎。」
 
「Cody你有無興趣做女班長啊？」
 
Miss Leung一叫Cody呢個名，大家都望哂過黎我呢邊。
 
喂大佬，我唔係叫Cody喎仲乜望住我。
 
「我無問題。」




 
就係我緊張之際，一直坐係我旁邊既女仔突然開聲。
 
哦原來Cody係佢。
 
Miss Leung：「咁今年就辛苦你喇~至於男班長呢…」
 
「我做！！！」
 
嘩，嚇死人咩，無啦啦咁多人想做男班長？頭先明明無人想做架。
 
呢個Cody…睇黎係呢班既女神咁喎…
 
最後Miss Leung將男班長呢個位安排左比一個叫「諾賢」既男仔。
 




呢條友高高瘦瘦，幾靚仔笑容又多，應該係個好人？
 
係決定好所有職位之後，大家都係班房一邊傾計一邊等安排上禮堂聽開學禮。
 
黑仔同阿希都不斷同我傾，內容全部都係圍繞學校，打機同一D動漫野。
 
佢地並無過問我以前係邊間學校讀，就連我以前既學校生活，因乜要轉校都無問。
 
唔知佢地咁樣係有心定無意，但咁樣既朋友令我覺得好舒服，我唔需交代任何野。
 
希望可以同佢地一直做朋友啦，好似以前阿惠同…
 
阿威咁。
 
黑仔：「唉睇黎傳說去到今年就要結束喇，無喇無喇。」




 
黑仔突然講出一句好令人在意既說話，一下將我拉返黎現實。
 
我：「傳說？呢間學校有咩傳說？」
 
阿希：「係喎阿明你新黎唔知，我地呢間學校有一個已經六年既傳說，一個前無古人，後無來者既男學生。」
 
啊啊，我大概知道佢講緊邊個喇。
 
同我諗既一樣，好快阿希就講左一個非常熟悉既人名。
 
「藍洛晨。」