「無啦啦多左幾個家姐同細妹 Season 2」: 插班
所有人，係所有準備踏入校門既人係聽到晨哥既說話之後都停低腳步，望左過黎我地呢邊，仲要個個都用一個好愕然既眼神望。
唉…明明過到黎呢邊想低調d…家陣比晨哥你咁搞一搞，仲要係正開學日…
晨：「校長同教務處叫我係度等你地，跟我黎。」
呼…睇黎晨哥都知道咁做太過高調，求其搵左個理由分散人地既注意力。
大家聽到之後都不以為然，繼續一個個步入校門，而我亦鬆一口氣，跟隨大家一齊入去學校。
我地三個一直跟住晨哥，直至去到校務處旁邊既一間房既門口，晨哥先停低。
晨：「入去喇。」
我：「入面係…？」
晨：「哦無，幫你辦入學手續啫，程序野點都要做既。」
啊係喎我地連入學手續都未搞架喎。
於是我推開門，發現入面除左幾個疑似老師既人係度之外，仲有三個女學生背向我地坐左係度。
就係我打量呢三個到底係咩人既時候，其中一個阿Sir注意到我地。
Sir：「晨，佢地係？」
晨：「校長早晨，呢三個都係我之前講既Form5插班生，麻煩你地喇。」
校長！？呢個四眼阿Sir就係校長？嘩好彩無亂講野啫。
校長：「好咁請你地入黎坐低先，我岩岩準備開始講。晨你可以返上班房先。」
晨：「明白，咁我走先。」
「晏D再見啦阿明。」
晨哥就咁就走左，留低我地三個面對咁多阿Sir。
「乜你地咁遲架？又唔知醒呀？」
咦係Ellen把聲！？
我再一次望過去果三個女學生，原來就係佢地三個。
Ellen Ellie仲有Anna。
我：「喂原來係你地三個啊。仲以為係邊個添。」
Anna：「咩意思呀傻仔明，你想唔係我地咩？」
Ellen：「佢肯定想溝新女啦。」
我：「點會呢點會呢，我就奇怪點解點會有咁靚既女仔，原來就係我既…」
Ellie：「Eh…阿明，校長佢地…」
仆街，唔記得校長佢地係度！好彩Ellie提一提我！
我即刻拉埋Sarah同Yui乖乖咁坐係Ellen佢地後面，扮到咩事都無發生過咁。
不過我偷偷咁望左校長一眼，佢都無話黑面之類，反而一直臉帶笑容，好和善咁。
呼…好彩啫。
我地六個坐定之後校長就行到去我地正面，開始拎起檯面上既文件。
校長：「好啦六位同學，藍洛晨之前已經同我講過你地既情況，我亦睇過你地既成績等等既資料，好歡迎你地加入我地學校。」
「根據你地之前提交既資料，學校已經為你地準備大部分既野，呢D係你地既學生證，內聯網既帳戶之類，你地可以確認一下。」
校長做做手勢，係佢旁邊既幾個人即刻拎左一份野埋黎派比我地。
我接過一睇，原來係學生證同一張紙，上面有Ac同Password。
不過學生證上有我個樣，點解既？我印象中應該無交過相架。
Sarah：「係我交架，我知道你一定唔會check e-mail，所以我自作主張咁幫你交埋喇。」
我肯定我無講出聲…不過算啦，解決左我心入面既疑問。
校長：好喇而家你地既班主任會帶你地去你地各自既班房，佢地會幫你地安排跟住既野。」
Ellen：「吓我地六個唔係同一班架？」
Ellie：「家姐吖…邊有可能安排六個插班生入同一班架…」
校長：「無錯，雖然我知道你地六位感情好好，不過呢個係學校政策，你地會編入五班。」
六個人五班…即係得兩個人可以一齊讀同一班啦。會係邊兩個呢？
校長：「好喇時間唔早啦，行喇。」
就係校長講完之後，一個miss向我招手，示意我跟佢走。
我：「咁我行先喇，一陣再見啦。」
我同佢地五個道別之後就匆匆跟住個位miss，去左搭𨋢。
呢個Miss望落應該廿幾歲，雖然唔係話好靚，不過比到人一份親切感，好似大家姐咁。
佢沿途同我講左唔少有關呢間學校既野，仲講左句野令我好深刻。
「雖然我唔知你同你既朋友發生左咩事，不過你地入左黎呢度就忘記左之前既事，尤其係唔開心既，跟著要比心機讀書喇知無？」
哇屌，用咁溫柔既語氣講一句咁溫柔既說話，有佢做班主任真係福氣。
BTW，呢位Miss姓梁。
Miss Leung：「好喇我地到喇，呢個就係我地班既班房，你要好好記住啦。」
我：「知道Miss Leung。」
Miss Leung再向我報以一個微笑，哇幾鬼甜。
之後Miss Leung就推開班房門，帶左我入去。
班房出符意料既靜，我連天花既風扇聲都可以聽到。
班上面既同學全部都望住我，搞到我好緊張。
Miss Leung：「好啦各位同學，呢位係我地既新同學，今日開始會加入我地班，不如我地就請呢位同學先介紹一下自己。」
Miss Leung突然就拋個波比我，搞到我一時間反應唔黎，直接「吓」左一聲，大家都笑左。
不過多得呢一下，我D緊張感一下子無哂，因為我自己都忍唔住笑。
我食住呢個勢，開始我既自我介紹，而且我決定盡量簡㓗。
「大家好，我叫陳煒明，初黎報到還請各位多多指教。」
「我講完喇多謝各位。」
正當我以為班房又會陷入沉默既時候，居然聽到一片掌聲。
大家都笑住咁拍手，望落都幾友善。
太好喇。